Matta 28 - Мукаддес Китап

28‑нҗи бап Иса дирелйәр

¹ Сабат гүни геченден соң, хепдәниң биринҗи гүни ир сәхер билен магдалалы Меръем ве бейлеки Меръем мазары гөрмәге гитдилер.

² Бирденкә гүйчли ер титреди. Реббиң бир перишдеси гөкден инип, дашы бир чете тогалады-да, онуң үстүнде отурды.

³ Онуң гөрнүши йылдырым ялы өвшүн атярды, эгинбашы гар ялы акды.

⁴ Сакчылар горкуларындан яңа сандырашып, өли кимин ере язылдылар.

⁵ Перишде аяллара: «Горкмаң! Мен сизиң хача чүйленен Исаны гөзлейәндигиңизи билйәрин.

⁶ Ол бу ерде ёк. Ол Өз айдышы ялы дирелди. Бәри гелиң-де, Онуң ятан ерини гөрүң.

⁷ Инди чалт гидип, Онуң шәгиртлерине: „Иса дирелипдир, Ол сизден өң Җелилә баряр. Сиз Оны шол ерде гөрерсиңиз“ дийиң. Гулак асың, мен сизе муны айдандырын» дийди.

⁸ Аяллар горкы хем шатлык билен ховлугышып, мазардан узаклашдылар. Олар ылгашып, Исаның шәгиртлерине хабар бермәге гитдилер.

⁹ Бирденкә олара Иса душуп: «Салам!» дийди. Олар хем Онуң янына гелип, аягына йыкылып, Оңа сежде этдилер.

¹⁰ Онсоң Иса олара: «Горкмаң! Барың, доганларыма айдың, Җелилә гитсинлер. Мени шол ерде гөрерлер» дийди.

Сакчыларың гетирен хабары

¹¹ Аяллар хениз ёлдакалар, сакчыларың бирнәчеси шәхере барып, болан әхли затлары ёлбашчы руханылара хабар бердилер.

¹² Олар яшулулар билен йыгнанышып, маслахат гечиренлеринден соң, эсгерлере көп пул берип:

¹³ «Сиз халка: „Биз гиҗе ятыркак, шәгиртлери гелип, Онуң җеседини огурлап гидипдирлер“ дийиң.

¹⁴ Бу хабар хәкимиң гулагына барып етсе, оны ынандырып, биз сизи алададан дындарарыс» дийдилер.

¹⁵ Гаравуллар пулы алып, өзлерине буйрулышы ялы этдилер. Бу гүррүң яхудыларың арасында шу гүне ченли хем довам эдип гелйәр.

Иң соңкы табшырык

¹⁶ Шунлук билен, он бир шәгирт Җелилә, Исаның айдан дагына гитди.

¹⁷ Исаны гөрүп, Оңа сежде этдилер, эмма оларың кәбири шүбхеленди.

¹⁸ Иса хем оларың янына гелип: «Гөкде ве ерде әхли ыгтыярлык Маңа берилди.

¹⁹ Шонуң үчин хем гидиң-де, әхли миллетлери шәгирт эдиң, олары Ата, Огул ве Мукаддес Рухуң адындан сува чүмдүриң.

²⁰ Сизе буйран әхли затларымы берҗай этмеги олара өвредиң. Мен хемише, тә дүнйәниң ахырына ченли сизиң билен боларын» дийди.