Matta 23 - Мукаддес Китап

23‑нҗи бап Вай халыңыза!

¹ Соңра Иса халка ве Өз шәгиртлерине шейле гүррүң берди:

² «Төврат мугаллымлары билен фарисейлер Мусаның орнунда отырлар.

³ Шонуң үчин оларың сизе айдянларының барыны ерине етирип, берҗай эдиң, эмма оларың эденлерини этмәң, себәби айдян затларыны өзлери эдйән дәлдирлер.

⁴ Олар агыр, гөтермеси кын йүклери баглап, адамларың гершине гойяндырлар, йөне өзлери бу йүклери гөтермек үчин, бармагыны хем гымылдатмак ислейән дәлдирлер.

⁵ Олар әхли эдйән затларыны гөз үчин эдйәндирлер. Төврат аятлар гутуҗыгыны гиңелдип, донларының готазларыны узалдяндырлар.

⁶ Тойларда төри, синагогаларда баш күрсүлери,

⁷ базарларда салам алмагы, адамларың өзлерине „мугаллым“ диймеклерини халаяндырлар.

⁸ Сиз өзүңизе „мугаллым“ дийдирмәң, себәби сизиң бир Мугаллымыңыз бардыр. Сизиң хеммәңиз догансыңыз.

⁹ Ер йүзүнде хич киме „ата“ диймәң, себәби сизиң бир Атаңыз бардыр, Ол хем гөкдедир.

¹⁰ Өзүңизе „баштутан“ дийдирмәң, себәби сизиң бир Баштутаныңыз бардыр, Ол хем Месихдир.

¹¹ Араңызда бейик сайылян хеммәңизе хызматкәр болсун.

¹² Ким өзүни ёкары тутса, песелдилер, ким өзүни пес тутса, бейгелдилер.

¹³ Вай халыңыза, Төврат мугаллымлары ве фарисейлер! Эй, икийүзлүлер! Сиз Гөгүң Шалыгына гирмәге адамларың өңүни баглаярсыңыз, оңа не өзүңиз гирйәрсиңиз, не-де гирҗеклере ёл берйәрсиңиз.

¹⁵ Вай халыңыза, Төврат мугаллымлары ве фарисейлер! Эй, икийүзлүлер! Сиз екеҗе адамы өз диниңизе салҗак болуп, деңизлере, дүзлере айланярсыңыз. Диниңизе саланыңыздан соң болса, оны өзүңизден хем ики эссе көп довзахың җезасына сезевар эдйәрсиңиз.

¹⁶ Вай халыңыза, эй, көр ёлбашчылар! Сиз: „Ким ыбадатханадан ант ичсе, бу хич зат сайылар, эмма ким ыбадатхананың алтынындан ант ичсе, ол өз антыны берҗай этмәге борчлудыр“ диййәрсиңиз

¹⁷ Эй, надан көрлер! Хайсысы улы: алтынмы я-да алтыны мукаддес эдйән ыбадатхана?

¹⁸ Шейле-де, сиз: „Ким гурбанлык сыпасындан ант ичсе, бу хич зат сайылар, эмма ким онуң үстүндәки садакадан ант ичсе, өз антыны берҗай этмәге борчлы болар“ диййәрсиңиз.

¹⁹ Эй, көрлер! Хайсысы улы: садакамы я-да садаканы мукаддес эдйән гурбанлык сыпасы?

²⁰ Гурбанлык сыпасындан ант ичйән, ондан хем, онуң үстүндәки әхли затдан хем ант ичйәндир.

²¹ Ыбадатханадан ант ичйән, ондан хем, онда мекан тутан Худайдан хем ант ичйәндир.

²² Гөкден ант ичйән, Худайың тагтындан хем, онда Отурандан хем ант ичйәндир.

²³ Вай халыңыза, Төврат мугаллымлары ве фарисейлер! Эй, икийүзлүлер! Сиз нарпыздан, арпабадыядан ве зиреден ондан бир бөлеги берйәрсиңиз, эмма Мукаддес Кануның хас ваҗып ишлерини: адыллыгы, рехимдарлыгы, иманы ташлаярсыңыз. Буларың бирини берҗай эдип, бейлекилерини ташламалы дәлсиңиз.

²⁴ Эй, көрлери идйәнлер! Сиз сувы сүзүп, чыбыны айырярсыңыз, эмма дүйәни ювудярсыңыз!

²⁵ Вай халыңыза, Төврат мугаллымлары ве фарисейлер! Эй, икийүзлүлер! Сиз кәседир гап-чанагың дашыны арассалаярсыңыз, эмма оларың ичи ачгөзлүкден хем бетнебисликден долудыр.

²⁶ Эй, көр фарисей! Сен илки билен кәседир гап-чанагың ичини арассала, шонда оларың дашы-да арасса болар.

²⁷ Вай халыңыза, Төврат мугаллымлары ве фарисейлер! Эй, икийүзлүлер! Сиз агардылып, дашындан овадан гөрүнйән, эмма ичи өлүлериң сүңклеридир хер түйсли мурдарлыкдан долы мазарсыңыз.

²⁸ Сиз хем дашыңыздан адамлара догры адам ялы гөрүнйәрсиңиз, эмма ичиңиз икийүзлүликден ве писликден долудыр.

²⁹ Вай халыңыза, Төврат мугаллымлары ве фарисейлер! Эй, икийүзлүлер! Сиз пыгамберлериң губурларыны дикип ве догры адамларың ядыгәрликлерини безәп:

³⁰ „Биз ата-бабаларымызың дөврүнде яшан болсак, пыгамберлериң ганыны дөкмекде олара шәрик болмаздык“ диййәрсиңиз.

³¹ Шейлелик билен, пыгамберлери өлдүренлериң огулларыдыгыңыза өзүңиз гүвә гечйәрсиңиз.

³² Бейле болса, ата-бабаларыңызың башлан ишлерини тамамлаң инди!

³³ Эй, йыланлар! Эй, алахөвренлер несли! Сиз довзахың җезасындан нәхили гачҗаксыңыз?

³⁴ Шонуң үчин хем Мен сизе пыгамберлери, акылдарлары ве Төврат мугаллымларыны ёллаярын. Сиз оларың кәбирини өлдүрерсиңиз, хача чүйләрсиңиз, кәбирини синагогаларыңызда енҗерсиңиз, шәхерден-шәхере ызарларсыңыз.

³⁵ Шейлеликде, ер йүзүнде бигүнә дөкүлен хер бир догры адамың ганына сиз җогапкәрсиңиз. Хабылың ганындан башлап, ыбадатхана билен гурбанлык сыпасының арасында сизиң өлдүрен Берекяның оглы Зекаряның ганына ченли сиз җогапкәрсиңиз.

³⁶ Сизе догрусыны айдярын: бу затларың әхлисине шу несил җогапкәрдир.

³⁷ Эй, Иерусалим! Пыгамберлери өлдүрйән, өзүне ёллананлары дашлаян Иерусалим! Товугың өз җүйҗелерини ганатларының ашагына йыгнайшы ялы, Мен хем сениң чагаларыңы энчеме гезек йыгнаҗак болдум, эмма сиз муны ислемедиңиз.

³⁸ Ине, өйүңиз хараба өврүлер.

³⁹ Сизе шуны айдайын: „Реббиң адындан Гелйәне алкыш болсун!“ диййәнчәңиз, Мени гайтадан гөрмерсиңиз».