Matta 5 - Мукаддес Китап

5‑нҗи бап Хакыкы багтыярлык

¹ Иса үйшен мәхелләни гөрүп, дага чыкып отурды. Шәгиртлери Онуң янына гелдилер,

² Иса хем олара өвретмәге башлады:

³ «Рухы гарыплар багтлыдыр, чүнки Гөгүң Шалыгы оларыңкыдыр.

⁴ Гусса чекйәнлер багтлыдыр, чүнки олара гөвүнлик берлер.

⁵ Юмшак адамлар багтлыдыр, чүнки олар ер йүзүни мирас аларлар.

⁶ Догрулыга аҗыгып-сувсанлар багтлыдыр, чүнки олар доюп-ганарлар.

⁷ Рехимлилер багтлыдыр, чүнки олара-да рехим эдилер.

⁸ Калбы пәклер багтлыдыр, чүнки олар Худайы гөрерлер.

⁹ Парахатлык дөредйәнлер багтлыдыр, чүнки олара Худайың огуллары дийлер.

¹⁰ Догрулык үчин ызарланянлар багтлыдыр, чүнки Гөгүң Шалыгы оларыңкыдыр.

¹¹ Мен себәпли адамларың сизе сөген, ызарлан, нәхак ере хер хили гыбатыңызы эден махалы багтлысыңыз!

¹² Шатланың, бегениң, себәби гөклерде алҗак сылагыңыз улудыр. Сизден өң пыгамберлер-де шейдип ызарландылар.

Дуз ве ышык

¹³ Сиз ериң дузусыңыз, эмма дуз тагамыны йитирсе, ол нәме билен дузланар? Дашары зыңлып, аяк астында депеленмекден башга хич зада ярамаз.

¹⁴ Сиз дүнйәниң ышыгысыңыз. Депеде гурлан шәхери гизләп болмаз.

¹⁵ Чыраны якып, габың ашагында гойян дәлдирлер. Оны чыраданың үстүнде гойяндырлар, шонда ол өйдәкилериң хеммесине ышык берйәндир.

¹⁶ Гой, сизиң ышыгыңыз адамларың өңүнде парласын, шонда олар говы ишлериңизи гөрүп, гөкдәки Атаңызы шөхратландырарлар.

Иса Төврат хакында сөз ачяр

¹⁷ Маңа Төврат билен пыгамберлериң язгыларыны бозмага гелендир өйтмәң. Мен бозмага дәл-де, олары амала ашырмага гелдим.

¹⁸ Сизе догрусыны айдярын, асман билен ер өтйәнчә, әхли зат амала ашянча, Төвратдан екеҗе харп-да, бир нокат-да өчмез.

¹⁹ Шонуң үчин хем ким бу буйрукларың иң кичисинден бирини бозса ве шейле этмеги башгалара өвретсе, ол Гөгүң Шалыгында иң кичи сайылар. Эмма ким булары берҗай эдип, башгалара-да өвретсе, ол Гөгүң Шалыгында улы сайылар.

²⁰ Мен сизе шуны айдярын: догрулыгыңыз Төврат мугаллымларыңкы билен фарисейлериңкиден артык болмаса, Гөгүң Шалыгына асла гирмерсиңиз.

Гахар ве хөкүм

²¹ Сиз ата-бабаларымыза: „Адам өлдүрме, ким адам өлдүрсе, хөкүме сезевар болар“ дийленини эшиденсиңиз.

²² Эмма Мен сизе айдярын: өз доганына гахарланан адам хем хөкүме сезевар болар. Ким өз доганына „рака“ дийсе, ёкары меҗлисиң хөкүмине сезевар болар. Хатда хич ким „самсык“ хем диймесин, ёгсам довзах одуна ташланар.

²³ Шонуң үчин гурбанлык сыпасында садака бермәге баряркаң, доганыңың сенден өйке-кинесиниң бардыгы ядыңа дүшсе,

²⁴ садакаңы сыпаның өңүнде гой-да, гидип өңүрти доганың билен яраш. Соңра гелип, садакаңы хөдүр эт.

²⁵ Давагәриң билен энтек ёлдакаң яраш, ёгсам ол сени каза, казы хем зындан сакчысына табшырып, зындана дүшмегиң ахмал.

²⁶ Саңа догрусыны айдярын, җеримәңи долы төлейәнчәң, ол ерден чыкмарсың.

Зынахорлык

²⁷ Сиз: „Зына этме“ дийленини хем эшиденсиңиз.

²⁸ Эмма Мен велин ким башга аяла азгын хөвес билен бакса, өз йүрегинде эййәм онуң билен зына эдендир диййәрин.

²⁹ Саг гөзүң сениң гүнә этмегиңе себәп болса, оны согруп ташла. Бир сынаңың ёк болмагы тутуш гөврәңиң довзаха атылмагындан говудыр.

³⁰ Саг элиң сениң гүнә этмегиңе себәп болса, оны кесип ташла. Бир сынаңың ёк болмагы тутуш гөврәңиң довзаха ташланмагындан говудыр.

Талак

³¹ Шейле хем: „Ким аялыны ковуп гойберсе, оңа талак хатыны берсин“ дийлендир.

³² Эмма Мен сизе диййәрин, аялыны зынадан башга себәп билен айран адам онуң зына этмегине себәп боляндыр. Айрылышан аяла өйленен адам хем зына эдйәндир.

Ант ичмек барада

³³ Сиз ене гадымкылара: „Яландан ант ичме, эмма Реббиң өңүнде ичен антларыңы берҗай эт“ дийленини хем эшиденсиңиз.

³⁴ Мен велин сизе асла ант ичмәң диййәрин. Гөкден ант ичмәң, чүнки гөк Худайың тагтыдыр.

³⁵ Ерден хем ант ичмәң, чүнки ер Онуң аякларының күрсүсидир; Иерусалимден-де ант ичмәң, чүнки ол Бейик Патышаның шәхеридир.

³⁶ Өз башыңыздан хем ант ичмәң, себәби сиз онуң еке гылыны-да ак я гара эдип билйән дәлсиңиз.

³⁷ Сизиң „хаваңыз“ хава, „ёгуңыз“ ёк болсун. Мундан артыгы шейтандандыр.

Гөзе – гөз, дише – диш

³⁸ Сиз: „Гөз орнуна гөз, диш орнуна диш“ дийленини эшиденсиңиз.

³⁹ Эмма Мен сизе диййәрин: ярамаз адама гаршы дурма. Сениң саг яңагыңа урана, бейлеки яңагыңы-да тут.

⁴⁰ Сениң билен давалашып, көйнегиңи алҗак боляна донуңы-да бер.

⁴¹ Ким сени өзи билен бир мензил ёл йөремәге меҗбур этсе, сен онуң билен ики мензил ёл йөре.

⁴² Дилег салана бер, карз дилейәнден йүзүңи өвүрме.

Душманларыңызы сөйүң

⁴³ Сиз: „Якыныңы сөй, душманыңы йигрен“ дийленини хем эшиденсиңиз.

⁴⁴ Эмма Мен сизе диййәрин: душманларыңызы сөйүң, өзүңизи ызарлаянлар үчин дога-дилег эдиң.

⁴⁵ Шонда сиз гөкдәки Атаңызың огулларыдыгыңызы субут эдерсиңиз. Гөкдәки Атаңыз Өз гүнешини яманларың хем, ягшыларың хем үстүне догдуряр, ягмырыны догруларың хем, эгрилериң хем үстүне ягдыряр.

⁴⁶ Сиз өзүңизи сөййәнлери сөййән болсаңыз, онда нәме сылаг аларсыңыз? Салгыт йыгнаянлар-да шейле этмейәрми нәме?

⁴⁷ Диңе өз достларыңыза салам берйән болсаңыз, онда нәме артыкмач иш эдйәрсиңиз? Бутпаразлар-да шейле этмейәрми нәме?

⁴⁸ Шейлеликде, гөкдәки Атаңызың кәмил болшы ялы, сиз хем кәмил болуң».