Matta 27 - Мукаддес Китап

27‑нҗи бап Юдас өзүни асяр

¹ Ир сәхер билен әхли ёлбашчы руханылардыр халкың яшулулары Иса өлүм җезасыны бермек барада маслахат гечирдилер.

² Оны даңып, хәким Пилата элтип табшырдылар.

³ Онсоң Иса хайынлык эден Юдас Оңа хөкүм эдиленини гөрүп, эден ишине өкүнди. Ол отуз теңңе күмши ызына, ёлбашчы руханылар билен яшулулара гетирип:

⁴ «Мен бигүнә кишә хайынлык эдип, гүнә газандым» дийди. Олар-да: «Бизе нәме, муңа өзүң җогап берйәң» дийдилер.

⁵ Юдас күмүшлери ыбадатхананың ичине зыңды-да, чыкып гайтды. Соңра гидип, өзүни асды.

⁶ Ёлбашчы руханылар болса күмүшлери алып: «Бу пуллары ыбадатхананың хазынасында гоймак кануна догры гелмейәр, себәби булар ган нырхыдыр» дийдилер.

⁷ Шейлеликде, маслахат гечирип, гелмишеклере гонамчылык этмек үчин, бу пула күйзегәриң ерини сатын алдылар.

⁸ Шонуң үчин ол ере шу гүне ченли «Ган мейданчасы» дийилйәр.

^9-10 Шонда Ермея пыгамбер аркалы айдылан шу сөз берҗай болды: «Реббиң маңа буйрушы ялы, ысрайыл халкының Оңа кесен нырхыны – отуз күмүш теңңесини алып, күйзегәриң ерини сатын алдылар».

Иса Пилатың өңүнде

¹¹ Исаны хәкимиң хузурына гетирдилер. Хәким Ондан: «Сен яхудыларың патышасымы?» дийип сорады. Иса хем: «Айдышың ялыдыр» дийди.

¹² Ёлбашчы руханылар билен яшулулар Оны айыпланларында, Ол хич хили җогап бермеди.

¹³ Онсоң Пилат Ондан: «Сениң гаршыңа берилйән мунча шаятлыклары эшитмейәрсиңми?» дийип сорады.

¹⁴ Иса онуң екеҗе сорагына хем җогап бермеди. Хәким муңа гаты гең галды.

¹⁵ Хер Песах байрамында хәким халкың хайышы билен бир туссагы бошатмагы адат эдинипди.

¹⁶ Шол вагтлар Ешува Бараббас диен ады белли бири туссаглыкда ятырды.

¹⁷ Шейлеликде, халк йыгнанышанда Пилат олардан: «Сизиң үчин кими бошатмагымы ислейәрсиңиз? Ешува Бараббасымы я-да Месих дийилйән Исаны?» дийип сорады.

¹⁸ Ол ёлбашчы руханылар билен яшулуларың Исаны гөрипчиликден табшырандыкларыны билйәрди.

¹⁹ Пилат хөкүм күрсүсинде отырка, аялы оңа: «Ол догры адам билен ишиң болмасын, себәби мен гечен гиҗе дүйшүмде Ол зерарлы көп азаплар чекдим» дийип, хабар ёллапды.

²⁰ Эмма ёлбашчы руханылар билен яшулулар Исаның дерегине Бараббасы бошатмагыны талап эдиң дийип, халкы күшгүрдилер.

²¹ Хәким олара йүзленип: «Сиз бу икисинден мениң хайсыны бошатмагымы ислейәрсиңиз?» дийип сорады. Олар хем: «Бараббасы» дийип җогап бердилер.

²² Пилат олара: «Онда мен Месих дийилйән Исаны нәме эдейин?» дийип сорады. Оларың хеммеси бирагыздан: «Ол хача чүйленсин!» дийдилер.

²³ Пилат: «Нәме үчин? Ол нәме яманлык этди?» дийип сорады. Эмма олар: «Оны хача чүйле!» дийип, хас бетер гыгырышдылар.

²⁴ Пилат өз элинден хич зат гелмейәндигини ве галмагалың болса барха артяндыгыны гөренсоң, элине сув алды-да, мәхелләниң өңүнде элини ювуп: «Бу адамың ганының дөкүлмегинде мен языксыз. Муңа сиз җогапкәрсиңиз!» дийди.

²⁵ Әхли халк: «Онуң ганына биз ве чагаларымыз җогапкәр!» дийип җогап берди.

²⁶ Шонда Пилат Бараббасы бошатды, Исаны болса гамчыладып, хача чүйлемек үчин, эсгерлериң элине берди.

Эсгерлер Исаны масгаралаяр

²⁷ Соңра хәкимиң эсгерлери Исаны хөкүмет сарайына элтип, тутуш гошун топарларыны Онуң дашына үйшүрдилер.

²⁸ Эгин-эшигини чыкарып, эгнине гызыл дон гейдирдилер.

²⁹ Тикенден тәч өрүп, башына гейдирдилер-де, саг элине таяк тутдурдылар. Өңүнде дыза чөкүп: «Яшасын яхудыларың патышасы!» дийип, Оны масгараладылар.

³⁰ Онуң үстүне түйкүрдилер, таяклап, башына урдулар.

³¹ Оны масгараланларындан соң, доны эгнинден чыкардылар-да, Өз эгин-эшигини гейдирип, хача чүйлемәге алып гитдилер.

Иса хача чүйленйәр

³² Ёлда баряркалар, киринейли Симун атлы бир адама саташдылар. Олар бу адама Исаның хачыны гөтермәге меҗбур этдилер.

³³ Олар Голгота (бу «Келлечанак депеси» диймеги аңладяр) диен ере гелдилер.

³⁴ Шонда Оңа ичирҗек болуп, өт гарылан шерап бердилер, эмма Иса даданындан соң, оны ичмекден йүз өвүрди.

³⁵ Оны хача чүйләнлеринден соң, биҗе атышып эгин-эшигини өзара пайлашдылар.

³⁶ Соңра ол ерде отурып, Оңа гаравуллык этдилер.

³⁷ Депесинде болса: «БУ ЯХУДЫЛАРЫҢ ПАТЫШАСЫ ИСАДЫР» диен этмиш язгысыны асдылар.

³⁸ Онуң билен биле ики гаракчы хем хача чүйленди. Оларың бири Исаның саг тарапында, бейлекиси чеп тарапындады.

³⁹ Гечип барянлар башларыны яйкап, Исаны яңсылаярдылар.

⁴⁰ Олар: «Ханы, Сен ыбадатхананы йыкып, үч гүнде салҗакдың-а. Эгер Худайың Оглы болсаң, хачдан ашак дүш-де, Өзүңи халас эт-дә!» диййәрдилер.

⁴¹ Ёлбашчы руханылар, Төврат мугаллымлары, яшулулар хем Исаны хут шунуң ялы масгаралап, бири-бирлерине:

⁴² «Өзгелери халас этди, эмма Өзүни халас эдип биленок. Өзем Ысрайылың Патышасымыш! Онда, гой, Ол хәзириң өзүнде хачдан ашак дүшсүн, биз хем Оңа иман эдели.

⁴³ Ол Худая сыгынярды. Эгер Худай халаян болса, гой, хәзириң өзүнде Оны халас этсин. Ханы, Ол: „Мен Худайың Оглудырын“ диййәр-дә» дийишйәрдилер.

⁴⁴ Шейле хем, Иса билен биле хача чүйленен гаракчылар-да Оңа сөгйәрдилер.

Исаның өлүми

⁴⁵ Гүнортан он икиден өйлән сагат үче ченли тутуш юрды гараңкылык гаплап алды.

⁴⁶ Өйлән сагат үч төвереги Иса гаты сес билен гыгырып: «Элохи, Элохи! Лема сабактани?» ягны: «Худайым, Худайым! Нәме үчин Мени терк этдиң?» дийди.

⁴⁷ Ол ерде дуранларың кәбирлери муны эшиденлеринде: «Ол Ылясы чагыряр» дийишдилер.

⁴⁸ Бир адам ылгап барып, бир эсгини сиркә батырды. Оны бир таягың уҗуна дакды-да, ичирҗек болуп, Иса узатды.

⁴⁹ Бейлекилер-де: «Ханы, гөрелиң! Ыляс гелип, Оны халас эдермикә?» дийишдилер.

⁵⁰ Иса ене-де гаты сес билен гыгырып, җан берди.

⁵¹ Шол вагт ыбадатхананың тутусы ёкардан ашаклыгына йыртылып, икә бөлүнди, ер титрәп, дашлар ярылды.

⁵² Мазарлар ачылып, өлен энчеме мукаддес адамларың җеседи дирелди.

⁵³ Олар мазарлардан чыкып, Иса диреленден соң, мукаддес шәхере барып, көплере гөрүндилер.

⁵⁴ Иса гаравуллык эдип дуран йүзбашы билен янындакы эсгерлер ер титремәни, болан бейлеки затлары гөренлеринде, горка дүшүп: «Хакыкатдан-да, бу Худайың Оглы экен!» дийдилер.

⁵⁵ Ол ерде узакдан середишип дуран көп аяллар хем барды. Олар Җелиледен Исаның ызына дүшүп геленлерди ве Оңа хызмат эденлерди.

⁵⁶ Оларың арасында магдалалы Меръем, Якуп билен Ёсәниң эҗеси Меръем барды, шейле-де Зебедейиң огулларының эҗеси хем барды.

Иса җайланяр

⁵⁷ Агшам дүшен вагты Юсуп атлы ариматиялы бир бай адам гелди. Ол хем Исаның шәгиртлеринденди.

⁵⁸ Ол Пилатың янына барып, Исаның җеседини диледи. Шонда Пилат җеседиң оңа берилмегини буюрды.

^59-60 Юсуп җеседи алып, Оны тәмиз кепене долап, гаяда өзи үчин ойдурып ясадан тәзе мазарында җайлады. Онсоң мазарың агзына бир даш тогалап гетирип гойды-да, ол ерден гитди.

⁶¹ Магдалалы Меръем билен бейлеки Меръем хем шол ерде мазарың гаршысында отырдылар.

⁶² Эртеси, ягны Тайярлык гүнүниң эртеси ёлбашчы руханылар билен фарисейлер Пилатың янына йыгнанышып:

⁶³ «Җенап, ол яланчының энтек дирикә: „Мен үч гүнден соң дирелерин“ диени бизиң ядымызда.

⁶⁴ Шонуң үчин үч гүнләп мазарың гораг астында сакланмагыны буюр, шәгиртлери гиҗе гелип, җеседи огурлап, халка болса: „Ол дирелди“ дийәймесинлер. Бу соңкы ялан өңкүден-де бетер болар» дийдилер.

⁶⁵ Пилат олара: «Яныңыза эсгерлер алып, гидиң-де, мазары өз билшиңиз ялы гораг астында сакладың» дийди.

⁶⁶ Олар хем эсгерлер билен гидип, мазарың агзындакы дашы мөхүрледилер-де, гаравул гоюп, мазары гораг астында саклатдылар.