Matta 26 - Мукаддес Китап

26-нҗы бап Исаны өлдүрмек барада дилдүвшүк

¹ Иса әхли сөзүни тамамлап, шәгиртлерине:

² «Билшиңиз ялы, ене ики гүнден Песах байрамыдыр. Онсоң Ынсан Оглы хача чүйленмәге табшырылар» дийди.

³ Шол вагт ёлбашчы руханылар билен халкың яшулулары Каяфа атлы баш руханының ховлусына йыгнанып,

⁴ Исаны хиле билен тутуп өлдүрмек барада маслахат гечирдилер.

⁵ Олар: «Байрам гүнлеринде тутмалың, халк галмагал турзаймасын» дийишдилер.

Бир аял ягы Исаның башына гуйяр

⁶ Иса Бейтанияда дери кеселли Симуның өйүнде сачак башында отырка,

⁷ бир аял чүйшеде гымматбаха атыр ягыны алып, Онуң янына гелди ве оны Исаның башына гуйды.

⁸ Шәгиртлер муны гөренлеринде, гахарланып: «Нәме үчин бу яг бейле исрип эдилди?

⁹ Бу ягы көп пула сатып, гарыплара пайлап боларды ахырын» дийишдилер.

¹⁰ Иса муны билип, олара шейле дийди: «Нәме үчин аялы ынҗадярсыңыз? Ол Мениң үчин аҗайып иш этди.

¹¹ Гарыплар хемише сизиң яныңыздадыр, эмма Мен хемише яныңызда болмарын.

¹² Ол бу ягы Мениң беденими җайламага тайяр этмек үчин гуйды.

¹³ Сизе догрусыны айдярын, бу Хош Хабар дүнйәниң ниресинде вагыз эдилсе, бу аялың эдени-де шол ерде ятланар».

Юдасың хайынлыгы

¹⁴ Соңра Онкилерден Юдас Искариот диен бири ёлбашчы руханыларың янына гитди.

¹⁵ Юдас олардан: «Эгер мен Исаны сизиң элиңизе табшырсам, маңа нәме берерсиңиз?» дийип сорады. Олар хем Юдас отуз теңңе күмүш чекип бердилер.

¹⁶ Юдас шондан соң Исаны олара табшырмак үчин аматлы пурсат пейләп гезди.

Песах нахары

¹⁷ Петир байрамының илкинҗи гүни шәгиртлер Исаның янына гелип: «Сениң үчин Песах нахарыны ниреде тайярламагымызы ислейәрсиң?» дийип сорадылар.

¹⁸ Иса олара: «Шәхере гидиң-де, шу айдан кишимиң өйүне барың. Оңа: „Мугаллымымыз саңа: ‘Вагтым голайлады, Песах байрамыны шәгиртлерим билен билеликде сениң өйүңде беллеҗек диййәр’“ дийиң» дийди.

¹⁹ Шәгиртлер хем Исаның өзлерине буйрушы ялы эдип, Песах нахарыны тайярладылар.

²⁰ Агшам Иса он ики шәгирди билен билеликде сачак башына гечди.

²¹ Олар нахарланып отыркалар, Иса: «Сизе догрусыны айдярын: сизиң бириңиз Маңа хайынлык эдерсиңиз» дийди.

²² Олар гаты тукатланып, ызлы-ызына Ондан: «Агам, мен бир дәлми?» дийип сорамага башладылар.

²³ Иса хем олара: «Элини Мениң билен бир окара батыран Маңа хайынлык эдер.

²⁴ Ынсан Оглы Өзи хакда язылышы ялы җан берер, эмма Ынсан Оглуна хайынлык эдениң халына вай! Ол адам энеден догулмадык болса, онуң үчин хас оңат боларды» дийип җогап берди.

²⁵ Оңа хайынлык эден Юдас: «Мугаллым, мен бир дәлмикәм?» дийип сорады. Иса хем оңа: «Өзүң айтдың» дийди.

²⁶ Нахарланып отыркалар, Иса элине чөрек алып шүкүр этди ве оны дөвүп, шәгиртлерине берди-де: «Алың, ийиң, бу Мениң беденимдир» дийди.

²⁷ Онсоң шераплы кәсәни алып, шүкүр эденинден соң шәгиртлерине берип: «Шундан хеммәңиз ичиң.

²⁸ Бу көп адамларың гүнәлериниң багышланмагы үчин дөкүлйән ганым аркалы багланышылян әхтдир.

²⁹ Сизе шуны айдайын: Атамың Шалыгында сизиң билен биле тәзесини ичҗек гүнүме ченли шерабы гайтадан ичмерин» дийди.

³⁰ Олар Худая өвги сеналарыны айданларындан соң, Зейтун дагына чыкдылар.

Иса Петрусың инкәр этҗекдигини айдяр

³¹ Соңра Иса шәгиртлерине: «Сизиң хеммәңиз шу гиҗәниң өзүнде Менден эл чекерсиңиз, себәби „Чопаны урарын, гоюнлар даргап гидер“ дийип язылгыдыр.

³² Эмма Мен диреленимден соң, сизден өң Җелилә барарын» дийди.

³³ Петрус Оңа: «Хеммелер Сенден йүз өвүрсе-де, мен асла йүз өвүрмерин» дийди.

³⁴ Иса оңа: «Саңа догрусыны айдярын, шу гиҗе хораз гыгырмаздан өң, сен Мени үч гезек инкәр эдерсиң» дийди.

³⁵ Эмма Петрус Оңа: «Мен Сениң билен өлмели болсам-да, Сени асла инкәр этмерин!» дийди. Шәгиртлериң хеммеси-де шейле дийдилер.

Гетсемани багында

³⁶ Соңра Иса шәгиртлери билен Гетсемани диен ере гитди. Иса олара: «Сиз бу ерде гарашың, Мен хол ере гидип, Худая дога этҗек» дийди.

³⁷ Иса Петрусы, Зебедейиң огуллары Якуп билен Ёханнаны янына алды. Ол тукатланып, гайгыланмага башлады.

³⁸ Иса олара: «Мениң җаным өлер ялы тукат. Сиз бу ерде галың ве оя болуң» дийди.

³⁹ Иса бираз өңе йөреди-де, ере йүзин дүшүп: «Эй, Атам! Мүмкин болса, бу хасрат кәсесини Менден сова гечсин, йөне Мениң ислегим дәл, Сениң ислегиң амала ашсын!» дийип, дилег этди.

⁴⁰ Иса гайдып геленде, шәгиртлери уклап ятан экенлер. Иса Петруса: «Мениң билен биле бир сагат-да оя болуп билмедиңизми?

⁴¹ Оя болуң, сынага дүшмез ялы дилег эдиң. Рух гайратлыдыр, йөне беден эҗиздир» дийди.

⁴² Иса икинҗи гезек гидип, дилег этди: «Эй, Атам, Мен ичмесем, бу кәсәниң гечмеги мүмкин дәл болса, онда Сениң ислегиң болсун!»

⁴³ Ызына гайдып геленде, шәгиртлери ене уклап ятан экенлер, себәби оларың гөзлери бүрлүп дурды.

⁴⁴ Иса олары гоюп, ене гитди, ене шол өңки сөзлер билен үчүнҗи гезек дилег этди.

⁴⁵ Онсоң шәгиртлериң янына гайдып гелип: «Сиз хенизем уклап ятырсыңызмы? Дынҗыңызы алярсыңызмы? Ине, пурсат голайлады, Ынсан Оглы гүнәкәрлериң элине берилйәр.

⁴⁶ Туруң, гиделиң. Анха, Маңа хайынлык эден голайлады» дийди.

Иса тутуляр

⁴⁷ Иса хениз гепләп дурка, Онкилериң бири болан Юдас пейда болды. Онуң янында ёлбашчы руханылар билен яшулулар тарапындан иберилен гылычлы, таяклы бир мәхелле барды.

⁴⁸ Иса хайынлык эден Юдас олар билен: «Мен кими өпсем, Иса Шолдур» дийип геплешипди.

⁴⁹ Ол геле-гелмәне Исаның янына барды-да: «Салам, Мугаллым!» дийип, Оны өпди.

⁵⁰ Иса хем оңа: «Достум, ханы, нәме этҗек болсаң эт» дийди. Эдил шол вагт адамлар Исаны тутуп, эле салдылар.

⁵¹ Исаның янындакыларың бири гылыҗыны сырып, баш руханының хызматкәрини уруп, онуң гулагыны кесди.

⁵² Шонда Иса оңа шейле дийди: «Гылыҗыңы гынына сал, гылыч чекенлериң хеммеси гылычдан өлер.

⁵³ Нәме Мен Атамдан көмек сорап, йүз тутуп билмез өйдйәрсиңми? Ислесем, Ол шу пурсадың өзүнде Маңа он ики гошун перишдеден-де көп перишделери иберер.

⁵⁴ Эмма бейтсем, Мукаддес Язгылар нәхили берҗай болар? Буларың әхлисиниң амала ашмагы герек ахыры!»

⁵⁵ Шол вагт Иса мәхеллә йүзленип: «Нәме үчин бир гозгалаңчының гаршысына чыкан ялы, Мени тутмак үчин гылычлы хем таяклы гелипсиңиз? Хер гүн ыбадатханада отурып, адамлара өвредйәрдим, шонда Мени тутмандыңыз.

⁵⁶ Йөне буларың әхлиси пыгамберлериң язгыларының берҗай болмагы үчин болды» дийди. Шонда шәгиртлериң хеммеси Исаны ташлап гачып гитдилер.

Иса меҗлисиң өңүнде

⁵⁷ Исаны тутанлар Оны баш руханы Каяфаның янына гетирдилер, Төврат мугаллымлары билен яшулулар-да шол ере йыгнаныпдылар.

⁵⁸ Петрус болса баш руханының ховлусына ченли гара гөрнүмден Исаның ызына дүшүп гитди. Ол ичери гирди-де, ишиң соңуны гөрҗек болуп, сакчылар билен биле отурды.

⁵⁹ Ёлбашчы руханылар ве тутуш меҗлис Иса өлүм җезасыны бермек үчин, Оңа гаршы галп субутнамалар агтардылар.

⁶⁰ Көп яланчы шаятлар гелди, эмма Оңа гаршы хич зат тапып билмедилер. Ахырсоңы ики саны яланчы шаят гелип:

⁶¹ «Бу адам: „Мен Худайың ыбадатханасыны йыкып, оны үч гүнде тәзеден салып билерин“ дийди» дийип хабар берди.

⁶² Баш руханы орнундан туруп: «Сен асла җогап берҗек дәлми? Бу адамларың Сениң гаршыңа берйән шаятлыгы нәме?» дийди.

⁶³ Эмма Иса дымды. Баш руханы Оңа: «Саңа дири Худайдан касам эдйәрин, бизе айт, Худайың Оглы – Месих Сенми?» дийди.

⁶⁴ Иса оңа: «Хава, Сениң айдышың ялыдыр» дийип җогап берди. Соңра сөзүни довам эдип: «Сизе ене шуны айдайын, мундан соң сиз Ынсан Оглуның Гудратыгүйчлиниң сагында отураныны ве гөгүң булутларында гелйәнини гөрерсиңиз!» дийди.

⁶⁵ Шонда баш руханы якасыны йыртып: «Ол Худая дил етирди, бизе башга шаятлык нәмә герек? Онуң Худая дил етиренини өзүңиз эшитдиңиз ахырын.

⁶⁶ Нәме карара гелйәрсиңиз?» дийди. Олар: «Ол өлүме мынасып!» дийип җогап бердилер.

⁶⁷ Онсоң Исаның йүзүне түйкүрдилер, Оны юмрукладылар, кәбирлери Оңа:

⁶⁸ «Эй, Месих, бизе велилик эт, Сени уран ким?» дийип, Оны шапбатладылар.

Петрус Исаны инкәр эдйәр

⁶⁹ Петрус болса дашарда, ховлуда отырды. Бир кениз онуң янына гелип: «Сен хем җелилели Иса билен биледиң» дийди.

⁷⁰ Эмма Петрус муны хеммелериң өңүнде инкәр эдип: «Мен сениң нәме диййәниңи билмейәрин» дийди.

⁷¹ Соңра ол ховлының өң тарапына чыкды. Оны башга бир кениз гөрүп, ол ерде дуранлара: «Бу адам насыралы Иса билен биледи» дийди.

⁷² Петрус ене-де инкәр эдип: «Мен ол адамы танамок» дийип ант ичди.

⁷³ Аз салымдан ол ерде дуранлар Петруса ене-де: «Хакыкатдан-да, сенем шоларың бири, себәби сениң геплейшиң муны билдирип дур» дийдилер.

⁷⁴ Шонда Петрус ант ичип: «Худай урсун! Мен ол адамы танамок» дийди. Эдил шол вагт хораз гыгырды.

⁷⁵ Петрус Исаның: «Хораз гыгырмаздан өң, сен Мени үч гезек инкәр эдерсиң» диен сөзүни ятлады ве дашары чыкып, мөңңүрип аглады.