Mark 8 - Мукаддес Китап

8‑нҗи бап Иса дөрт мүң адамы доюряр

¹ Шол гүнлер ене бир улы мәхелле йыгнанды. Оларың иймәге хич затлары болмансоң, Иса шәгиртлерини янына чагырып, олара:

² «Бу мәхеллә хайпым гелйәр! Булар үч гүн бәри Мениң янымда, иймәге хем хич затлары ёк.

³ Булары өйлерине ач гойберсем, ёлда ысгындан гачарлар. Оларың кәбири узак ерден гелипдир» дийди.

⁴ Шәгиртлери Ондан: «Бу чөллүкде олары дойрар ялы чөреги ниреден тапып боларка?» дийип сорадылар.

⁵ Иса: «Нәче чөрегиңиз бар?» дийип, оларың өзлеринден сорады. Олар: «Еди саны» дийип җогап бердилер.

⁶ Онсоң Иса мәхеллә ерде отурмагы буюрды. Еди чөреги алып, шүкүр эденинден соң, бөлүшдирди-де, пайламак үчин шәгиртлерине берди. Олар хем булары мәхеллә пайладылар.

⁷ Оларың бираз балыклары хем барды. Иса шүкүр эденинден соң, олары хем пайламагы буюрды.

⁸ Хеммелер ийип дойдулар, артып галан бөлеклери йыгнап, еди себеди долдурдылар.

⁹ Иенлер дөрт мүңе голай адамды. Онсоң Иса олары угратды.

¹⁰ Өзи болса дессине шәгиртлери билен гайыга мүнүп, Далманута себитлерине гитди.

Фарисейлериң ве Хиродың хамырмаясындан әгә болуң!

¹¹ Фарисейлер гелип, Иса билен җеделлешмәге башладылар. Оны сынаҗак болуп, гөкден бир гудратлы аламат гөркезмегини талап этдилер.

¹² Ол хем ах чекип: «Нәме үчин бу несил аламат талап эдйәр? Сизе догрусыны айдярын, бу несле хич бир аламат гөркезилҗек дәлдир» дийди.

¹³ Иса оларың янындан гитди ве ене гайыга мүнүп, бейлеки кенара гечди.

¹⁴ Шәгиртлери чөрек алмагы унудан экенлер. Гайыкда янларында диңе екеҗе чөрек барды.

¹⁵ Иса олара: «Хүшгәр болуң! Фарисейлер билен Хиродың хамырмаясындан әгә болуң» дийип, дуйдурыш берди.

¹⁶ Олар болса өзара чекелешип: «Иса муны бизиң чөрегимизиң ёкдугы үчин айдяр» дийишйәрдилер.

¹⁷ Иса оларың нәме дийишйәндиклерини билип, олардан: «Нәме үчин чөрегимиз ёк дийшип чекелешйәрсиңиз? Сизиң энтегем акылыңыз етенокмы, дүшүнмейәрсиңизми? Йүрегиңиз шейле гатымы?

¹⁸ Гөзли болуп, гөрмейәрсиңизми? Гулаклы болуп, эшитмейәрсиңизми? Болуп гечен затлар ядыңыза дүшмейәрми?

¹⁹ Мен бәш чөреги бәш мүң адама бөлүп пайланымда, галан дөвүмлерден нәче себет долдурыпдыңыз?» дийип сорады. Олар: «Он ики» дийип җогап бердилер.

²⁰ Иса ене: «Еди чөреги дөрт мүң адама бөлүп пайланымда, артып галаны нәче себет болупды?» дийип сорады. Олар: «Еди» дийдилер.

²¹ Шонда Иса олара: «Энтек хем дүшүнмейәрсиңизми?» дийди.

Иса көр адамы сагалдяр

²² Онсоң Иса билен шәгиртлери Бетсайда гелдилер. Ол ерде Исаның янына бир көр адамы гетирдилер ве оңа элини дегирмегини сорап, Оңа ялбардылар.

²³ Иса көр адамың элинден тутуп, оны обаның дашына чыкарды. Иса онуң гөзлерине түйкүрип, эллерини онуң башына гоюп: «Бир зат гөрйәрсиңми?» дийип сорады.

²⁴ Көр башыны галдырып: «Адамлары гөрйәрин, олар йөрәп барян агачлар ялы болуп гөрүнйәр» дийди.

²⁵ Иса ене-де эллерини онуң гөзлерине гойды. Көр чиңерилип серетди, шыпа тапып, бар зады айдың гөрди.

²⁶ Иса: «Оба гирме» дийип, оны өйүне иберди.

Петрус Исаның Месих дигини ыкрар эдйәр

²⁷ Иса шәгиртлери билен Кайсария-Филип шәхериниң голайындакы обалара гитди. Ёлда Иса шәгиртлеринден: «Адамлар Маңа ким диййәрлер?» дийип сорады.

²⁸ Шәгиртлери: «Кәбирлери Яхя чүмдүриҗи, кәбирлери Ыляс, башга бирлери-де – пыгамберлерден бири диййәрлер» дийип җогап бердилер.

²⁹ Иса олардан: «Сиз Маңа ким диййәрсиңиз?» дийип сорады. Петрус: «Сен Месихсиң» дийип җогап берди.

³⁰ Шонда Иса олара Өзи хакында хич киме хич зат айтмазлыгы табшырды.

Иса өлүп дирелҗегини өңүнден айдяр

³¹ Онсоң Иса шәгиртлерине Ынсан Оглуның көп гөргүлер гөрмелидиги, яшулулар, ёлбашчы руханылар, Төврат мугаллымлар тарапындан рет эдилмелидиги, өлдүрилмелидиги ве үч гүнден соң дирелмелидиги хакында өвретмәге башлады.

³² Ол бу сөзлери ачык айтды. Петрус болса Оны бир чете чекип, Онуң айданларына гаршы чыкмага башлады.

³³ Эмма Иса өврүлип, шәгиртлерине серетди ве Петруса: «Чекил өңүмден, шейтан! Сен Худайың ишлерини дәл-де, ынсан ишлери хакда ойланярсың» дийип кәеди.

³⁴ Иса шәгиртлери билен бирликде мәхелләни-де янына чагырып, олара шейле дийди: «Ким Мениң ызыма эермек ислейән болса, өзүни инкәр этсин-де, хачыны алып ызыма дүшсүн.

³⁵ Ким җаныны халас этмек ислесе, оны йитирер, йөне ким җаныны Мениң ве Хош Хабарың угрунда йитирсе, оны халас эдер.

³⁶ Ынсан тутуш дүнйәни газаныбам, җанындан махрум болса, оңа нәме пейдасы бар?

³⁷ Ынсан өз җанына дерек нәме берип билер?

³⁸ Бу бивепа, гүнәкәр неслиң арасында ким Менден ве Мениң сөзлеримден утанса, Ынсан Оглы-да Атасының шөхратында мукаддес перишделери билен гелен махалы ондан утанар».