Matta 21 - Мукаддес Китап

21‑нҗи бап Иса Иерусалиме улы дабара билен гирйәр

¹ Иса билен шәгиртлери Иерусалиме голайлап, Зейтун дагының этегиндәки Бейтфаҗа геленлеринде, Иса ики шәгирдини өңден ёллап, олара:

² «Өңүңиздәки оба барың. Оба гирен ериңизде даңылгы дуран бир эшеги ве янындакы тайхары тапарсыңыз, олары чөзүң-де, Мениң яныма гетириң.

³ Эгер бири сизе бир зат дийсе: „Бу тайхар Реббе герек, оны дессине ызына иберер“ дийип айдың» дийди.

⁴ Бу-да пыгамбер аркалы айдылан шу сөзүң берҗай болмагы үчинди:

⁵ «Эй, Сион гызы! Патышаң, ине, саңа тарап гелйәр. Ол бир эшеге, эшегиң-де тайхарына мүнүп, пес гөвүнлилик билен саңа тарап гелйәр».

⁶ Шәгиртлер гидип, Исаның табшырышы ялы этдилер.

⁷ Эшек билен тайхары гетирдилер-де, донларыны оларың үстүне атдылар, Иса-да тайхара мүнди.

⁸ Мәхелләниң көпүси донуны ёла язярды, кәбирлери-де агачлардан шахалар кесип, ёла дүшейәрди.

⁹ Онуң өңүнден хем ызындан гелйән мәхелле: «Давут Оглуна алкыш болсун! Реббиң адындан гелйәне алкыш болсун, гөклерде алкыш!» дийип гыгырышярды.

¹⁰ Иса Иерусалиме гиренде, тутуш шәхер: «Бу ким?» дийип, галагоплуга дүшди.

¹¹ Мәхелле хем олара: «Бу Җелиләниң Насыра шәхеринден болан Иса пыгамбер» диййәрди.

Иса сатыҗылары ыбадатханадан ковяр

¹² Иса ыбадатхананың ховлусына гирип, ол ердәки сатыҗылары, алыҗылары ковды. Ол пул чалышянларың текҗелерини, кепдери сатянларың отургычларыны дүңдерди.

¹³ Иса олара: «„Мениң өйүм ыбадат өйи дийлип атландырылар“ дийип язылгыдыр, сиз болса муны гаракчыларың сүренине өвүрйәрсиңиз» дийди.

¹⁴ Ыбадатханада көрлер, агсаклар Исаның янына гелдилер. Иса олары сагалтды.

¹⁵ Ёлбашчы руханылар билен Төврат мугаллымлары Онуң гөркезен гудратларыны ве ыбадатханада: «Давут Оглуна алкыш!» дийип гыгырян чагалары гөренлеринде газаба мүндүлер.

¹⁶ Олар Исадан: «Буларың нәме диййәнини эшидйәрсиңми?» дийип сорадылар. Иса олара: «Хава, эйсем сиз: „Чагаларың, бәбеклериң дилинде алкыш сенасыны яратдың“ диен сөзлери асла окамадыңызмы?» дийди.

¹⁷ Иса олары шол ерде галдырып, шәхерден чыкып гитди. Ол Бейтания гелип, гиҗәни шол ерде гечирди.

Гуран инҗир агаҗы

¹⁸ Иса ир сәхер билен шәхере доланып гелйәркә аҗыкды.

¹⁹ Ёлуң гырасында бир инҗир агаҗыны гөрүп, онуң янына гелди, эмма онда япракдан башга хич зат тапмады. Иса агаҗа: «Мундан бейләк сенде асла миве битмесин!» дийди. Инҗир агаҗы шол пурсадың өзүнде гурады.

²⁰ Шәгиртлер муны гөрүп: «Инҗир агаҗы шол пурсадың өзүнде нәдип гурады?» дийшип хайран галдылар.

²¹ Иса олара: «Сизе догрусыны айдярын, иманыңыз болуп, шүбхе этмесеңиз, сиз диңе бу инҗир агаҗына эдилен билен чәкленмән, эйсем, шу дага: „Гөтерил-де, деңзе зыңыл“ дийсеңиз-де, ол болар.

²² Иманыңыз бар болса, дога-дилег эдениңизде, нәме дилесеңиз, аларсыңыз» дийип җогап берди.

Исаның эрк-ыгтыяры барада совал

²³ Иса ыбадатхананың ховлусына гелип, сапак берип отырка, ёлбашчы руханылар, халкың яшулулары Онуң янына гелип: «Сен бу затлары хайсы ыгтыяр билен эдйәрсиң? Саңа бу ыгтыяры ким берди?» дийип сорадылар.

²⁴ Иса олара: «Мен хем сизе бир совал берҗек. Маңа җогап берсеңиз, сизе бу затлары хайсы ыгтыяр билен эдйәними айдайын.

²⁵ Яхя сува чүмдүрмәге ыгтыяры ниреден алды? Гөкденми я-да ынсандан?» дийип сорады. Олар муны өзара маслахатлашмага башладылар: «Эгер Гөкден дийсек, Ол бизе: „Онда нәме үчин оңа ынанмадыңыз?“ диер.

²⁶ Ынсандан диймәге-де халкдан горкярыс, себәби хеммелер Яхяны пыгамбер сайяр».

²⁷ Ахыры олар Иса: «Биз билемзок» дийип җогап бердилер. Иса-да олара: «Менем сизе бу затлары хайсы ыгтыяр билен эдйәними айтҗак дәл» дийди.

Ики огул тымсалы

²⁸ Иса сөзе башлады: «Сиз муңа нәме диерсиңиз? Бир адамың ики оглы бар экен. Ол биринҗи оглуның янына барып: „Оглум, бу гүн гит-де, үзүмчиликде ишле“ диййәр.

²⁹ Эмма ол: „Гитҗек дәл!“ дийип җогап берйәр. Йөне соңрак муңа гайтмышым эдип, ол ере гидйәр.

³⁰ Яңкы адам икинҗи оглуның янына барып, оңа-да шол сөзи айдяр. Ол болса: „Боляр, хоҗайын, барарын!“ дийип җогап берйәр, эмма гитмейәр.

³¹ Буларың икисинден хайсысы какасының ислегини ерине етирди?» Олар: «Биринҗиси» дийип җогап бердилер. Иса олара: «Сизе догрусыны айдярын, салгытчылар ве лолулар Худайың Шалыгына сизден өң гирерлер.

³² Яхя сизе догры ёл гөркезмәге гелди, сиз оңа ынанмадыңыз, эмма салгытчылар ве лолулар оңа ынандылар. Сиз муны гөрениңизден соң хем өкүнмедиңиз, оңа ынанмадыңыз» дийди.

Үзүмчилик ве кәрендечилер тымсалы

³³ «Ене бир тымсала гулак асың: бир ер эеси бар экен. Ол үзүм багларыны отурдып, дашына хаят айлаяр. Шерап ясамак үчин үзүм сыкмага чукур газяр ве гөзегчилик диңини гуряр. Онсоң үзүмчилигини багбанлара кәрендесине берип, өзи узак ёла гидйәр.

³⁴ Хасыл мөвсүми геленде, үзүмиң мивесинден алып гелмек үчин, ол хызматкәрлерини кәрендечилериң янына иберйәр.

³⁵ Кәрендечилер онуң хызматкәрлерини тутуп, бирини енҗйәрлер, башга бирини өлдүрйәрлер, бейлекисини-де дашлаярлар.

³⁶ Үзүмчилигиң эеси өңкүден хем көп хызматкәрлерини иберйәр. Кәрендечилер олара-да өңкүлере эденлерини эдйәрлер.

³⁷ Ахырсоңунда үзүмчилигиң эеси: „Оглумы сыларлар“ дийип, өз оглуны иберйәр.

³⁸ Эмма кәрендечилер бири-бирлерине: „Мирасдар шудур! Гелиң, шуны өлдүрип, мирасыны элинден алалың“ дийишйәрлер.

³⁹ Олар оны тутуп өлдүрйәрлер ве үзүмчилигиң дашына ташлаярлар.

⁴⁰ Инди үзүмчилигиң эеси гелип, бу кәрендечилере нәме эдер?»

⁴¹ Олар Иса: «Бу пис адамлары айылганч өлүме сезевар эдер ве үзүмчилигини болса мивесини вагтында өзүне берҗек башга кәрендечилере берер» дийдилер.

⁴² Иса олардан: «Сиз нәме Мукаддес Язгыларда: „Уссаларың рет эден дашы, бинаның бурч дашы болды. Муны Реб этди, бу назарымызда тәсин сайылды“ диен сөзлери окамадыңызмы?» дийип сорады.

⁴³ «Мунуң үчин сизе шейле диййәрин: Худайың Шалыгы сизден алнып, Шалык үчин хасыл өндүрҗек халка берлер.

⁴⁴ Бу дашың үстүне йыкылан бөлек-бөлек болар. Эгер ол бириниң үстүне гачса, оны мынҗырадар».

⁴⁵ Ёлбашчы руханылардыр фарисейлер Онуң тымсалларыны эшиденлеринде, гүррүңиң өзлери барададыгыны аңдылар.

⁴⁶ Оны тутҗак болдулар, йөне халкдан горкдулар, себәби халк Исаны пыгамбер сайярды.