Mika 2 - Мукаддес Китап

2‑нҗи бап Адалатсызлык юрды вейран эдйәр

¹ Дүшегинде пислик ойлаянларың, ниетини ямана дүвйәнлериң, дат гүнүне! Даң атанда ниетлерини амала ашырярлар, чүнки оларың муңа гүйҗи етйәр.

² Гөзүне якан экин мейданларыны зорлук билен алярлар, ислән өйлерини эелейәрлер; бирини өйүнден, ене бирини болса мирасындан махрум эдйәрлер.

³ Шонуң үчин Реб шейле диййәр: «Мен бу халка гаршы бела тайынлаярын, ондан боюн гачырып билмерсиңиз. Башыңызы дик тутуп гезмерсиңиз, чүнки бу пис замана болар.

⁴ Шол гүн сизи масгаралап яңсыларлар, сиз шейле агы айдымыны айдарсыңыз: „Бүс-бүтин вейран болдук! Реб халкымың мирасыны дагадяр. Ол муны элимден аляр! Еримизи хайынлара пайлаяр“».

⁵ Муңа гөрә Реббиң халкының арасында юрт биҗе үсти билен пайлашыланда, сизден пайы мирас алмага адам тапылмаз.

⁶ Адамлар: «Вагыз этме» дийип, маңа вагыз эдйәрлер, «Бейле затлар хакда вагыз этме, биз утанҗа галмарыс» диййәрлер.

⁷ Эй, Якубың несли, хей: «Реббиң сабыр кәсеси долдумы? Ол бейле ишлери эдерми?» диймелими сиз? Мениң сөзлерим догручылың хайрына дәлми нәме?

⁸ Эмма сиз халкымың гаршысына душман кимин аяга галярсыңыз. Сөвешден гелйәнлериң, асуда гечип барянларың эгнинден донларыны сыпырярсыңыз.

⁹ Халкымың аялларыны рахат өйлеринден ковяңыз. Чагаларыны берекедимден эбедилик махрум эдйәңиз.

¹⁰ Туруң, гидиң, чүнки бу ер дынчлык ери дәлдир! Мурдарлыгыңыз зерарлы бу ер залымлык билен вейран эдилер.

¹¹ Яланчы, кеззап бири гелип: «Сизе бол шерап ве чакыр хакында вагыз эдейин» дийсе, бу халк шейле пыгамбери кабул эдер.

Ысрайылың аман галанларына Реббиң вадасы

¹² «Эй, Якубың несиллери, Мен хөкман әхлиңизи бир ере йыгнарын. Ысрайыллардан аман галанларыны бир ере топларын. Мен сизи агылдакы гоюнлар кимин, өрүдәки сүри кимин бир ере гетирерин. Юрдуңыз ене-де адамдан долар».

¹³ Таңры ёл ачып, халкың өңүнден гидер. Гала дервезелерини йыкып, дашары чыкарлар. Патышалары баш болар, Реб өңлеринден йөрәр.