Mika 3 - Мукаддес Китап

3‑нҗи бап Ёлбашчылар ве пыгамберлер язгарылярлар

¹ Мен-Мика дийдим: «Гулак гой, эй, Якуп неслиниң баштутанлары, Ысрайыл халкының хөкүмдарлары! Адалаты билмели сиз дәлми нәме?

² Сиз ягшылыгы йигренип, яманлыгы сөййәрсиңиз, халкымың хамыны союп, сүегинден этини сыпырярсыңыз.

³ Халкымың хамыны союп, этини иййәрсиңиз, сүеклерини дөвүм-дөвүм эдип, газана, таба атылҗак эт кимин дограярсыңыз».

⁴ Соңра олар Реббе дады-перят эдерлер. Эмма Реб олара җогап бермез. Ол йүзүни олардан гизләр, чүнки олар пис ишлери этдилер.

⁵ Халкымы азашдырып, өзлерини доюрянлара асудалык диләп, доюрмаянлара-да уруш ыглан эдйән пыгамберлер хакында Реб шейле диййәр:

⁶ «Мунуң үчин гиҗәңиз гөрнүшсиз болар, сизи түмлүк гаплар, палчылык эдип билмерсиңиз. Пыгамберлериң үстүнден гүн яшар, гүндиз гиҗә өврүлер.

⁷ Гөргүрлер масгара эдилер, палчылар утанҗа галар. Худайдан җогап болманы үчин, олар уятдан йүзлерини өртерлер».

⁸ Мен болса Якуба языгыны, Ысрайыла гүнәсини җар этмәге, Реббиң Рухы билен гүйчден, адалатдан, гудратдан долудырын.

⁹ Муңа гулак асың, эй, адалаты йигренип, хакыкаты ёйян Якуп неслиниң баштутанлары! Ысрайыл халкының ёлбашчылары!

¹⁰ Сионы ган билен, Иерусалими адалатсызлык билен бина эдйәнлер!

¹¹ Онуң баштутанлары пара алып, хөкүм чыкарярлар, руханылары төлегли сапак берйәрлер, пыгамберлери пул үчин палчылык эдйәрлер. Шонда-да олар Реббе даянып: «Реб бизиң билендир! Башымыза хич бела гелмез» диййәрлер.

¹² Шонуң үчин хем сиз себәпли Сион экин мейданы кимин сүрлер. Иерусалим харабачылыга өврүлип, даг депесиндәки ыбадатхананы җеңңеллик басар.