Müsürden çykyş 6 - Мукаддес Китап

6-нҗы бап

¹ Эмма Реб Муса: «Мениң фараона нәме этҗегими инди гөрерсиң. Мен оны гудратлы голум билен халкымы гойбермәге меҗбур эдерин, ол шу гудратлы голуң зарбындан яңа, олары хатда өз юрдундан ковуп чыкарар» дийди.

² Худай Муса шейле дийди: «Мен Ребдирин.

³ Мен Ыбрайыма, Ысхага ве Якуба Гудратыгүйчли Худай болуп гөрүндим, эмма Өзүми олара Реб адым билен танатмадым.

⁴ Мен олара гелмишек болуп яшан юрды болан Кенган топрагыны бермеги әхт этдим.

⁵ Шейле хем, Мен ысрайылларың Мүсүрде гулчулыкдан яңа эзилйәндиклери себәпли эдйән ахы-наласыны эшитдим ве Өз эден әхтими ятладым.

⁶ Шонуң үчин хем ысрайыллара айт: „Мен Ребдирин. Мен сизи Мүсүр зулумындан чыкарып, гулчулыкдан азат эдерин. Гудратлы гүйч билен ве агыр җезаларым билен Мен сизи олардан азат эдерин.

⁷ Мен сизи Өз халкым эдип кабул эдерин ве Мен сизиң Худайыңыз боларын. Онсоң сизи Мүсүр гулчулыгындан бошадан Худайыңыз Реббиң Мендигими билерсиңиз.

⁸ Мен сизи Ыбрайыма, Ысхага ве Якуба сөз берен ериме элтерин ве Мен сизе ол ери эелемәге берҗекдирин. Мен Ребдирин“».

⁹ Муса бу сөзлери ысрайыллара айдып берди, эмма олар гөвнүчөкгүндиклери ве рехимсиз эзилйәндиклери себәпли Мусаны диңлемедилер.

^10-11 Соңра Реб Муса: «Гит-де, Мүсүриң патышасы фараона айт, гой, ол ысрайыллара Мүсүр юрдундан чыкып гайтмага ругсат берсин» дийди.

¹² Эмма Муса Реббе: «Гөрйәңми, энтек ысрайыллар мени диңләнок, онсоң фараон маңа нәдип гулак ассын, мен бир дилсиз-агызсыз адам ялы ахырын» дийди.

¹³ Реб Муса ве Харун билен ысрайыллар ве Мүсүриң патышасы фараон хакында геплешип, олара ысрайыллары Мүсүрден алып чыкмагы буюрды.

Муса билен Харуның несил дарагты

¹⁴ Булар ысрайылларың аталарының уругбашылары: Ысрайылың илкинҗи оглы Рубениң огуллары: Ханок, Паллу, Хесрон ве Кармы. Булар Рубениң уругларыды.

¹⁵ Шимгоның огуллары: Емувел, Ямын, Охат, Якин, Сохар ве кенган аялындан болан оглы Шавул. Булар Шимгоның уругларыды.

¹⁶ Левиниң несил дарагтына гөрә, онуң огулларының атлары шулардыр: Гершон, Кохат ве Мерары. Леви бир йүз отуз еди яшап дүнйәден өтди.

¹⁷ Гершоның огуллары: Либни ве Шимги уруглары билен.

¹⁸ Кохадың огуллары: Имран, Йисхар, Хеброн ве Узыел. Кохат бир йүз отуз үч яшап өлди.

¹⁹ Мерарының огуллары: Махлы ве Мушы. Ине, бу ашакдакылар болса левилериң несиллери боюнча уруглары.

²⁰ Имран өз какасының гыз җигиси Ёкебеди өзүне аял эдип алды, ол хем оңа Харун билен Мусаны догруп берди. Имран бир йүз отуз еди яшап арадан чыкды.

²¹ Йисхарың огуллары: Кора, Непек, Зикри.

²² Узыел огуллары: Мишайыл, Элсапан ве Ситри.

²³ Харун Эминадабың гызы, Нахшоның гыз доганы Элишеба өйленди ве оларың Надап, Абыху, Элгазар ве Ытамар диен огуллары болды.

²⁴ Кораның огуллары: Асыр, Элкана ве Абыясап. Булар Кораның уруглары болупдыр.

²⁵ Харуның оглы Элгазар Путыелиң гызларының бирини өзүне аял эдип алды ве ондан Пинехас диен оглы болды. Ине, шулар левилериң уруглары боюнча оларың аталарының уругбашылары болупдыр.

²⁶ Реббиң: «Ысрайыллары топар-топар эдип, Мүсүрден алып чык» дийип буйрук берен адамлары ине, шу Харун билен Мусады.

²⁷ Ысрайыллары, Мүсүрден алып гайтмак үчин, Мүсүр патышасы фараон билен геплешенлер хем шулар – Муса билен Харунды.

Харун Мусаның сөзлейҗиси боляр

²⁸ Шол гүн Реб Мүсүрде Муса йүзленди.

²⁹ Реб Муса: «Мен Ребдирин. Мениң саңа айдянларымың хеммесини Мүсүриң патышасы фараона етир» дийди.

³⁰ Эмма Муса Реббе: «Мен сөзе гарып адам, онсоң фараон мени нәдип диңлесин» дийди.