Nagmalar 5 - Мукаддес Китап

5‑нҗи бап Йигит:

¹ Эй, эзизим, гелинлигим, мен багыма гелйәрин; мүрүм билен атырымы йыгнаян, бал өйҗүгими, балымы иййән, шерабымы, сүйдүми ичйән. Ийиң, эй, сөйгүли ярлар! Эй, ышкың есирлери, ийип-ичиң, ышкдан мес болуң!

Гызың бойдашлары: Гыз:

² Мен укуда, йөне көңлүм оя. Ине, бу ярымың овазы. «Гапыны ач, эзизим, дилдарым мениң, гөгерчиним, пәкизәм мениң! Башым чыга эзилен, сачым-да гиҗәниң немине».

³ Эшигими чыкарыпдым геейинми ене? Аякларымы ювупдым хапалайынмы ене?

⁴ Элини гапы дешигинден узатды ярым, ышкым оңа галкынды.

⁵ Турдум ярыма гапы ачмага, эллеримден дамды мүр, бармакларымдан акды мүр гулпуң тутаваҗына.

⁶ Гапыны ачдым ярыма, йөне гиден экен ол. Овазына эзилди йүрегим. Агтардым, тапмадым оны; чагырдым, җогап бермеди.

⁷ Шәхерде айланып йөрен гөзегчилер маңа душдулар; мени урдулар, яраладылар, шәхер диварларының сакчылары бүренҗегими башымдан айырдылар.

⁸ Эй, Иерусалим гызлары! Сизе ялбарярын, ярымы гөрсеңиз айдың, ышкдан хесерләндирин.

Гызың бойдашлары:

⁹ Ярың бейлекилерден нәмеси артык, эй, гөзеллер гөзели? бизе ант ичериң ялы, ярыңың бейлекилерден нәмеси артык?

Гыз:

¹⁰ Акмеңиз, гүлгүне йүзлүдир, ярым, он мүңлериң арасында сайланяр ол.

¹¹ Сап алтындыр башы, сачлары буйра, гарга дей гара.

¹² Онуң гөзлери булак башында сүйде ювнуп отуран гөгерчин ялы; олар отурдылан гымматбаха дашлары ялы.

¹³ Атыр сачян гүлхана дей яңаклары, мүр дамдырян бәгүле огшаяндыр додаклары.

¹⁴ Голлары йүзи сары якут билен безелен тогалак алтындыр, гөвреси гөк якуда гапланан пил сүңкүдир.

¹⁵ Аяклары сап алтын үстүнде отурдылан мермер сүтүнлер дей, гөрки Ливан дей, сайлама кедр агачлары дей.

¹⁶ Додаклары иң датлы, катды-каматы овадан. Бу мениң ярымдыр, достумдыр, эй, Иерусалим гызлары!