Müsürden çykyş 13 - Мукаддес Китап

13‑нҗи бап

^1-2 Соңра Реб Муса: «Илкинҗи доглан әхли эркек гөбеклилери Маңа багыш эдиң. Ысрайылларың гөвресинден илкинҗи дүнйә инен хер бир огул, шейле хем, оларың малларының хем илкинҗи эркек гузланы Мениңкидир» дийди.

Петир байрамы

³ Муса халка шейле дийди: «Бу гүни ятда саклаң, чүнки сиз бу гүн гул болуп яшан юрдуңыз Мүсүрден чыкдыңыз. Ол ерден Реб сизи Өзүниң бейик гүйҗи билен алып чыкды. Хамырмаялы чөрек ийилмели дәлдир.

⁴ Бу гүн сиз Мүсүрден Абып айында чыкярсыңыз.

⁵ Реб сизиң ата-бабаларыңыза сөз берен сүйт ве бал акян мес топраклы юрт болан кенганларың, хетлериң, аморларың, хивилериң ве ябусларың юрдуна гетирен вагты хем сиз шу айда бу байрамы белләрсиңиз.

⁶ Сиз еди гүнләп петир иймелисиңиз ве единҗи гүни сиз Реббиң шанына той эдерсиңиз.

⁷ Шол еди гүнүң довамында диңе петир ийиң. Сизиң яшаян әхли ерлериңизде екеҗе-де хамырмаялы биширилен чөрек болмасын.

⁸ Едиленҗи гүн болса оглуңа: „Мен булары Мүсүрден чыканымда Реббиң маңа эденлериниң хатырасы үчин шейле эдйәрин“ дийип гүррүң бер.

⁹ Гой, бу байрам элиңизе багланан ялы я-да маңлайыңыза даңлан ялы бир ятлама аламаты болсун. Бу болса Реббиң канунының элмыдама дилиңизде болмагыны ятладар, чүнки Реб сизи гудратлы голы билен Мүсүрден алып чыкды.

¹⁰ Шонуң үчин хем сиз хер йыл шол бир белли вагтда бу кануны ерине етирмелисиңиз».

Илкинҗи доглан эркеклер хакында

¹¹ «Реб сизе ве ата-бабаларыңыза сөз берши ялы, сизи кенганларың ерине гетирип, оны сизе беренде,

¹² сиз илкинҗи доглан хер бир эркек гөбеклини Реббиң хузурына гетирмелисиңиз. Малларыңызың әхли илкинҗи эркек догланлары Реббиңкидир.

¹³ Хер бир эшегиңизиң күррелән күрресини гузыңыз билен чалшып, ызына сатын алың. Эгер ызына сатын алмасаңыз, онда онуң бойнуны омруң. Чагаларыңызың арасында хер бир новбахар оглуңызы ызына сатын алың.

¹⁴ Хер хачан оглуң сенден мунуң нәмәни аңладяндыгыны соранда, оңа шейле дий: „Реб Өз гудратлы голы билен бизи гул болуп яшан юрдумыз Мүсүрден алып чыкды.

¹⁵ Фараон доңйүреклик эдип, бизи гойбермекден йүз өврени үчин, Реб Мүсүриң әхли илкинҗи доглан ынсан огулларындан башлап, тә малларың илкинҗи догран эркек җынслыларына ченли өлдүрип чыкды. Шонуң үчин хем илкинҗи доглан әхли эркек җынслылары Реббе гурбан эдйәрин, йөне новбахар оглумы ызына сатын алып билйәрин“.

¹⁶ Реб бизи Өз гудратлы гүйҗи билен Мүсүрден алып чыкандыгы үчин, бу байрам элиңизе багланан ялы я-да маңлайыңыза даңлан ялы бир белги болсун».

Реб ысрайыллара ёл гөркезйәр

¹⁷ Фараон халкы гойберенде, Худай олары пилиштлилериң үстүнден гечйән якын ёл билен алып гитмеди. Чүнки Худай бу халк ёлда урша дучар болайса, пушман эдип, ызына Мүсүре доланар өйтди.

¹⁸ Шейдип, Худай ысрайыллары Гызыл деңзе гидйән чөллүкден алып гитди. Ысрайыллар Мүсүрден урша тайяр болуп, яраглы чыкыпдылар.

¹⁹ Муса Юсубың сүңклерини өзи билен алды, себәби Юсуп ысрайыллара: «Худай сизе назар салар, шонда сиз бу ерден мениң сүңклерими хем өз яныңыз билен алып гидиң» дийип, олара ант ичирипди.

²⁰ Ысрайыллар Сукотдан чыкып, чөлүң четиндәки Этамда дүшледилер.

²¹ Реб оларың өңүнден ёл гөркезип, гүндизине булут сүтүни болуп, гиҗесине болса от сүтүни болуп, оларың ёлларыны ягтылдярды. Шонда олар гүндиз хем, гиҗе хем ёл йөрәп билйәрдилер.

²² Гүндизине булут сүтүни, гиҗесине болса от сүтүни халкың өңүнден асла узаклашмаярды.