Matta 11 - Мукаддес Китап

11‑нҗи бап Иса ве Яхя

¹ Иса он ики шәгирдине өвүт-несихат берип гутарандан соң, ол ерден чыкып, голайдакы шәхерлерде өвретмәге ве вагыз этмәге гитди.

² Яхя хем туссаглыкдака, Месихиң эден ишлери барада эшидип, Онуң янына шәгиртлерини иберди:

³ «Шол гелмели Месих Сенми я-да биз башга бирине гарашмалымы?» дийип соратды.

⁴ Иса олара: «Барың-да, гөрүп-эшиденлериңизи Яхя хабар бериң.

⁵ Көрлер гөрйәр, агсаклар ылгаяр, дери кеселлилер тәмизленйәр, керлер эшидйәр, өлүлер дирелйәр, гарыплара Хош Хабар вагыз эдилйәр.

⁶ Менден йүз дөндермедик адам багтлыдыр» дийип җогап берди.

⁷ Яхяның шәгиртлери гиден вагты, Иса мәхеллә Яхя барада гүррүң бермәге башлады: «Чөле нәме гөрмәге гитдиңиз? Шемала ыранян йылгынымы?

⁸ Ери, нәме гөрмәге гитдиңиз? Непис эшиклер гейнен бир адамымы? Эмма непис эшиклер гейненлер патышаларың көшклериндедир.

⁹ Онда нәме гөрмәге гитдиңиз? Бир пыгамберими? Хава, Мен сизе шуны айдярын, ол гөрен кишиңиз хатда пыгамберден хем артыкдыр.

¹⁰ „Өңүңден ёл тайярлар ялы, ине, Мен Өз векилими иберйәрин“ дийип язылан сөзлер хем хут шоңа дегишлидир.

¹¹ Сизе догрусыны айдярын, аялдан догланларың арасында чүмдүриҗи Яхядан бейиги ёкдур, эмма Гөгүң Шалыгында иң кичиси хем ондан бейикдир.

¹² Чүмдүриҗи Яхяның гүнлеринден тә шу вагта ченли Гөгүң Шалыгына рехимсиз хүҗүм эдилйәр ве вагшы адамлар оны эле салярлар.

¹³ Яхя ченли әхли пыгамберлер ве Төврады бу хакда пыгамберлик этди.

¹⁴ Эгер Яхяны кабул этмек ислейән болсаңыз, гелмегине гарашылян Ыляс олдур.

¹⁵ Эшитмәге гулагы бар адам эшитсин!

^16-17 Мен бу несли киме меңзедейин? Олар базарларда отурып, башгалара: „Сизе түйдүк чалдык, танс этмедиңиз; агы айтдык, агламадыңыз“ дийип гыгырян чагалара меңзейәрлер.

¹⁸ Яхя гелди, ол иеногам, иченогам. Олар болса оңа „җынлы“ диййәрлер.

¹⁹ Ынсан Оглы гелди, Ол иййәрем, ичйәрем, олар Оңа: „Ине, бу хорана, аракхора середиң! Ол салгытчылар ве гүнәкәрлер билен дост болды!“ диййәрлер. Эмма даналык өз амаллары билен тассыкланар».

Тоба этмедик шәхерлер

²⁰ Иса кәбир шәхерлерде көп гудратлар гөркезсе-де, оларың халкы гүнәлерине тоба этмәндилер. Шонуң үчин Иса олары язгармага башлады:

²¹ «Дат гүнүңе, эй, Хоразин! Дат гүнүңе, эй, Бетсайда! Сизде гөркезилен гудратлар Сур билен Сидонда гөркезилен болсады, онда олар биреййәм җул гейнип, күл үстүнде отурып тоба эдердилер.

²² Эмма Мен сизе диййәрин: кыямат гүни сизиң ягдайыңыз Сур билен Сидоның ягдайындан хас бетер болар!

²³ Эй, Капернаум! Сен арша гөтерилерин өйдйәрсиңми? Ёк, сен довзаха ташланарсың, себәби сенде гөркезилен гудратлар Содомда гөркезилен болсады, онда ол шу гүне ченли сакланып галарды.

²⁴ Эмма Мен саңа шуны диййәрин: кыямат гүни сениң ягдайың Содомың ягдайындан хас бетер болар».

Аргынлары чагырыш

²⁵ Шол вагт Иса сөзүни довам эдип, шейле дийди: «Эй, Атам, ериң ве гөгүң Хөкүмдары! Бу затлары акылдарлардан, дүшүнҗелилерден яшырып, чагалара аян эдениң үчин Саңа шүкүр эдйәрин!

²⁶ Хава, Атам, бу Сениң ислегиңди.

²⁷ Атам әхли зады Маңа табшырды. Оглы Атадан башга хич ким танаян дәлдир. Атаны-да Огулдан ве Оглуң Оны аян этмек ислейән адамларындан башга хич ким танаян дәлдир.

²⁸ Эй, аргынлар, агыр йүклүлер, Мениң яныма гелиң, Мен сизе дынчлык берейин.

²⁹ Мениң боюнтырыгымы дакының-да, Менден өврениң. Мен мылайым хем пес гөвүнлидирин, җаныңыз рахатлык тапар.

³⁰ Мениң боюнтырыгым юмшакдыр, йүкүм еңилдир».