Nagmalar 1 - Мукаддес Китап

1‑нҗи бап Гыз:

Сүлейманың нагмалар нагмасы

¹ Додаклары билен, гой, мени өпсүн! Чүнки шерапдан датлыдыр сөйгиң!

² Мүшки-анбарларың ненеңси хошбой, адың-да дөкүлен атыр дей, шонуң үчин гызлар сөййәрлер сени.

³ Мени өзүң билен алай, ховлугалы. Шазадам мени ички отагына гетирди. Сениң үчин шатланалы ве гуваналы; шерапданам зыяда тарыплалы сениң ышкыңы. Сен оларың сөйгүсине мынасып!

Гызың бойдашлары: Гыз:

⁴ Эй, Иерусалим гызлары, гараягыз-да болсам, гөрмегейдирин, гара мен Кедарың чадырлары дей, овадан мен Сүлейманың перделери дей.

⁵ Гараягызлыгыма бакмаң, Гүн гаралтды мени. Энемиң огуллары маңа гахарландылар; үзүм багына мени сакчы гойдулар, йөне өз үзүм багыма бакып билмедим.

⁶ Эй, көңлүмиң ашыгы, айтсана маңа, ниреде бакяң сүриңи? Гүнорта чагы олара ниреде дынч берйәң? Ёлдашларыңың сүрүлериниң янында нәме үчин сергездан зенан дек болайын?

Йигит:

⁷ Эй, гөзеллериң солтаны! Эгер билмесең, сүриниң ызы билен гит, чопанларың чадырының янында овлакларыңы бак.

⁸ Фараоның сөвеш арабасына гошулан байтала меңзедйән сени, эй, мениң магшугым!

⁹ Шелпели яңакларың, хүнҗүли бойнуң не гөзел!

¹⁰ Күмүш дүвмели тылла шелпелер ясарыс саңа.

Гыз:

¹¹ Шазадам супрасында отырка, нард атырым хошбой ысыны сачды.

¹² Ашыгым мениң үчин гөвүслеримиң арасында ятян мүр богдаҗыгыдыр.

¹³ Ашыгым мениң үчин Эйнгеди үзүм багларындакы хына гүллериниң чогдамыдыр.

Йигит:

¹⁴ Сен ненеңси гөзел, Сөйгүли дилдарым, мениң! Сен ненеңси гөзел, гөгерчин гөзлим!

Гыз:

¹⁵ Гөр, нәхили сыратлы сен, эй, мениң сөйгүли ярым, ненеңси хошрой сен! Гөк майсалыкдыр ятян еримиз.

¹⁶ Кедрдендир диреглери өймүзиң, арчадандыр үчеги.