Matta 15 - Мукаддес Китап

15‑нҗи бап Адамы нәме мурдар эдйәр?

¹ Онсоң кәбир фарисейлер билен Төврат мугаллымлары Иерусалимден Исаның янына гелип, Ондан:

² «Нәме үчин Сениң шәгиртлериң ата-бабаларың адатыны бозярлар? Нәме үчин олар нахар иенлеринде эллерини ювмаярлар?» дийип сорадылар.

³ Иса олара шейле җогап берди: «Сиз нәме үчин өз адатларыңызың хатырасына Худайың буйругыны бозярсыңыз?

⁴ Худай: „Ата-энеңе хормат гой“, шейле-де, „Атасына я-да энесине гарган адам өлүме хөкүм эдилсин“ дийип буйрупды.

^5-6 Эмма сиз ата-энесине: „Мен сизе көмек эдип билҗек дәл. Сизе бермеги ниет эден затларымы мен Худая садака бердим“ дийип айдяна онуң атасына хормат гоймагы хөкман дәл диййәрсиңиз. Шейдип, адатларыңызың хатырасына Худайың сөзүни пуҗа чыкарярсыңыз.

⁷ Эй, икийүзлүлер, Ишая пыгамбер сиз хакда җайдар пыгамберлик эдипдир! Онда шейле язылан:

⁸ „Бу халк Мени дилинде хорматлаяр, эмма йүреклери Менден узакдадыр.

⁹ Бидерек ере Маңа сежде эдйәрлер, таглымат дийип өвредйәнлери ынсан буйрукларыдыр“».

¹⁰ Иса мәхелләни янына чагырып, олара: «Диңләң, дүшүниң!

¹¹ Агза гирен зат адамы мурдар эдйән дәлдир, адамы агыздан чыкян зат мурдар эдйәндир» дийди.

¹² Онсоң шәгиртлер гелип, Ондан: «Фарисейлериң бу сөзи эшидип, нәгиле боландыкларыны билйәрсиңми?» дийип сорадылар.

¹³ Ол: «Гөкдәки Атамың экмедик хер бир өсүмлиги көки билен согрулар.

¹⁴ Олара зат диймәң, олар көрлери идйән көрлердир. Көр-көри идеклесе, оларың икиси хем чукура гачар» дийип җогап берди.

¹⁵ Петрус Оңа: «Бизе бу тымсалы дүшүндирип бер» дийди.

¹⁶ Иса хем шейле дийди: «Сиз хенизем дүшүнеңзокмы?

¹⁷ Агза гирен хер бир задың илки гарна барып, ол ерден хем дашары чыкяндыгыны билмейәрсиңизми?

¹⁸ Эмма агыздан чыкан затлар йүрекден чыкып, адамы мурдар эдйәр.

¹⁹ Адамың йүрегинден эрбет пикирлер, ганхорлык, зынахорлык, азгынлык, огурлык, ялан шаятлык, сөгүнч чыкяндыр.

²⁰ Адамы шу затлар мурдар эдйәр, ювулмадык эл билен нахар иймек адамы мурдар этмейәр».

Кенган аялың иманы

²¹ Иса ол ерден чыкып, Сур ве Сидон шәхерлериниң төверегине гитди.

²² Ол ерде бир кенган аялы Исаның янына гелип: «Агам, эй, Давут Оглы, бизе рехим эт! Гызымы арвах-җын эеледи, ол эрбет эҗир чекйәр» дийди.

²³ Эмма Иса оңа хич бир җогап бермеди. Шонда шәгиртлери Онуң янына гелип: «Оны уграт, ёгсам ызымыздан галман гыгырып гелйәр» дийип хайыш этдилер.

²⁴ Иса хем: «Мен диңе ысрайыл халкының азашан гоюнларына иберилдим» дийип җогап берди.

²⁵ Эмма ол аял ене-де Исаның голайына гелип, дыза чөкди-де: «Агам, маңа көмек эт» дийип ялбарды.

²⁶ Иса оңа: «Чагаларың чөрегини алып, итлере зыңмак догры дәлдир» дийди.

²⁷ Аял хем: «Хава, Агам! Йөне итлер хем сачак башында дөкүлен чөрек овунтыкларындан иййәндир» дийди.

²⁸ Шонда Иса оңа: «Эй, зенан, сениң иманың бейик! Саңа ислейшиң ялы болсун!» дийди. Ол аялың гызы шол сагадың өзүнде сагалды.

Иса дөрт мүң адамы доюряр

²⁹ Иса ол ерден гайтды ве Җелиле көлүниң голайына гелип, бир дагың үстүне чыкып отурды.

³⁰ Онуң янына бир улы мәхелле гелди, оларың арасында агсаклар, майыплар, көрлер, лаллар ве ене-де бир топар хассалар барды. Олары гетирип, Исаның аягының астында гойдулар. Ол хем булары сагалтды.

³¹ Халк лалларың геплейәндигини, майыпларың сагаландыгыны, көрлериң гөрйәндигини, агсакларың ылгаяндыгыны гөрүп хайран галды. Олар Ысрайыл Худайыны шөхратландырдылар.

³² Иса шәгиртлерини янына чагырып: «Бу мәхеллә хайпым гелйәр! Булар үч гүн бәри Мениң янымда, иймәге хем хич затлары ёк. Олары өйлерине ач гойбересим геленок, ёлда тапдан дүшмеклери ахмал» дийди.

³³ Шәгиртлери Оңа: «Бейле улы мәхелләни дойрар ялы, бу чола ерде биз чөреги ниреден алалы?» дийдилер.

³⁴ Иса олардан: «Нәче чөрегиңиз бар?» дийип сорады. Олар: «Еди чөрек билен бирнәче овнук балыгымыз бар» дийдилер.

³⁵ Иса мәхеллә ерде отурмагы буюрды.

³⁶ Еди чөрек билен балыклары алып, шүкүр эденинден соң, олары бөлүшдирип, шәгиртлерине берди, шәгиртлери хем олары мәхеллә пайладылар.

³⁷ Хеммелер ийип дойдулар. Артан чөрек бөлеклери еди себет болды.

³⁸ Иенлер аяллардыр чагалардан башга дөрт мүң адамды.

³⁹ Иса халкы уградандан соң, гайыга мүнүп, Магадан шәхериниң төверегине гитди.