Mika 1 - Мукаддес Китап

1‑нҗи бап

¹ Яхуда патышалары Ётамың, Ахазың ве Хизкияның дөврүнде морешетли Мика пыгамбере Самария ве Иерусалим барада Реббиң сөзи аян болды.

Самария билен Иерусалим хөкүм эдилйәр

² Әхлиңиз эшидиң, эй, халклар! Гулак гоюң, эй, земин ве онуң яшайҗылары! Хөкмүрован Реб мукаддес месгенинден сизе гаршы гүвәлик эдер.

³ Ине, Реб Өз меканындан чыкып, ер йүзүне инип, байырларда йөрәр.

⁴ Даглар Онуң аяк астында эрәр, дерелер бөвсүлип, отда эрейән мум ялы, кертден инйән сув дейин болар.

⁵ Буларың бары Якубың несиллериниң языгы, Ысрайыл халкының гүнәлери үчиндир. Якубың несиллериниң языгына ким себәпкәр? Самария дәлми? Яхуданың бутлара сеждегәхи ниреде? Иерусалимде дәлми?

⁶ «Шонуң үчин Мен Самарияны харабачылыга, үзүмчилик ерине өврерин. Дашларыны дерә дөкүп, дүйплерини ачык гоярын» диййәр Реб.

⁷ «Әхли бутлары бөлек-бөлек эдилер, харам газанчларының бары ода якылар, бутларының барыны ёк эдерин, чүнки булары лолы газанҗы билен топлады. Олар ене-де лолы газанҗына өврүлер» диййәр Реб.

Миканың агысы

⁸ Мунуң үчин мен аглап, дады-перят эдерин. Эшиксиз ве аякялаңач гезерин. Шагаллар кимин увларын. Дүегушлар кимин гөзяш дөкерин.

⁹ Самарияның ярасына эм ёк. Ол Яхуда гелип етди. Халкымың дервезесине, Иерусалиме барып етди.

¹⁰ Муны Гатда айтмаң, ахы-налаңызы бес эдиң; Бейтлегапарда гамгынлыкдан гума тогаланың.

¹¹ Эй, Шапыр халкы! Ялаңачланып, утанч ичинде өтүң. Саванан халкы чадырындан чыкмасын. Бейтесел халкының өзи яс тутяр, ондан сизе ярдам болмаз.

¹² Маротың халкы ягшылыга сабырсызлык билен гарашяр, эмма Реб Иерусалимиң дервезесине бела индерди.

¹³ Эй, Лакыш халкы, йүврүк аты араба гош. Сен Сион гызының гүнәсиниң гөзбашысың, чүнки Ысрайылың языгы сенден чыкды.

¹⁴ Инди Морешетгата хошлашык совгадыны берерсиң. Акзып обасы Ысрайыл патышаларына дузак болар.

¹⁵ Эй, Мареша илаты, Реб галаңыза басыбалыҗы гөндерер. Ысрайылың бейик ёлбашчылары Адуллам галасында гизленер.

¹⁶ Сөйгүли огулларыңыза яс тутмак үчин сачыңызы сырың. Башыңыз чайкелиңки кимин кел болсун, чүнки чагаларыңыз сүргүн эдилер.