Nagmalar 4 - Мукаддес Китап

4‑нҗи бап Йигит:

¹ Ненеңси гөзел сен, дилдарым, ненеңси гөзел! Бүренҗегиң астында гөгерчин гөзлим. Гилгат дагындан инип гелйән гечилериң сүрүсине огшаяр сачың.

² Гыркылып, сувдан чыкып гелйән гоюн сүрүсине огшаяр дишлериң. Әхлиси экизлидир, ялкы дәлдир олар.

³ Гырмызы сапак дей додакларың, агзың-да не аҗайып. Бүренчекде гизленен яңакларың энара меңзейәр.

⁴ Давудың горхана диңидир бойнуң, мүң герчегиң галканы асылгыдыр ондан.

⁵ Майсалыкда отлаян экиз җерен овлагына огшаяр ики гөвсүң.

⁶ Даң атып, көлегелер йитйәнчә, мүр дагына, якымлы ыслы түтетги байрына гидерин.

⁷ Катды-каматың ненеңси гөзел, эй, дилдарым! Сенде хич бир кемлик ёк.

⁸ Ливандан биле гидели, эй, гелинлигим; Ливандан мениң билен гайт! Амана депесинден, Сенир, Хермон депелеринден, ширлериң сүренлеринден, гаплаңлы даглардан ашып гел.

⁹ Эй, эзизим, гелинлигим, көңлүми майыл этдиң, гөзлериң билен бир бакышда, бойнуң хүнҗүсиниң бири билен көңлүми майыл этдиң.

¹⁰ Не ширин сөйгиң сениң, эй, эзизим, гелинлигим! Ышкың шерапдан, атырыңың хошбой ысы әхли хошбой ыслы затлардан леззетлидир!

¹¹ Додакларыңдан бал дамяр, эй, гелинлигим; бал билен сүйт бар дилиң астында; лыбасларыңың якымлы ысы Ливаның хошбой ысы дей.

¹² Эй, эзизим, гелинлигим, сен бир гапысы япык багсың, агзы япык гуюсың, мөхүрленен чешмесиң.

¹³ Нахалларың нар бакҗасыдыр: сайлама мивелери билен, хына хем нард атырлары билен,

¹⁴ атырдыр загпыран билен, ыслы гамышдыр далчын билен, дүрли якымлы ыслы агачлар билен, хошбой мүрдүр ахалот билен, дүрли хошбой ыслы затлар билен.

¹⁵ Сен баг чешмесисиң, шыпалы сув гуюсысың, Ливаның акар сувусың.

Гыз:

¹⁶ Оян, эй, демиргазык ели! Гел, эй, гүнорта ели! Багымың үстүнден өвүс, онуң атыр ысы чар тарапа яйрасын. Ярым өз багына гелсин, сайлама мивелерини ийсин!