Matta 1 - Мукаддес Китап

1‑нҗи бап Иса Месих иң несил дарагты

¹ Ыбрайымың ве Давудың неслинден болан Иса Месихиң несил дарагтының язгысы, ине, шейледир:

² Ыбрайымдан Ысхак, Ысхакдан Якуп, Якупдан Яхуда ве онуң доганлары дүнйә инди.

³ Яхудадан Перес билен Зерах догулды, оларың эҗеси Тамарды. Пересден Хесрон, Хесрондан Рам догулды.

⁴ Рамдан Эминадап, Эминадапдан Нахшон, Нахшондан Салмон догулды.

⁵ Салмондан Боваз дүнйә инди, онуң эҗеси Рахапды. Боваздан Обет дүнйә инди, онуң эҗеси Рутды. Обет Йышайың какасыды.

⁶ Йышайдан Давут патыша догулды. Давутдан Сүлейман дүнйә инди, онуң эҗеси Урыяның дул аялы Батшебады.

⁷ Сүлеймандан Рехабгам, Рехабгамдан Абыя, Абыядан Аса,

⁸ Асадан Ехошапат, Ехошапатдан Ехорам, Ехорамдан Узыя догулды.

⁹ Узыядан Ётам, Ётамдан Ахаз, Ахаздан Хизкия,

¹⁰ Хизкиядан Манаша, Манашадан Амон, Амондан Ёшыя догулды.

¹¹ Ёшыя Бабыл сүргүниниң өңүсырасында доглан Еконяның ве онуң доганларының атасыды.

¹² Еконя Бабыл сүргүнинден соңра доглан Шеялтыелиң атасыды. Шеялтыелден Зерубабыл,

¹³ Зерубабылдан Абыхут, Абыхутдан Элиякым, Элиякымдан Азор,

¹⁴ Азордан Садок, Садокдан Акым, Акымдан Элихут,

¹⁵ Элихутдан Элгазар, Элгазардан Маттан, Маттандан Якуп догулды.

¹⁶ Якуп Меръемиң адамсы Юсубың атасыды, Меръемден болса Месих дийип атландырылан Иса догулды.

¹⁷ Шейлеликде, Ыбрайымдан Давуда ченли болан несиллер җеми он дөрт аркадыр. Давутдан Бабыл сүргүнине ченли хем он дөрт, Бабыл сүргүнинден Месихе ченли хем он дөрт аркадыр.

Иса Месих догуляр

¹⁸ Иса Месихиң доглушы шейле болды: Онуң эҗеси Меръем билен Юсуп адаглыды, эмма олар энтек яссыкдаш болманкалар, Меръем өзүниң Мукаддес Рух аркалы гөврели боландыгыны билди.

¹⁹ Онуң адаглысы Юсуп догручыл адамды, шоңа гөрә ол Меръемиң иле масгара болмагыны ислемән, оны яшырын айрып гойбермеги йүрегине дүвди.

²⁰ Юсуп бу хакда ойланып йөркә, Реббиң бир перишдеси онуң дүйшүне гирип: «Эй, Давут оглы Юсуп! Сен Меръеме өйленмекден горкма, себәби онуң гөвресиндәки Мукаддес Рух аркалыдыр.

²¹ Ол бир Огул дограр, сен Онуң адына Иса дакарсың, себәби Ол Өз халкыны гүнәлеринден халас эдер» дийди.

^22-23 Буларың хеммеси Реббиң пыгамбер аркалы: «Ине, бой гыз гөврели болуп, Огул дограр. Онуң адына Иманувел дакарлар» дийип айдан сөзүниң берҗай болмагы үчин болды. Бу ат «Худай бизиң билендир» диймеги аңладяр.

²⁴ Юсуп укудан оянансоң, Реббиң перишдесиниң буйругыны ерине етирип, Меръеме өйленди.

²⁵ Эмма Меръем оглуны догурянча, Юсуп оңа янашмады. Юсуп доглан чаганың адына Иса дакды.