Mika 6 - Мукаддес Китап

6-нҗы бап Реб ысрайыл халкыны гүнәкәрлейәр

¹ Реббиң айдян сөзүне гулак асың! Туруң, даваңызы дагларың өңүнде беян эдиң, Байырлар-да сесиңизи эшитсин!

² Эй, даглар, ер йүзүниң сарсмаз бинятлары, Реббиң давасына гулак асың! Чүнки Реббиң Өз халкы билен давасы бар, Ол Ысрайыл билен хаклашар.

³ «Эй, халкым, Мен саңа нәме этдим? Нәмеде саңа йүк болдум? Маңа җогап бер!

⁴ Мен сизи Мүсүрден чыкардым, Гулчулыкдан азат этдим, Сизе баш эдип, Мусаны, Харуны ве Меръеми ибердим.

⁵ Эй, халкым, Мовап шасы Баллагың саңа гаршы ниетини, Бегорың оглы Билгамың оңа берен җогабыны, Шитимден Гилгала ченли болан ишлери ядыңа сал! Шонда Мен-Реббиң халас эдиш ишлерими билерсиң» диййәр Реб.

Адамзат Реббе нәме гайтармалы

⁶ Реббиң хузурына нәме билен барайын? Гөкдәки Худая нәхили сежде эдейин? Онуң хузурына якма гурбанлыгы билен барайынмы? Я-да бир яшар гөлелер билен?

⁷ Реб мүңлерче гочдан, Он мүңлерче зейтун яглы дерядан хошал болармы? Языгым үчин новбахар оглумы берейинми? Җанымың гүнәси үчин билимден өнени берейинми?

⁸ Эй, адамзат, Реб ягшының нәмедигини саңа билдирди. Адалаты берҗай этмекден, мерхемети сөймекден, Худайыңызың өңүнде кичи гөвүнли гезмекден башга Реб сизден нәме талап эдйәр?

Ысрайылың алдавы ве җезасы

⁹ Реб гала сесленйәр, (Сениң адыңдан горкмак даналыкдыр). Ол диййәр: «Эй, халк ве гала җемагаты, диңләң!

¹⁰ Өйлерини харам хазыналардан долдуран пислери, Мен нәдип билмезлиге салайын? Кем өлчемек нәлетлидир.

¹¹ Ялан терезилер уланан, торбасы кем өлчег дашлы адамы Мен ненеңси аклайын?

¹² Байлары сүтемден долы, халкы-да яланчы, агызларындан ялан сөзлер чыкяр.

¹³ Шонуң үчин Мен сизе зарба уруп, гүнәлериңиз себәпли сизи вейран этдим.

¹⁴ Иерсиңиз, эмма доймарсыңыз, ач галарсыңыз. Йыгнарсыңыз, йөне сакламарсыңыз. Сакланыңызы гылыч билен ёк эдерин.

¹⁵ Экерсиңиз, эмма ормарсыңыз. Зейтуны енҗерсиңиз, эмма ягыны сүртмерсиңиз, үзүм сыкарсыңыз, эмма шерабыны ичмерсиңиз.

¹⁶ Чүнки Омры шаның парзларына, Ахап несиллериниң пис ишлерине эердиңиз, геңешлерине уйдуңыз. Шонуң үчин Мен сизи хараба өврерин, илатыңызы иле рысва эдерин; халкымың кемситмесини чекерсиңиз».