Matta 20 - Мукаддес Китап

20‑нҗи бап Үзүмчилик тымсалы

¹ Гөгүң Шалыгы үзүмчилигинде ишләр ялы, ир эртир билен гүнлүкчи тутмага гиден ер эесине меңзейәндир.

² Ол гүнлүкчилер билен бир гүнлүк иш хакыны бир күмүш теңңә разылашып, олары өз үзүмчилигине ёллаяр.

³ Ир сагат докузларда дашары чыкан вагты, ол базарда бикәр дуран бирнәче адамлары гөрйәр.

⁴ Олара-да: «Сиз хем үзүмчилиге гидиң, хакыңызы долы төләрин» диййәр. Олар хем гидйәрлер.

⁵ Гүнортан ве өйлән сагат үчлерде ене дашары чыкып, ене шейле эдйәр.

⁶ Өйлән сагат бәшлерде айланмага чыкан вагты, башга бош дуранлары гөрүп, олардан: «Нәме үчин гүнузын бу ерде бош дурсуңыз?» дийип сораяр.

⁷ Олар хем: «Бизи хич ким хакына тутмады» дийип җогап берйәрлер. Олара: «Сиз-де үзүмчилиге гидиң» диййәр.

⁸ Агшам дүшен чагы, үзүмчилигиң эеси өз иш доландырыҗысына: «Гүнлүкчилери чагыр-да, иң соңкулардан башлап, илкинҗилере ченли хакларыны төле» диййәр.

⁹ Шейлеликде, өйлән сагат бәшлерде геленлериң хер бири бир күмүш теңңе аляр.

¹⁰ Илкинҗи геленлер көп аларыс өйдүп тама эдйәрлер, эмма оларың-да хер бири бир күмүш теңңе аляр.

¹¹ Олар пулуны алан вагтлары ер эесине хүңүрдешип:

¹² «Бу иң соңкы геленлер диңе бир сагат ишледилер, биз болса, җөвзалы ыссыда гүнузын агыр зәхмет чекдик. Муңа гарамаздан сен бизиң зәхметимизи оларыңкы билен дең этдиң» диййәрлер.

¹³ Ер эеси оларың бирине шейле җогап берйәр: «Эй, дост! Мен саңа адалатсызлык эдемок. Сен мениң билен бир күмүш теңңә разылашмадыңмы нәме?

¹⁴ Өз хакыңы ал-да, гидибер. Мен бу иң соңка-да саңа береними бермек ислейәрин.

¹⁵ Өз пулумы ислейшимче сарп этмәге ыгтыярым ёкмы? Я-да сен мениң сахылыгыма гөриплик эдйәрсиңми?»

¹⁶ Шейлеликде, иң соңкулар илкинҗилер, илкинҗилер хем иң соңкулар болар.

Иса Өзүниң өлүп дирелҗегини ене айдяр

¹⁷ Иса Иерусалиме барярка, ёлда он ики шәгирдини бир чете чекип, олара:

¹⁸ «Ине, Иерусалиме барярыс. Ынсан Оглы ёлбашчы руханыларың, Төврат мугаллымларың элине табшырылар, олар хем Оны өлүме хөкүм эдерлер.

¹⁹ Оны кемситсинлер, гамчыласынлар ве хача чүйлесинлер дийип, кесеки миллетлере табшырарлар, эмма Ол үчүленҗи гүн дирелер» дийди.

Бир энәниң хайышы

²⁰ Соңра Зебедейиң огулларының эҗеси өз огуллары билен Исаның янына гелди. Ол Исадан бир затлар дилемек үчин дызына чөкүп, тагзым этди.

²¹ Иса аялдан: «Нәме ислейәрсиң?» дийип сорады. Аял Иса йүзленип: «Өз Шалыгыңда мениң бир оглумың Сениң сагыңда, бейлекисиниң болса чепиңде отурмагыны эмр эт» дийди.

²² Эмма Иса: «Сиз нәме дилейәниңизи билмейәрсиңиз. Сиз Мениң ичҗек хасрат кәсәмден ичип билерсиңизми?» дийди. Олар Иса: «Хава, ичип билерис!» дийип җогап бердилер.

²³ Иса олара: «Сиз Мениң ичҗек кәсәмден ичерсиңиз, эмма сизе сагымда я чепимде отурмага ругсат бермек Мениң элимде дәл. Бу орунлары Атам кимлер үчин тайярлан болса, шолар үчиндир» дийди.

²⁴ Бейлеки он шәгирт муны эшидип, яңкы ики догана гахарландылар.

²⁵ Иса олары янына чагырып: «Өзүңиз билйәрсиңиз, кесеки миллетлериң баштутанлары олара хөкүмдарлык эдйәрлер, ёкары везипелилери-де агалык эдйәрлер.

²⁶ Сизиң араңызда бейле болмасын. Араңызда ким үстүн болмак ислейән болса, бейлекилериң хызматкәри болсун.

²⁷ Ким илкинҗи болмак ислейән болса, хеммәңизиң гулы болсун.

²⁸ Ынсан Оглы хем Өзүне хызмат эдилмеги үчин дәл-де, эйсем, башгалара хызмат этмек үчин, көплериң угрунда җаныны гурбан эдип, олары азат этмек үчин гелди» дийди.

Ики көрүң гөзи ачыляр

²⁹ Иса билен шәгиртлери Ериходан чыканларында, улы мәхелле Исаның ызына дүшүп гитди.

³⁰ Ёлуң гырасында отуран ики саны көр адам Исаның гечип баряныны эшидип: «Агам, эй, Давут Оглы, бизе рехим эт!» дийип гыгырды.

³¹ Сеслерини чыкармаз ялы, көп адамлар олара кәедилер, эмма олар өңкүден хем гаты сес билен: «Агам, эй, Давут Оглы, бизе рехим эт!» дийип гыгырдылар.

³² Иса аяк чекди-де, олары чагырып: «Сизиң үчин нәме этмегими ислейәрсиңиз?» дийип сорады.

³³ Олар Оңа: «Агам, гөзүмиз ачылсын» дийдилер.

³⁴ Исаның олара хайпы гелип, гөзлерине элини дегирди велин, шобада оларың гөзлери ачылды. Олар хем Исаның ызына дүшүп гидибердилер.