Matta 13 - Мукаддес Китап

13‑нҗи бап Экин тымсалы

¹ Шол гүн Иса өйден чыкып, көлүң якасында отырды.

² Дашына шейле улы мәхелләниң үйшендиги себәпли көлдәки бир гайыга мүнүп отырды. Тутуш мәхелле болса көлүң якасында, гуры ерде дурды.

³ Иса олара тымсаллар аркалы көп затлар өвретди: «Бир дайхан экин экмәге чыкяр.

⁴ Экип йөркә, тохумларың бирнәчеси ёлуң үстүне дүшйәр ве гушлар гелип, оны чокярлар.

⁵ Бирнәчеси топрагы аз, дашлы ере дүшйәр. Топрагы чуң болмансоң, олар тиз гөгерйәр.

⁶ Йөне гүн гызанда, көклериниң ёкдугы зерарлы солуп, гураярлар.

⁷ Бирнәче тохум тикенлериң арасына дүшйәр. Тикенлер өсүп, олары басяр.

⁸ Бирнәчеси-де говы ере дүшүп, кәбири йүз, кәбири алтмыш, кәбири хем отуз эссе хасыл берйәр.

⁹ Эшитмәге гулагы бар адам эшитсин!»

¹⁰ Онсоң шәгиртлер Исадан: «Нәме үчин халка тымсаллар билен гүррүң берйәрсиң?» дийип сорадылар.

¹¹ Ол шейле җогап берди: «Гөгүң Шалыгының сырларына дүшүнме укыбы сизе берилди, олара берилмеди.

¹² Кимде бар болса, оңа ене берлер, ондакы бол болар; кимде ёк болса, онуң элиндәки хем алнар.

¹³ Мениң олара тымсаллар билен гүррүң бермегимиң себәби шудур: олар середйәрлер, йөне гөрмейәрлер, диңлейәрлер, йөне эшитмейәрлер ве дүшүнмейәрлер.

¹⁴ Шейдип, Ишаяның пыгамберлик билен айдан сөзлери оларда берҗай боляр: „Эшидип дурсаңыз-да, хич дүшүнмерсиңиз, середип дурсаңыз-да, хич аңламарсыңыз.

¹⁵ Бу халкың йүреги күтелди, гулаклары кер ачды, гөзлери гапылды. Ёгсам гөзлери билен гөрүп, гулаклары билен эшидердилер, аңлары билен аңлап, Маңа тарап доланардылар, Мен хем олара шыпа берердим“.

¹⁶ Эмма сиз нәхили багтлы! Себәби гөзлериңиз гөрйәр, гулакларыңыз эшидйәр.

¹⁷ Сизе догрусыны айдярын: көп пыгамберлер ве энчеме догры адамлар сизиң гөрйәнлериңизи гөрмек иследилер, эмма гөрмедилер. Сизиң эшидйәнлериңизи эшитмек иследилер, эмма эшитмедилер.

¹⁸ Инди дайхан хакындакы тымсалың манысыны диңләң:

¹⁹ ким Худайың Шалыгы хакындакы сөзи эшидип, оңа дүшүнмесе, шейтан гелип, онуң йүрегинде экилени согруп аляр. Ёлуң гырасында экилен будур.

²⁰ Дашлы ере экилен болса, сөзи эшидип, оны дессине шатлык билен кабул эдйәндир.

²¹ Эмма бейле адамда көк ёкдур, чыдамсыздыр. Бу сөз үчин мушакгат я-да ызарлама боланда, ол дессине имандан йүз дөндерер.

²² Тикенлигиң арасына дүшен тохум болса сөзи эшидйәр, йөне дүнйәниң гайгылары, баямак хөвеси оны богяр ве сөз хасылсыз галяр.

²³ Говы топрага экилен болса, сөзи эшидип, оңа дүшүнйәр хем-де хасыл берйәр. Бейле адамларың кәбири йүз, кәбири алтмыш, кәбири отуз эссе хасыл берйәр».

Хашал от тымсалы

²⁴ Иса олара башга бир тымсал хем гүррүң берди: «Гөгүң Шалыгы өз атызында оңат тохум экен адама меңзейәр.

²⁵ Хеммелер ятырка, онуң душманы гелип, бугдайларың арасына хашал от экип гидйәр.

²⁶ Экин өсүп хасыла дуранда, хашал от хем пейда боляр.

²⁷ Ер эесиниң хызматкәрлери онуң янына гелип: „Хоҗайын, сен атызыңа оңат тохум сепмәнмидиң? Бу хашал отлар ниреден пейда болдука?“ дийип сораярлар.

²⁸ Хоҗайын: „Бу душманың ишидир“ дийип җогап берйәр. Хызматкәрлери: „Гидип, олары согруп ташламагымызы ислейәңми?“ дийип сораярлар.

²⁹ Эмма хоҗайын: „Ёк, хашал оты согурҗак болуп,

³⁰ бугдайы хем көки билен гопармагыңыз мүмкин. Гой, орага ченли оларың икиси-де биле өсүберсин. Орак дөври мен оракчылара илки хашал оты йыгың-да, якар ялы эдип десселәң. Бугдайы болса мениң аммарыма үйшүриң диерин“» дийип җогап берйәр.

Горчица тохум тымсалы

³¹ Иса олара башга бир тымсалы-да гүррүң берди: «Гөгүң Шалыгы бир адамың өз меллегинде экен горчица тохумына меңзейәндир.

³² Ол әхли тохумларың ичинде иң овнугыдыр, эмма өсенинден соң велин, бейлеки өсүмликлериң барысындан белент болуп, агаҗа өврүлйәр. Хатда гушларам онуң шахаларында хөвүртгеләп билйәрлер».

Хамырмая тымсалы

³³ Иса олара башга бир тымсалы-да гүррүң берди: «Гөгүң Шалыгы хамырмая меңзейәндир. Бир аял үч керсен уна бирҗе бөлек хамырмая гошса-да, тутуш хамыр чишйәр».

³⁴ Иса бу затларың барыны халка тымсаллар билен айдярды. Олара тымсалсыз хич зат айтмаярды.

³⁵ Бу пыгамбер аркалы айдылан шу сөзүң берҗай болмагы үчинди: «Мен сизе тымсал айдып берейин, дүнйә ярадылалы бәри гизлин галан сырлары беян эдейин».

Иса хашал от тымсалыны дүшүндирйәр

³⁶ Онсоң Иса халкы уградып, өе гирди. Шәгиртлери Онуң янына гелип: «Хашал отлар хакдакы тымсалы бизе дүшүндирип берсене» дийдилер.

³⁷ Ол шейле җогап берди: «Оңат тохумы экйән Ынсан Оглудыр.

³⁸ Экин мейданы болса дүнйәдир. Оңат тохум Гөгүң Шалыгының перзентлеридир. Хашал отлар болса шейтаның перзентлеридир.

³⁹ Хашал отлары экен душман – шейтандыр. Орак дөври – дүнйәниң ахырыдыр, оракчылар болса перишделердир.

⁴⁰ Шейлелик билен хашал отлар нәхили йыглып, отда якылян болса, дүнйәниң ахырында хем шейле болар.

⁴¹ Ынсан Оглы Өз перишделерини иберер, олар-да гүнә дучар эдйән әхли затлары, эрбетлик эдйәнлери Онуң Шалыгындан йыгнарлар.

⁴² Олар булары ловлап дуран күрә ташларлар. Ол ерде агы ве диш гыҗама болар.

⁴³ Шонда догры адамлар гөкдәки Атасының Шалыгында Гүн кимин парларлар. Эшитмәге гулагы бар адам эшитсин!»

Гизлин хазына ве дүрдәне тымсалы

⁴⁴ «Гөгүң Шалыгы экин мейданында гизленен хазына меңзейәндир. Бир адам оны тапып аляр, соңра оны гайтадан гизлейәр ве бегенип барып, әхли задыны сатяр-да, яңкы экин мейданы сатын аляр.

⁴⁵ Мундан башга-да, Гөгүң Шалыгы овадан дүр агтарян тәҗир ялыдыр.

⁴⁶ Ол гымматбаха бир дүри тапып, әхли задыны сатяр-да, оны сатын аляр.

Тор тымсалы

⁴⁷ Шейле хем, Гөгүң Шалыгы деңзе ташланып, хер хили балыгы йыгнаян тор ялыдыр.

⁴⁸ Тор доланда, оны кенара чекйәрлер. Онсоң отурып, оңат балыклары себетлере салярлар, эрбетлерини хем зыңып гойберйәрлер.

⁴⁹ Дүнйәниң ахырында хем шейле болар. Перишделер гелип, эрбетлери догры адамлардан айрып,

⁵⁰ ловлап дуран күрә ташларлар. Ол ерде агы ве диш гыҗама болар».

⁵¹ Иса олара: «Буларың хеммесине дүшүндиңизми?» дийип сорады. Олар: «Хава» дийип җогап бердилер.

⁵² Иса олара: «Шонуң үчин хем Гөгүң Шалыгы хакында таглымат алан хер бир Төврат мугаллымы хазынасындан тәзе ве көне затлар чыкарян өй эесине меңзейәндир» дийди.

Насырада Иса хормат гоюлмаяр

⁵³ Иса бу тымсалы гүррүң берип боландан соң, ол ерден гитди.

⁵⁴ Ол Өз догдук меканына гелип, адамлара оларың синагогаларында сапак бермәге башлады. Адамлар Оңа хайран галып: «Бу Адам бейле даналыгы ниреден алдыка? Ол нәдип бейле мугҗызалары гөркезмеги башарярка?

⁵⁵ Ол агач уссаның оглы дәлми? Эҗесиниң ады хем Меръем дәлми нәме? Ол Якуп, Юсуп, Симун ве Яхуда дагың доганы ахырын!

⁵⁶ Онуң уялары-да бизиң арамызда яшамаярлармы нәме? Онда бу Адам мунча зады ниреден билйәркә?» дийишдилер.

⁵⁷ Шейлеликде, олар Исаны рет этдилер. Эмма Иса олара: «Пыгамбериң диңе өз юрдунда ве өйүнде гадыры ёкдур» дийди.

⁵⁸ Иса оларың имансыздыклары зерарлы, ол ерде көп гудрат гөркезмеди.