Matta 3 - Мукаддес Китап

3‑нҗи бап Яхя чүмдүриҗиниң вагзы

¹ Шол гүнлерде Яхя чүмдүриҗи пейда болуп, Яхудыя чөлүнде вагыз этмәге башлады.

² Ол: «Тоба эдиң, себәби Гөгүң Шалыгы голайлады» диййәрди.

³ Ине, Ишая пыгамбериң ол хакында: «Чөлде бир сес гыгыряр: „Реббе ёл тайынлаң! Онуң ёдаларыны дүзләң!“ диййәр» дийип айдан шол адамы Яхядыр.

⁴ Яхяның дүе йүңүнден эшиклери, билинде гайышдан гушагы барды. Онуң иймити чекиртге билен мейдан балыды.

⁵ Тутуш Иерусалимиң, Яхудыяның ве Иордан этрабының әхли халкы онуң янына гелйәрди.

⁶ Олар гүнәлери үчин тоба эдип, Яхя тарапындан Иордан дерясында чүмдүрилйәрдилер.

⁷ Яхя фарисейлериң ве саддукейлериң энчемесиниң чүмдүрилмек үчин өз янына гелйәндиклерини гөренде, олара шейле дийди: «Эй, алахөвренлер несли! Гелҗек газапдан гачып гутулып билерис өйдйәңизми?

⁸ Мундан бейләк эден тобаңыза мынасып миве бериң.

⁹ Өз-өзүңизе: „Бизиң атамыз Ыбрайымдыр“ дийип ойламаң. Мен сизе шуны айдайын: Худай Ыбрайым үчин шу дашлардан хем перзент ярадып билйәндир!

¹⁰ Ине, палта эййәм агачларың дүйбүнде ятыр: оңат миве бермейән хер бир агач чапылып, ода ташланар.

¹¹ Тоба эдендигиңизиң нышаны хөкмүнде мен сизи сува чүмдүрйәрин, эмма менден соңра Гелҗек менден хас гүйчлүдир. Мен Онуң чарыкларыны гөтермәге-де мынасып дәлдирин. Ол сизи Мукаддес Руха хем-де ода чүмдүрер.

¹² Онуң харман совурян чаршагы элиндедир. Ол харман ерини сүпүрип, бугдайыны аммара үйшүрер, саманы болса сөнмез отда якар».

Иса сува чүмдүрилйәр

¹³ Онсоң Иса Яхя тарапындан чүмдүрилмек үчин Җелиледен Иордана, Яхяның янына гелди.

¹⁴ Эмма Яхя Оны саклап: «Сен мени чүмдүрмели велин, Сениң Өзүң мениң яныма гелйәрсиңми?» дийди.

¹⁵ Иса оңа: «Гой, хәзир шейле болсун, себәби бизе Худайың ислегини берҗай этмек ярашяндыр» дийип җогап берди.

¹⁶ Иса сува чүмдүрилип чыкан бадына гөклер ачылды. Ол Худайың Рухуның кепдери гөрнүшде Өз үстүне инип гелйәнини гөрди.

¹⁷ Шол вагт гөкден: «Бу Мениң сөвер Оглумдыр, Мен Ондан көп разыдырын» диен оваз гелди.