Matta 17 - Мукаддес Китап

17‑нҗи бап Исаның кешби үйтгейәр

¹ Алты гүнден соң Иса янына диңе Петрусы, Якубы ве онуң доганы Ёханнаны алып, бир бейик дагың үстүне чыкды.

² Шол ерде оларың гөзүниң алнында Онуң кешби үйтгеди. Онуң йүзи Гүн кимин парлады, эгинбашы ап-ак болуп, ышык сачды.

³ Бирденкә олара Муса билен Ыляс гөрүнди. Олар Иса билен геплешип дурдулар.

⁴ Петрус Иса: «Агам! Бизе бу ерде болмак якымлы, ислесең, бу ерде үч чадыр дикейин: бири – Саңа, бири – Муса, бири – Ыляса» дийди.

⁵ Ол энтек гепләп дурка, парлак бир булут оларың үстүни өртди. Булутдан: «Бу Мениң сөвер Оглумдыр, Мен Ондан гаты разыдырын. Оңа гулак асың» диен бир оваз гелди.

⁶ Шәгиртлер муны эшиденлеринде, гаты горкуп, йүзин йыкылдылар.

⁷ Эмма Иса гелип, олара элини дегрип: «Туруң, горкмаң» дийди.

⁸ Олар башыны галдырып середенлеринде, Исадан башга хич кими гөрмедилер.

⁹ Дагдан инип гелйәркәлер, Иса олара: «Ынсан Оглы өлүмден дирелйәнчә, гөрен затларыңызы хич киме айтмаң» дийип табшырды.

¹⁰ Шәгиртлери Ондан: «Онда нәме үчин Төврат мугаллымлары өңүрти Ыляс гелмелидир диййәрлер?» дийип сорадылар.

¹¹ Иса олара: «Догрудан-да, өңүрти Ыляс гелип, әхли зады дүзетмели.

¹² Мен сизе шуны айдярын: Ыляс бирвагт гелди, эмма оны танаман, оңа ислән затларыны этдилер. Ынсан Оглы-да эдил шонуң ялы, оларың элинден җебир чекер» дийип җогап берди.

¹³ Шонда шәгиртлер Онуң өзлерине чүмдүриҗи Яхя барада гүррүң берйәндигине дүшүндилер.

Иса арвах-җын эелән огланы сагалдяр

¹⁴ Олар мәхелләниң янына етип баряркалар, бир адам Исаның янына гелип, Онуң өңүнде дыза чөкди.

¹⁵ Ол: «Агам, оглума рехим эт! Онуң тутгай кесели бар, өрән эҗир чекйәр. Ол йыгы-йыгыдан өзүни ода, сува уряр.

¹⁶ Мен оны Сениң шәгиртлериңе гетирдим, эмма олар сагалдып билмедилер» дийди.

¹⁷ Иса: «Эй, ёлдан чыкан, имансыз несил! Мен хачана ченли сизиң билен биле болуп, сизе чыдайын? Огланы шу ере, Мениң яныма гетириң» дийди.

¹⁸ Иса арвах-җына берк кәйән бадына, арвах-җын огландан чыкып гитди. Оглан шол пурсадың өзүнде сагалды.

¹⁹ Онсоң шәгиртлер Исаның янына гелип, өзли-өзлерикә Ондан: «Биз нәме үчин оны чыкарып билмедик?» дийип сорадылар.

²⁰ Иса хем олара: «Етерлик иманыңызың ёкдугы үчин шейле болды. Сизе догрусыны айдярын: бир горчица дәнеси ялыҗак иманыңыз болуп, шу дага: „Бу ерден ол ере гөч“ дийсеңиз, ол гөчер. Сизе башартмаҗак зат болмаз» дийди.

²² Бир гүн Җелиледе үйшенлеринде, Иса олара: «Ынсан Оглы адамларың элине табшырылар.

²³ Оны өлдүрерлер, эмма Ол үчүленҗи гүн дирелер» дийди. Шәгиртлер муңа өрән гынандылар.

Ыбадатхана салгыды

²⁴ Иса билен шәгиртлер Капернаума геленлеринден соң, ыбадатхана салгыдыны йыгнаянлар Петрусың янына гелип: «Сизиң Мугаллымыңыз ыбадатхана салгыдыны төләнокмы?» дийип сорадылар.

²⁵ Петрус: «Төлейәр» дийди. Петрус өе геленде, Иса ондан өңүрдип: «Симун, сен нәме диййәрсиң? Ер йүзүндәки патышалар гүмрүкдир салгыды кимден алярлар? Өз огулларынданмы я кесекилерден?» дийип сорады.

²⁶ Петрус Оңа: «Кесекилерден» диенде, Иса оңа: «Онда огуллар эркиндир.

²⁷ Эмма олар нәгиле болмаз ялы, көле гит-де, чеңңек ташла. Чеңңеге дүшен илкинҗи балыгы алып, агзыны ачсаң, салгыт төлемәге етерлик теңңәни тапарсың. Теңңәни ал-да, Мениң үчинем, өзүң үчинем салгыт төле» дийди.