Matta 8 - Мукаддес Китап

8‑нҗи бап Иса дери кеселлини сагалдяр

¹ Иса дагдан ашак иненде, улы мәхелле Онуң ызына дүшди.

² Шол вагт дери кеселине ёлуган бир адам Онуң янына гелип, дызына чөкүп: «Агам, эгер ислесең, мени бу кеселден тәмизләп билерсиң» дийди.

³ Иса элини узатды-да, оңа дегрип: «Ислейәрин, тәмиз бол!» дийди. Ол адам шобада дери кеселинден гутулды.

⁴ Соңра Иса оңа: «Әгә бол, муны хич киме айтмагын. Йөне гит-де, рухана гөрүн ве дери кеселинден сапланандыгыңы хеммелере субут эдер ялы, Мусаның буйран садакасыны бер» дийди.

Йүзбашының иманы

⁵ Иса Капернаума гиренде, бир йүзбашы Онуң янына гелип:

⁶ «Агам, мениң хызматкәрим өйде агыр ятыр. Чекйән җебринден яңа гозганып-да биленок» дийип ялбарды.

⁷ Иса оңа: «Мен барып, оны сагалдарын» дийди.

⁸ Йүзбашы Иса шейле җогап берди: «Агам, Сениң өйүме гелмегиңе мен мынасып дәл. Диңе бирҗе сөз айтсаң бес, мениң хызматкәрим сагалар.

⁹ Мен хем буйрук астындакы адамдырын, ыгтыярымда эсгерлерим бар. Бирисине „Гит“ дийсем гидйәр, башгасына „Гел“ дийсем гелйәр. Хызматкәриме „Шуны эт!“ дийсем эдйәр».

¹⁰ Иса бу сөзлери эшидип хайран галды. Ол ызына дүшүп гелйәнлере: «Сизе догрусыны айдярын, Мен хатда Ысрайылда хем шейле иманы бар адамы тапмадым.

¹¹ Сизе шуны-да айдярын: гүндогардан ве гүнбатардан көп адамлар гелип, Ыбрайым, Ысхак, Якуп билен биле Гөгүң Шалыгында бир сачагың башында отурарлар.

¹² Эмма Шалыгың мирасдүшери беллененлер дашары, гараңкылыга ташланар. Ол ерде агы ве диш гыҗама болар» дийди.

¹³ Иса йүзбаша: «Бар, гидибер, гой, саңа иманыңа гөрә болсун!» дийди. Онуң хызматкәри шол сагадың өзүнде сагалды.

Иса көп хассалары сагалдяр

¹⁴ Иса Петрусың өйүне гелди. Ол Петрусың гайыненесини гыззырма тутуп ятаныны гөрди.

¹⁵ Иса аялың элинден тутан бадына, онуң гыззырмасы айрылды. Аял еринден туруп, Иса хызмат этмәге башлады.

¹⁶ Шол гүн агшам Исаның янына арвах-җын эелән адамлары гетирдилер. Ол хем бир сөз билен олардакы эрбет рухлары чыкарды, шейле-де хассаларың хеммесини сагалтды.

¹⁷ Шунлукда, Ишая пыгамбериң үсти билен айдылан шу сөзлер берҗай болды: «Ол бизиң хассалыгымызы Өз үстүне алды, бизиң дертлеримизи чекди».

Исаның ызына эермек

¹⁸ Иса дашына үйшен көпсанлы мәхелләни гөрүп, шәгиртлерине көлүң бейлеки тарапына гечмеги буюрды.

¹⁹ Шонда Төврат мугаллымларың бири гелип: «Мугаллым, Сен нирә гитсең, мен хем Сениң ызыңа дүшҗек» дийди.

²⁰ Иса оңа: «Тилкилериң сүрени, гушларың хөвүртгеси бардыр, йөне Ынсан Оглуның башыны гояра-да ери ёкдур» дийип җогап берди.

²¹ Онуң башга бир шәгирди: «Агам, ругсат эт, өңүрти гидип, какамы җайлайын» дийди.

²² Эмма Иса оңа: «Мениң ызыма дүш, гой, өлүлерини өлүлериң өзлери җайлаберсинлер» дийди.

Иса тупаны ятыряр

²³ Иса гайыга мүненде, шәгиртлери хем Онуң ызына дүшдүлер.

²⁴ Көлде бирденкә гүйчли гай турды ве гайык толкунлара бүрелди. Эмма Иса уклап ятырды.

²⁵ Шәгиртлери Оны оярып: «Агам, бизи халас эт! Биз хеләк болуп барярыс!» дийдилер.

²⁶ Иса олара: «Нәмә горкярсыңыз, эй, иманы азлар?!» дийди. Соңра Ол еринден туруп, еле ве көле кәеди велин, ол ере долы үмсүмлик аралашды.

²⁷ Олар хайран галып: «Бу нәхили Адамка, хатда ел билен көл-де Оңа гулак асяр?» дийишдилер.

Иса арвах-җынлары чыкаряр

²⁸ Иса көлүң бейлеки кенарындакы гадаралыларың юрдуна гелди. Ол ерде Оңа арвах-җын эелән ики саны адам душ гелди. Олар гонамчылыкдан чыкып гелйәрдилер. Оларың җуда вагшыдыклары үчин, ол ерден хич ким гечип билмейәрди.

²⁹ Бирденкә олар: «Эй, Худайың Оглы! Сениң бизиң билен нәме ишиң бар? Бизи вагтындан өң гынамага гелдиңми?» дийип гыгырышып башладылар.

³⁰ Шол вагт олардан узагракда уллакан бир доңуз сүрүси отлап йөрди.

³¹ Арвах-җынлар Иса ялбарып: «Эгер бизи ковуп чыкармакчы болсаң, онда бизи доңуз сүрүсине ибер» дийдилер.

³² Иса олара: «Барың!» дийди. Шейдип, олар адамлардан чыкып, доңузларың ичине гирдилер. Шонда тутуш доңуз сүрүси учутдан ашак зыңып, көлде пайырдашып гарк болды.

³³ Чопанлар гачып, шәхере гитдилер. Олар арвах-җын эелән адамлара нәме боландыгы барадакы вакаларың хеммесини халка гүррүң бердилер.

³⁴ Онсоң шәхериң тутуш илаты Иса билен душушмага гелди. Оны гөренлеринде, өзлериниң шәхеринден гитмегини сорап, Иса ялбардылар.