Müsürden çykyş 16 - Мукаддес Китап

16-нҗы бап Манна ве беденелер

¹ Әхли ысрайыл халкы Эйлимден чыкып гайтды. Мүсүрден чыканларындан соң, олар икинҗи айың он бәши гүни Эйлим билен Синайың аралыгында ерлешйән Син чөлүне гелдилер.

² Чөлде әхли ысрайыл халкы Муса ве Харуна игенмәге башлады.

³ Олар шейле дийдилер: «Биз Реббиң элинден Мүсүрде өлен болсак говы боларды. Биз ол ерде этли газанлар атарып, дойянчак нахар иердик. Сиз болса бу тутуш җемагаты ачлыкдан өлдүрмек үчин чөле гетирипсиңиз».

⁴ Реб Муса: «Ине, Мен сизе гөкден чөрек ягдырҗак. Адамлар хер гүн гүнделик пайыны йыгнамага чыкарлар. Мен олары шейле сынап, Мениң кануным боюнча йөреҗегини я йөремеҗегини билерин.

⁵ Алтынҗы гүн олар гүнделик йыгнаян пайы билен деңешдиренде ики эссе көп йыгнап, ики гүнлүгини тайярлап гойсунлар» дийди.

⁶ Шейлеликде, Муса билен Харун әхли ысрайыллара йүзленип: «Агшам сиз өзүңизи Мүсүрден алып чыканың Ребдигини билерсиңиз.

⁷ Ирден болса сиз Реббиң шөхратыны гөрерсиңиз, себәби Реб сизиң Өзүне гаршы эдйән зейренчлериңизи эшитди. Бизден налар ялы, биз ким болупдырыс?» дийдилер.

⁸ Муса ене-де: «Реб сизе агшамына иймәге эт, эртирине болса дойянчаңыз чөрек берер. Себәби Реб сизиң Оңа гаршы эдйән шикаятларыңызы эшитди. Биз ким? Сизиң игенчлериңиз бизе дәл-де, Реббе гаршыдыр» дийди.

⁹ Муса Харуна: «Бүтин ысрайыл халкына айт: „Инди олар Реббиң хузурына гелсинлер, чүнки Реб оларың наласыны эшитди“» дийди.

¹⁰ Харун тутуш ысрайыл халкына йүзленип геплән бадына, олар чөлде булудың ичинде пейда болан Реббиң шөхратыны гөрдүлер.

¹¹ Реб Муса шейле дийди:

¹² «Мен ысрайылларың налышыны эшитдим. Олара айт: агшамына эт иерсиңиз, эртирине болса чөрекден доярсыңыз. Шонда сиз Худайыңыз Реббиң Мендигими билерсиңиз».

¹³ Агшам беденелер учуп гелип, дүшелгәни бүредилер. Ир эртир болса, дүшелгәниң төверегине чыг дүшди.

¹⁴ Чыг совланда, чөлүң йүзүнде гырава меңзеш майда инче патрак ялы зат галды.

¹⁵ Ысрайыллар муны гөренде, бири-бирлеринден: «Бу нәме?» дийшип сорадылар. Чүнки олар мунуң нәмедигини билмейәрдилер. Муса олара: «Бу сизе Реббиң иймәге берен чөреги.

¹⁶ Реббиң буйругы шудур: хер бириңиз ондан өз ийип билҗегиңизи йыгнаң. Дүшелгәңиздәки адам санына гөрә, хер җан башына бир омер йыгып аларсыңыз» дийди.

¹⁷ Ысрайыллар шейле хем этдилер. Оларың кәбири көпрәк, кәбири азрак йыгнады.

¹⁸ Эмма бир омер өлчеги билен өлчәнлеринде, көп йыгнаныңкыдан артмады, аз йыгнаныңкы-да кем чыкмады. Хер ким өз ийип билҗегини йыгнан экен.

¹⁹ Муса олара: «Екеҗе адам хем ондан эртире хич зат галдырмалы дәлдир» дийди.

²⁰ Эмма олар Муса гулак асмадылар. Йыгнанларындан биразрагы эртире галды. Ол болса гуртлап порсапдыр. Мусаның олара гаты гахары гелди.

²¹ Хер гүн эртирине хер ким бу берилйән чөрекден өз ийип билҗегини йыгнады. Гүн гызып, ыссы дүшенде, ол эреди.

²² Алтынҗы гүни олар адам башына ики эсседен, ягны ики омер мөчберинде йыгнадылар. Халкың әхли ёлбашчылары гелип, муны Муса айданларында,

²³ Муса шейле дийди: «Реббиң буйругы шудур: эртир дынч алыш гүни, бу Реббе багыш эдилен мукаддес Сабат гүнүдир. Биширҗек затларыңызы биширип, гайнатҗак затларыңызы гайнадың. Артан затларыңызың хеммесини эртир даңдана алып гоюң».

²⁴ Шейлеликде, олар Мусаның буйругы боюнча эртире ченли ондан алып гойдулар. Ол не порсады, не-де гуртлады.

²⁵ Муса: «Муны шу гүн ийиң, чүнки бу гүн Реб үчин Сабат гүнүдир. Бу гүн сиз олары мейдандан тапмарсыңыз.

²⁶ Алты гүнләп сиз ондан йыгнарсыңыз, эмма единҗи гүн болан Сабат гүни мейданда ондан хич зат тапмарсыңыз» дийди.

²⁷ Единҗи гүн бирнәче адам ондан йыгнамага чыкды, эмма хич зат тапмадылар.

²⁸ Реб Муса: «Сиз хачана ченли Мениң табшырыкларымы ве канунларымы ерине етирмекден боюн товлаҗаксыңыз?

²⁹ Середиң! Мен сизе Сабат гүнүни бердим. Шонуң үчин хем алтынҗы гүн Мен сизе чөреги ики гүнлүк эдип берйәрин. Единҗи гүн хер ким өз еринде галсын, хич ким дашары чыкмасын» дийди.

³⁰ Шейдип, адамлар единҗи гүн дынч алдылар.

³¹ Ысрайыллар ол чөрегиң адына манна дийип ат гойдулар. Ол кинзаның тохумына меңзеш ак ве кичи болуп, тагамы бал гошулып биширилен челпек ялыды.

³² Муса: «Реббиң буйругы шейле: „Гелҗекки несиллер үчин бир омер мөчберде манна саклаң, шонда олар Мүсүрден алып чыканымдан соңра, чөлде сизи нәхили чөрек билен баканымы гөрерлер“» дийди.

³³ Муса Харуна: «Бир голча алып, онуң ичине бир омер маннаны сал. Гелҗекки несиллер үчин саклар ялы, оны Реббиң хузурында гой» дийди.

³⁴ Реббиң Муса буйрушы ялы, Харун оны сакламак үчин, Әхт сандыгының өңүнде гойды.

³⁵ Ысрайылларың орнашан юрды болан Кенган топрагына барып етйәнчәлер, олар кырк йыллап манна ийдилер.

³⁶ (Бир омер батманың ондан бири боляр.)