Mark 7 - Мукаддес Китап

7‑нҗи бап Адамы нәме мурдар эдйәр?

¹ Иерусалимден гелен фарисейлер билен бирнәче Төврат мугаллымлары Исаның дашына үйшдүлер.

² Олар Исаның шәгиртлеринден кәбириниң элини ювман нахар ийип, яхудыларың дессурыны бозандыгыны гөрдүлер.

³ Фарисейлер билен әхли яхудылар ата-бабаларындан галан дессур боюнча эллерини оңат ювмаздан нахар иймейәрдилер.

⁴ Базардан геленлеринде-де, ювунман хич зат иймейәрдилер. Шейле-де кәсе, гап-чанак, газанлары тәмизлемек ялы дессурлары хем саклаярдылар.

⁵ Шонуң үчин фарисейлер билен Төврат мугаллымлары Исадан: «Нәме үчин Сениң шәгиртлериң ата-бабаларымыздан галан адата эермейәрлер? Нәме үчин эллерини ювман нахар иййәрлер?» дийип сорадылар.

⁶ Иса олара: «Ишая пыгамбер сиз икийүзлүлер хакда җайдар пыгамберлик эдипдир! Онда шейле язылан: „Бу халк Мени дилинде хорматлаяр, эмма йүреклери Менден узакдадыр.

⁷ Бидерек ере Маңа сежде эдйәрлер, таглымат дийип өвредйәнлери ынсан буйрукларыдыр“.

⁸ Сиз ынсан дәп-дессурларына эерип, Худайың буйругыны терк эдйәрсиңиз» дийди.

⁹ Иса ене олара шейле дийди: «Өз адатларыңызы берҗай этмек үчин, сиз Худайың буйрукларындан йүз дөндермегиң оңат ёлуны тапыпсыңыз!

¹⁰ Муса: „Ата-энеңе хормат гой“ ве „Атасына я-да энесине гарган адам өлүме хөкүм эдилсин“ дийип буйрупды.

^11-12 Эмма сиз кимдир бириниң эне-атасына: „Мен сизе көмек эдип билҗек дәл. Сизе бермеги ниет эден затларым корбандыр“ (корбан – „Худая садака“ диймеги аңладяр) дийип айтмагыны догры хасаплаярсыңыз, шунлукда, сиз оңа өз ата-энесине көмек бермеги гадаган эдйәрсиңиз.

¹³ Шейдип, сиз несилден-несле галдырян адатларыңызың хатырасына Худайың сөзүни пуҗа чыкарярсыңыз. Башга-да шуңа меңзеш көп затлары эдйәрсиңиз».

¹⁴ Ол мәхелләни ене янына чагырып, олара: «Хеммәңиз Мени диңләң хем дүшүниң.

¹⁵ Адамың ичине гирйән хич бир зат оны мурдар эдип билмез. Адамы мурдар эдйән затлар онуң өз ичинден чыкяндыр» дийди.

¹⁷ Ол мәхелләниң янындан айрылып, өе гиренде, шәгиртлери Ондан бу тымсалың манысыны сорадылар.

¹⁸ Иса олара: «Эйсем, сиз хем дүшүнеңзокмы? Адамың ичине гирен хич бир задың оны мурдар этмейәндигини билмейәрсиңизми?

¹⁹ Булар адамың йүрегине дәл-де, гарнына гирйәр, ол ерден-де дашары чыкяр» дийип җогап берди. Шейле диймек билен, Иса әхли иймитлериң тәмиздигини ыглан этди.

²⁰ Ол ене: «Адамы мурдар эдйән онуң өз ичинден чыкян затлардыр.

^21-22 Чүнки ичден, адамың йүрегинден эрбет пикирлер, азгынлык, огурлык, ганхорлык, зынахорлык, ачгөзлүк, яманлык, хиле, ахлаксызлык, гөриплик, сөгүнч, текепбирлик ве акмаклык чыкяр.

²³ Бу эрбет затларың әхлиси ичден чыкып, адамы мурдар эдйәр» дийди.

Сириялы аялың иманы

²⁴ Иса ол ерден чыкып, Сур шәхериниң төверегине гитди. Ол бир өе барды ве хич кимиң бу барада билмегини ислемейәрди, йөне муны гизлин саклап билмеди.

²⁵ Кичиҗик гызыны арвах-җын эелән бир аял Иса хакдакы хабарлары эшиден бадына гелип, Онуң аягына йыкылды.

²⁶ Ол аялың аслы Сирияның Финикия үлкесинден болуп, ол яхуды дәлди. Ол гызындан арвах-җыны ковуп чыкармагыны сорап, Иса ялбарды.

²⁷ Иса оңа: «Гой, өңүрти чагалар дойсун. Чагаларың чөрегини алып, итлере зыңмак догры дәлдир» дийди.

²⁸ Аял хем: «Хава, Агам! Йөне итлер хем чагаларың сачак башында дөкен чөрек овунтыкларындан иййәндир» дийди.

²⁹ Иса оңа: «Бу сөзүң үчин, бар, гидибер, арвах-җын сениң гызыңдан чыкды» дийди.

³⁰ Аял өйүне баранда, гызының арвах-җындан халас болуп, дүшегинде ятаныны гөрди.

Иса кер адама шыпа берйәр

³¹ Онсоң Иса Сур ве Сидон этрапларындан гайдып, Декаполис себитлериниң үсти билен Җелиле көлүне гелди.

³² Исаның янына кер хем пелтек бир адамы гетирип, онуң башына элини гоймагыны сорап, Оңа ялбардылар.

³³ Иса ол адамы мәхелләниң ичинден бир чете чыкарып, бармакларыны онуң гулакларына сокды, түйкүрип, онуң дилине элини дегирди.

³⁴ Онсоң гөге бакып, улудан демини алды-да: «Эффата!», ягны «Ачыл» дийди.

³⁵ Яңкы адамың гулаклары шобада ачылып, дили дүрс геплемәге башлады.

³⁶ Иса муны гөренлере бу барада хич киме айтмазлыгы табшырды. Эмма Ол нәче көп табшырса, олар бу хабары шонча-да көп яйратдылар.

³⁷ Халк чакданаша геңиргенишип: «Ол әхли задың хөтдесинден гелйәр, хатда керлериң гулагыны, лалларың дилини ачяр» дийишйәрди.