Matta 2 - Мукаддес Китап

2‑нҗи бап Мүнечҗимлер гүндогардан гелйәр

¹ Иса Хирод патышаның дөврүнде Яхудыяның Бейтуллахам шәхеринде энеден догулды. Шонда мүнечҗимлер гүндогардан Иерусалиме гелип:

² «Яхудыларың патышасы болуп доглан ниреде? Биз Онуң доглуш йылдызыны гөрдүк ве Оңа сежде этмәге гелдик» дийдилер.

³ Хирод патыша муны эшиденде, онуң өзи-де, тутуш Иерусалим халкы-да галагоплуга дүшди.

⁴ Ол әхли ёлбашчы руханылары, Төврат мугаллымларыны йыгнап, олардан Месихиң ниреде догулмалыдыгы хакында сорады.

⁵ Олар шейле җогап бердилер: «Ол Яхудыядакы Бейтуллахам шәхеринде догулмалы, себәби пыгамбер шейле языпдыр:

⁶ „Эмма сен, эй, Яхуда юрдундакы Бейтуллахам! Яхуда хөкүмдарларының арасында асла кичиси дәлсиң сен. Чүнки сенден бир Хөкүмдар чыкар, халкым Ысрайылың чопаны болар“».

⁷ Онсоң Хирод мүнечҗимлери гизлин чагырып, олардан йылдызың хачан гөрнендиги барада җикме-җик сорады.

⁸ Хирод: «Барың, чага барадакы хабарың аныгына етиң. Оны тапан бадыңыза, маңа хабар бериң. Менем барып, Оңа сежде этҗек» дийип, олары Бейтуллахама иберди.

⁹ Олар патышаны диңләп, ёла дүшдүлер. Ине, оларың гөрен доглуш йылдызы ене пейда болды ве өңлерине дүшүп, чаганың доглан ериниң үстүне гелип дурды.

¹⁰ Йылдызы гөренлеринде, оларың шатлыкларының чәги болмады.

¹¹ Олар өе гирип, чага билен эҗеси Меръеми гөрдүлер. Шонда дыза чөкүп, Оңа сежде этдилер-де, хазыналарыны ачып, алтын, хошбой түтетгилер ве мүр совгат бердилер.

¹² Хиродың янына гайдып бармазлык хакда дүйш аркалы дуйдурыш берленсоң, мүнечҗимлер өз юртларына башга ёл билен гайтдылар.

Юсуп машгаласы билен Мүсүре гачяр

¹³ Мүнечҗимлер гиденден соң, Реббиң бир перишдеси Юсубың дүйшүне гирип: «Тур! Чага билен эҗесини ал-да, Мүсүре гач. Өзүм хабар берйәнчәм, шол ерде гал, себәби Хирод чаганы өлдүрмек үчин Онуң гөзлегине чыкмакчы боляр» дийди.

¹⁴ Шейлеликде, Юсуп турды-да, чага билен Онуң эҗесини алып, шол гиҗе Мүсүре тарап ёла дүшди.

¹⁵ Ол тә Хирод өлйәнчә, шол ерде галды. Шунлукда, Реббиң: «Оглумы Мүсүрден чагырдым» дийип, пыгамбер аркалы айдан сөзи берҗай болды.

¹⁶ Мүнечҗимлериң алданыны билип, Хирод гахар-газаба мүнди. Ол мүнечҗимлерден сорап аныклан вагтына гөрә, Бейтуллахам билен онуң даш-төверегиндәки обаларда доглан ики яшындакы ве ики яша етмедик эркек гөбекли чагаларың әхлисини өлдүртди.

¹⁷ Шейдип, Ермея пыгамбериң шу айданлары берҗай болды:

¹⁸ «Рамадан бир сес эшидилди, агы ве аҗы перят сеслери, Рахел чагалары үчин аглаяр, теселли берилмегини ислемейәр, чүнки олар инди ёк».

Юсуп машгаласы билен Насыра гайдып гелйәр

¹⁹ Хирод өленден соң, Реббиң бир перишдеси Мүсүрде Юсубың дүйшүне гирип:

²⁰ «Тур, чага билен Онуң эҗесини ал-да, Ысрайыла долан, себәби чаганың җанының кастына чыканлар өлди» дийди.

²¹ Онсоң Юсуп чага билен эҗесини алып, Ысрайыла гайтды.

²² Йөне Археланың өз атасы Хиродың ерине Яхудыяның патышасы боланыны эшидип, ол ере бармага горкды. Дүйшүң үсти билен дуйдурыш берленсоң, ол Җелиле велаятына тарап ёла дүшди.

²³ Ол ере барып, Насыра диен шәхерде месген тутды. Шейдип, пыгамберлер аркалы: «Оңа насыралы дийлер» дийип айдылан сөз берҗай болды.