Matta 22 - Мукаддес Китап

22‑нҗи бап Гелин той тымсалы

¹ Иса олара ене-де тымсаллар аркалы гүррүң берди:

² «Гөгүң Шалыгы өз оглы үчин гелин тоюны тутан патыша меңзейәндир.

³ Ол тоя чагырыланлара хабар этмек үчин хызматкәрлерини иберйәр, эмма чагырыланлар гелмек ислемейәрлер.

⁴ Патыша ене башга хызматкәрлери иберип, олара: „Чагырыланлара айдың, ине, мен той сачагыны тайярлап гойдум. Өкүзлерим, семиз малларым союлды, әхли зат тайяр, тоя гелсинлер“ диййәр.

⁵ Эмма олар үнс хем бермейәрлер, бири өз экин мейданына гидйәр, ене бири өз сөвдасының угрунда гезйәр.

⁶ Башгалары болса онуң хызматкәрлерини тутуп азар берйәрлер, олары өлдүрйәрлер.

⁷ Шейлеликде, патыша газап донуны геййәр. Ол гошун ёллап, яңкы ганхорлары дерби-дагын эдйәр, шәхерлерини отлаяр.

⁸ Онсоң патыша хызматкәрлерине: „Той сачагы тайяр, эмма чагырыланлар муңа мынасып дәл экен.

⁹ Көчелере чыкың-да, кими тапсаңыз, тоя чагырың“ диййәр.

¹⁰ Хызматкәрлер ёллара чыкып, яман диймән, ягшы диймән, тапанларының барыны үйшүрйәрлер, тойхана мыхманлардан доляр.

¹¹ Патыша мыхманлары гөрмәге гиренде, онуң той гейимини геймедик бир адама гөзи дүшйәр.

¹² Оңа: „Эй, дост, сен той гейимини геймән, бу ере нәдип гирип билдиң?“ дийип сораяр. Шонда ол адамың дили тутуляр.

¹³ Онсоң патыша хызматкәрлерине: „Эл-аягыны даңың-да, оны дашары, гараңкылыга ташлаң, ол ерде агы ве диш гыҗама болар“ диййәр.

¹⁴ Чүнки чагырыланлар көп, эмма сайлананлар аздыр».

Императорыңкы – императора

¹⁵ Соңра фарисейлер гидип, Оны гепде тутмак барада маслахат этдилер.

¹⁶ Хиродың тарапдарларының бирнәчесини Онуң янына ибердилер. Олар Исадан: «Мугаллым! Биз Сениң догручылдыгыңы, Худайың ёлуны хакыкат билен өвредйәндигиңи, хич киме тарапгөйлик этмейәндигиңи билйәрис, себәби Сен адамларың дереҗесине бакмаярсың.

¹⁷ Ханы, бизе айт, Сениң пикириңче, императора салгыт төлемек догрумы я догры дәл?» дийип сорадылар.

¹⁸ Иса оларың ниетлериниң ямандыгыны билип: «Мени нәме үчин сынаярсыңыз, эй, икийүзлүлер?

¹⁹ Маңа салгыт пулуны гөркезиң» дийди. Олар Иса бир күмүш теңңе гетирдилер.

²⁰ Иса олара: «Шу шекил билен язгы кимиңки?» дийип сорады.

²¹ Олар: «Императорыңкы» дийип җогап бердилер. Шонда Иса олара: «Онда императорыңкыны – императора, Худайыңкыны Худая бериң» дийди.

²² Олар муны эшиденлеринде, хайран галдылар. Шейдип, олар Исаны ташлап, ол ерден гитдилер.

Дирелиш барада совал

²³ Өлүмден соң дирелишиң ёкдугыны айдян саддукейлер Исаның янына гелип, Оңа шейле сораг бердилер:

²⁴ «Мугаллым! Муса бизе бир адам перзентсиз өлүп гитсе, доганы онуң дул аялыны алып, өлен доганының неслини довам этдирмелидир дийип айдыпдыр.

²⁵ Бизиң арамызда еди доган барды. Биринҗиси өйленди-де өлди. Зүряды болмансоң, аялыны доганына галдырды.

²⁶ Икинҗиси, үчүнҗиси, тә единҗисине ченли хеммесинде шол бир ягдай гайталанды.

²⁷ Оларың хеммесинден соң ол аял хем өлди.

²⁸ Инди дирелиш гүни бу аял оларың хайсысының аялы болар? Оларың едиси хем оңа өйленипди ахырын».

²⁹ Иса олара шейле җогап берди: «Сиз не Мукаддес Язгылары, не-де Худайың гудратыны билйәрсиңиз, ине, шу себәпден ялңышярсыңыз.

³⁰ Ынсанлар өлүмден диреленде, не өйленерлер, не-де дурмуша чыкарлар, олар гөклердәки перишделер ялы боларлар.

³¹ Өлүлериң дирелиши бабатда болса, сиз Худайың өзүңизе:

³² „Мен Ыбрайымың, Ысхагың, Якубың Худайыдырын“ диенини окамадыңызмы? Ол өлүлериң дәл-де, дирилериң Худайыдыр».

³³ Мәхелле муны эшидип, Онуң таглыматына хайран галды.

Иң улы табшырык

³⁴ Фарисейлер Исаның саддукейлериң агзыны юмдурандыгыны эшиденлеринде, бир ере йыгнанышдылар.

³⁵ Олардан бир Төврат мугаллымы Исаны сынамак үчин:

³⁶ «Мугаллым, Төвратда иң улы табшырык нәме?» дийип сорады.

³⁷ Иса оңа шейле җогап берди: «Худайыңыз Ребби тутуш йүрегиңиз, әхли дүшүнҗәңиз билен җан-тенден сөйүң.

³⁸ Шу биринҗи ве иң улы табшырыкдыр.

³⁹ Икинҗиси болса шунуң ялыдыр: „Якыныңы өзүңи сөйшүң ялы сөй“.

⁴⁰ Тутуш Төврат билен пыгамберлериң язгылары шу ики табшырыга баглыдыр».

Месих кимиң оглы?

⁴¹ Фарисейлер үйшүп дуркалар, Иса олардан:

⁴² «Месих барада нәме пикир эдйәрсиңиз? Ол кимиң оглы?» дийип сорады. Олар хем Иса: «Ол Давудың оглы» дийип җогап бердилер.

⁴³ Иса олара шейле дийди: «Онда нәме үчин Давудың өзи Мукаддес Рухдан ылхам алып, Месихе Реб диййәр? Ол шейле дийипдир:

⁴⁴ „Худай Реббиме шейле сөзледи: Душманларыңы аяк астына салянчам, Мениң сагымда отур“.

⁴⁵ Эгер Давут Месихе Реб диййән болса, Ол нәхили Давудың оглы боляр?»

⁴⁶ Исаның сорагына хич ким җогап берип билмеди. Шол гүнден башлап, Оңа мундан артык сораг бермәге хич ким милт этмеди.