Matta 25 - Мукаддес Китап

25‑нҗи бап Он гыз тымсалы

¹ «Шонда Гөгүң Шалыгыны чыраларыны алып, гиеви гаршыламага чыкан он гыза меңзетсе болар.

² Оларың бәшиси акыллы, бәшиси акылсыз экен.

³ Акылсызлар чыраларыны алярлар, эмма яг алмаярлар.

⁴ Акыллылар болса чыралары билен бирликде гапларда яг хем алярлар.

⁵ Гиев гиҗә галанда, хеммесини укы басмарлаяр ве олар уклаярлар.

⁶ Яры гиҗе: „Анха, гиев гелйәр, гаршыламага чыкың!“ диен батлы сес эшидилйәр.

⁷ Шонда яңкы гызларың хеммеси оянып, чыраларының ягыны дүзетмәге башлаярлар.

⁸ Акылсызлар акыллылара: „Чыраларымыз сөнүп баряр, бизе ягыңыздан бираз берәйиң“ диййәрлер.

⁹ Эмма акыллылар: „Ёк! Бизе-де, сизе-де етмән дурмасын. Говусы, гидиң-де, сатыҗылардан өзүңизе яг сатын алың“ диййәрлер.

¹⁰ Олар яг сатын алмага гиден вагты гиев гелйәр. Тайяр дуран гызлар онуң билен биле тойхана гиренлеринден, гапы япыляр.

¹¹ Бир салымдан бейлеки гызлар хем гелип: „Ага! А-хов, ага! Гапыны ачай-да, биз гелдик“ диййәрлер.

¹² Эмма гиев: „Сизе догрусыны айдярын, мен сизи асла танамок“ дийип җогап берйәр.

¹³ Шонуң үчин хем оя болуң, себәби сиз Ынсан Оглуның гелҗек анык гүнүни ве сагадыны билмейәрсиңиз.

Үч хызматкәр хакындакы тымсал

¹⁴ Гөгүң Шалыгы шунуң ялыдыр: бир адам узак ёла гитмекчи болуп, хызматкәрлерини янына чагырып, мал-мүлкүни олара табшыряр.

¹⁵ Бу адам оларың херсиниң башарныгына лайык: бирине – бәш, бейлекисине – ики, башга бирине бир чувал алтын-күмүш берип, ёла рована боляр.

¹⁶ Бәш чувал алан гидип, бу пул билен сөвда этмәге гиришип, ене бәш чувал пул газаняр.

¹⁷ Ики чувал алан-да шонуң ялы эдип, ене ики чувал пул газаняр.

¹⁸ Бир чувал алан болса гидип, чукур газяр-да, хоҗайының берен пулуны гөмүп гизлейәр.

¹⁹ Көп вагтдан соң бу хызматкәрлериң хоҗайыны гелип, олардан хасабат сораяр.

²⁰ Бәш чувал алан хызматкәр гелип, өңки пулуң үстүне ене бәш чувал гетирйәр. Ол: „Хоҗайын! Сен маңа бәш чувал алтын-күмүш ынаныпдың, ине, мен ондан ене бәш чувал газандым“ диййәр.

²¹ Хоҗайыны оңа: „Берекелла, ягшы хем садык хызматкәр! Сен кичиҗик ишде садык боланың үчин, инди бейик ишлери саңа ынанарын. Гел, хоҗайының шатлыгына шәрик бол!“ диййәр.

²² Ики чувал алан хем гелип: „Хоҗайын! Сен маңа ики чувал алтын-күмүш берипдиң, ине, мен ондан ене ики чувал газандым“ диййәр.

²³ Хоҗайыны оңа: „Берекелла, ягшы ве садык хызматкәр! Сен кичиҗик ишде садыклыгыңы гөркездиң, инди мен сени бейик ишлериң башына гечирерин. Гел, хоҗайының шатлыгына шәрик бол!“ диййәр.

²⁴ Бир чувал алан хем гелип: „Хоҗайын, мен сениң гаты өздиенли адамдыгыңы билйәрдим. Сен экмедик ериңден орярсың, сепмедик ериңден йыгярсың.

²⁵ Шонуң үчин мен горкдум, гидип, берен бир чувал пулуңы ере гөмүп гизледим, ине, пулуңы ал!“ диййәр.

²⁶ Хоҗайыны оңа шейле диййәр: „Эй, эрбет хем ялта хызматкәр! Сен мениң экмедик еримден оряндыгымы, сепмедик еримден йыгяндыгымы билйәрмидиң?

²⁷ Онда пулумы ишевүрлере бермели экениң-дә, мен хем гелип, оны пейдасы билен алардым.

²⁸ Инди оңа берен бир чувалымы алың-да, он чувалла бериң.

²⁹ Кимде бар болса, оңа ене берлер, ондакы бол болар, эмма кимде ёк болса, онуң элиндәки хем алнар.

³⁰ Пейдасыз хызматкәри дашары, гараңкылыга ташлаң. Ол ерде агы ве диш гыҗама болар“.

Кыямат гүни

³¹ Ынсан Оглы Өз шан-шөхратына бесленип, әхли перишделери билен гелер-де, шөхратлы тагтында отурар.

³² Әхли миллетлер Онуң хузурына йыгнанарлар, чопаның гоюнлары гечилерден сайлайшы ялы, Ол хем олары бири-биринден сайлар.

³³ Гоюнлары сагында, гечилери хем солунда гояр.

³⁴ Онсоң Патыша сагындакылара шейле диер: „Эй, Атамың ялканлары! Гелиң-де, дүнйә ярадыландан бәри сизиң үчин тайярланан патышалыгы мирас алың.

³⁵ Себәби Мен ачдым – нан бердиңиз, тешнедим – сув бердиңиз, кесекидим – мыхман алдыңыз,

³⁶ ялаңачдым – дон бердиңиз, хассадым – беҗердиңиз, зындандадым – гөрмәге гелдиңиз“.

³⁷ Шонда догры адамлар Оңа җогап берип диерлер: „Я Реб, биз Сени хачан ач гөрүп, нан бердик? Хачан тешне гөрүп, сув бердик?

³⁸ Хачан Сени кесеки гөрүп, мыхман алдык я ялаңач гөрүп, дон бердик?

³⁹ Хачан Сени хасса я-да зынданда гөрүп, яныңа гелдик?“.

⁴⁰ Патыша олара: „Сизе догрусыны айдярын, Мениң бу иң пес сайылян доганларымдан бирине эдениңизи Маңа эденсиңиз“ дийип җогап берди.

⁴¹ Онсоң солундакылара шейле диер: „Эй, лагнатлылар, Мениң янымдан айрылың, иблис билен онуң перишделерине тайярланан эбеди ода яның!

⁴² Себәби Мен ачдым – нан бермедиңиз, тешнедим – сув бермедиңиз,

⁴³ кесекидим – мыхман алмадыңыз, ялаңачдым – дон бермедиңиз, хассадым ве туссагдым – яныма гелип гөрмедиңиз“.

⁴⁴ Шонда олар: „Я Реб, биз Сени хачан ач, тешне, кесеки, ялаңач, хасса я-да туссаглыкда гөрүп-де, Саңа хызмат этмедик?“ дийип сорарлар.

⁴⁵ Шонда олара: „Сизе догрусыны айдярын, муны бу иң пес сайылянлардан бирине этмедигиңизи, Маңа-да эден дәлсиңиз“ дийип җогап берди.

⁴⁶ Булар эбеди җеза, догры адамлар болса бакы яшайша говшарлар».