Müsürden çykyş 1 - Мукаддес Китап

1‑нҗи бап Мүсүрлилер ысрайыллары эзйәрлер

¹ Ине, Якубың Мүсүре өз тутуш хоҗалыклары билен гелен огулларының атлары:

² Рубен, Шимгон, Леви, Яхуда,

³ Ысакар, Зебулун, Бенямин,

⁴ Дан, Нафталы, Гат, Ашер.

⁵ Якубың әхли несиллериниң саны җеми етмишди. Юсуп эййәм Мүсүрдеди.

⁶ Вагтың гечмеги билен Юсуп ве онуң әхли эркек доганлары, онуң дөвүрдешлери дүнйәден өтди.

⁷ Эмма ысрайыл огулларының несиллериниң тохум-тиҗи яйрап көпелдилер ве оларың саны җуда артды, шоңа гөрә хем тутуш Мүсүр олардан долуды.

⁸ Инди болса Мүсүр тагтына Юсуп хакында хич зат билмейән башга бир тәзе патыша чыкды.

⁹ Ол патыша өз халкына йүзленип: «Середиң, бизе гөрә ысрайылларың саны көп ве гүйчли. Бу бизиң үчин ховплы.

¹⁰ Олар мундан артык көпелмез ялы, гелиң, мекирлик билен оларың соңуна чыкалың. Ёгсам, уруш турайса, олар душманымызың тарапына гошулып, бизе гаршы сөвешмеклери ве бизиң юрдумыздан чыкып гитмеклери мүмкин» дийди.

¹¹ Шейлеликде, мүсүрлилер ысрайыллары меҗбуры ишледип, олары эзмек үчин, оларың үстүнден хоҗайынлар белледилер. Ысрайыллар фараон үчин Питом ве Рагмесес диен галла сакланян галалары гурдулар.

¹² Эмма мүсүрлилер ысрайыллара нәче зулум этселер-де, олар өңкүсинден-де хас көпелдилер ве оларың саны җуда артды. Мүсүрлилериң ысрайыллардан сусты басылды.

^13-14 Шейдип, олар ысрайыллары залымлык билен эзип, олары лай ве керпич ялы агыр ишлерде, хер хили мейдан ишлеринде ишледип, оларың дурмушыны аҗы яшайша өвүрдилер. Әхли агыр ишлерде олара рехимсизлик билен сүтем этдилер.

¹⁵ Соңра бириниң адына Шипра, бейлекисиниң адына Пуга дийилйән ики саны еврей гөбегенелерине Мүсүр патышасы шейле дийди:

¹⁶ «Сиз еврей аялларына гөбегене болуп хызмат эдйән вагтыңыз, середиң, эгер огул догурсалар, ол бәбеги өлдүриң, эгер гыз догурсалар, гой, онда ол яшаберсин».

¹⁷ Эмма бу гөбегенелер Худайдан горкян аяллар экен, олар Мүсүр патышасының буйрушы ялы этмән, гайтам, эркек доглан чагалары-да дири галдырыпдырлар.

¹⁸ Шонуң үчин хем, Мүсүр патышасы шол гөбегенелери янына чагырып, олардан: «Нәме үчин сиз бейле этдиңиз, эркек доглан чагалары хем дири галдырдыңыз?» дийип сорады.

¹⁹ Гөбегенелер фараона: «Себәби еврей аяллары Мүсүр аяллары ялы дәл, олар догумлы, оларың янына гөбегене гелип етйәнчә, оларың өзлери дограйярлар» дийдилер.

²⁰ Худай хем бу гөбегенелере гарашык этди, шейдип, ысрайыл халкы хас көпелди ве гүйчленди.

²¹ Гөбегенелериң Худайдан горкяндыгы себәпли, Худай олара-да улы машгала берди.

²² Соңра фараон әхли мүсүрлилере: «Еврейлерден доглан хер бир огул бәбеги алып, Нил дерясына ташлаң, эмма гыз бәбек болса, гой, ол яшаберсин» дийип буйрук берди.