Mika 5 - Мукаддес Китап

5‑нҗи бап Бейтуллахамдан чыкҗак хөкүмдар

¹ Эй, Иерусалим халкы, гошуныңы топла! Дашымыз габаляр. Ысрайыл хөкүмдарының дулугына таяк билен урярлар.

² Эмма сен, эй, Бейтуллахам-Эфрат, Яхуда уругларының кичиси болсаң-да, сенден чыкар Ысрайылда Мениң үчин хөкүмдарлык этҗек, онуң аслы овалдан, гадымдан бәри бардыр.

³ Тә гөврели аял догурянча, душманларына табшырылар ысрайыл халкы. Соңра онуң есир дүшен доганлары Ысрайыл халкына доланарлар.

⁴ Ол гелип, Реббиң гүйҗи билен, Худайы Реббиң аҗайып ады билен бакар сүрини. Олар асуда яшарлар; бүтин дүнйә яйрар бейиклиги онуң.

⁵ Ол халкына парахатчылык гетирер. Ашурлылар юрдумыза гелип, көшгүмизи басгыласалар, биз еди чопаны, секиз сердары оларың гаршысына иберерис.

⁶ Олар Ашур юрдуны гылыч билен, Нимроды алавлы гылыч билен доландырарлар. Серхедимизден гечип, юрдумыза гирҗек болян ашурлылардан халас эдерлер бизи.

⁷ Якубың неслинден аман галанлары көп халкларың арасында Реббиң иберен чыгы дек, ынсана гарашмаян, адамзатдан чөзүлмейән, от үстүне ягян чабга дек боларлар.

⁸ Якубың неслинден аман галанлары миллетлериң, көп халкларың арасында җеңңел хайванларының арасындакы арслан, гоюн сүрүсине аралашан шир чагасы дек боларлар, арслан дей хүҗүме геченде, басгылап, түйдүм-түйдүм эдер, хич ким олары онуң пенҗесинден халас этмез.

⁹ Эй, ысрайыллар, сиз гаршыдашларыңызы еңерсиңиз. Әхли душманларыңыз гырлып ёк болар.

¹⁰ Реб диййәр: «Шол гүн атларыңызы гырарын, сөвеш арабаларыңызың ёгуна янарын.

¹¹ Юрдуңызың шәхерлерини вейран эдерин, әхли галаларыңызы хараба өврерин.

¹² Җадыгөйлериңизи гырарын, араңызда палчы галдырмарын.

¹³ Бутларыңызы, дикме дашларыңызы ёк эдерин, инди сиз өз элиңизиң ишине сежде этмерсиңиз.

¹⁴ Ашера бутларыны согруп ташларын, галаларыңызы вейран эдерин.

¹⁵ Боюн болмаян миллетлерден гахар-газап билен өч аларын».