Mark 6 - Мукаддес Китап

6-нҗы бап Насырада Иса хормат гоюлмаяр

¹ Иса ол ери ташлап, Өз догдук меканына гитди. Шәгиртлери хем Онуң ызына дүшүп гитдилер.

² Сабат гүни Иса синагогада халка өвретмәге башлады. Онуң айдян затларыны эшиден көп адамлар хайран галып: «Бу Адам мунча зады ниреден өврендикә? Оңа бейле даналыгы ким бердикә? Ол нәдип бейле мугҗызалары гөркезмеги башарярка?

³ Ол Меръемиң нечҗар оглы дәлми? Ёгса-да Ол Якуп, Ёсе, Яхуда ве Симун дагың доганы дәлми нәме? Онуң уялары-да бизиң арамызда яшаярлар ахыры!» дийшип, Исаның болшундан нәгиле болдулар.

⁴ Онсоң Иса олара: «Пыгамбериң диңе өз догдук юрдунда, гарындашларының арасында ве өйүнде гадыры ёкдур» дийди.

⁵ Ол бирнәче хассаның башына элини гоюп сагалтмакдан башга ол ерде хич бир мугҗыза гөркезип билмеди.

⁶ Иса оларың имансыздыгына гең галды. Шондан соң Иса төверекдәки обалара айланып вагыз этди.

Иса шәгиртлерини халкың арасына иберйәр

⁷ Иса он ики шәгирдини янына чагырып, олары ики-икиден ёлламага башлады ве олара арвах-җынларың үстүнден ыгтыяр берди.

⁸ Олара шейле буйрук берди: «Ёл үчин яныңыза хасадан башга хич зат алмаң. Не чөрек, не торба, не-де гушагыңызда пул – хич зат болмасын.

⁹ Аягыңыза чарык гейиң, эгниңизе артыкмач эшик алмаң».

¹⁰ Иса ене олара: «Хайсы өе барсаңыз, гайдянчаңыз шол өйде болуң.

¹¹ Эгер адамлар сизи кабул этмеселер, диңлемеселер, ол ерден чыкып баряркаңыз, олара гаршы шаятлык хөкмүнде аякларыңызың тозуны какың» дийди.

¹² Шунлук билен, олар ёла дүшдүлер ве әхли адамлары тоба чагырып, вагыз этмәге башладылар.

¹³ Олар көп арвах-җынлары ковуп чыкардылар, энчеме хассалара яг гуюп, олара шыпа бердилер.

Яхя чүмдүриҗиниң өлүми

¹⁴ Болуп гечйән затлары Хирод патыша-да эшитди, себәби Исаның ат-овазасы ил арасына яйрапды. Кәбир адамлар: «Яхя чүмдүриҗи өлүмден дирелипдир. Ол шол себәпли бу мугҗызалары гөркезип билйәр» диййәрдилер.

¹⁵ Бейлекилер болса: «Бу – Ыляс», кәбирлери-де: «Бу өңки пыгамберлериң бири ялы пыгамбердир» дийишйәрдилер.

¹⁶ Хирод булары эшидип: «Мениң башыны чапдыран Яхям дирелипдир!» дийди.

^17-18 Хирод доганы Филипиң аялы Хиродия өйленипди. Яхя болса Хирода: «Сениң өз доганыңың аялына өйленмегиң догры дәл» дийипди. Шонуң үчин Хирод адам иберип, Яхяны тутдурыпды, онуң эл-аягыны гандаллап, зындана салдырыпды.

¹⁹ Шейлеликде, Хиродия Яхя гаршы йүрегинде кине саклап, оны өлдүрмек ислейәрди, йөне бу элинден гелмейәрди.

²⁰ Себәби Хирод Яхяның догры хем мукаддес адамдыгыны билип, ондан хедер этди ве оны горады. Оны диңледигиче, ховсала дүшйәрди, эмма шонда-да хөвес билен диңләрди.

²¹ Бир гүни аматлы пурсат габат гелди. Хирод өз доглан гүни мынасыбетли көшк эмелдарларыны, мүңбашылары ве Җелиләниң танымал адамларыны чагырып, той тутды.

²² Хиродияның гызы ичери гирип, танс эдип, Хиродың ве онуң мыхманларының гөвнүни чаглады. Патыша гыза: «Ислән задыңы диле, саңа берейин» дийди.

²³ Онсоң ант ичип, патыша ене-де: «Менден нәме дилегиң болса айт, шалыгымың ярысы-да болса, саңа берерин» дийди.

²⁴ Гыз хем дашары чыкып эҗесинден: «Нәме диләйин?» дийип сорады. Ол хем: «Яхя чүмдүриҗиниң башыны» дийип җогап берди.

²⁵ Гыз дессине патышаның янына ылгап гелди-де: «Хәзириң өзүнде Яхя чүмдүриҗиниң башыны бир табакда гоюп, маңа бермегиңи ислейәрин» дийди.

²⁶ Патыша гаты тукатланды, эмма мыхманларың янында ант иченсоң, гызың дилегини битирмән, ызына гайтармак ислемеди.

²⁷ Дессине бир җеллады ёллап, Яхяның башыны гетирмеги буюрды. Җеллат барып, зынданда Яхяның башыны чапды.

²⁸ Чапылан башы бир табакда гетирип, гыза берди. Гыз-да оны эҗесине элтип берди.

²⁹ Яхяның шәгиртлери муны эшидип, онуң җеседини әкитдилер ве оны бир мазарда җайладылар.

Иса бәш мүң адамы доюряр

³⁰ Ресуллар Исаның янына йыгнанып, әхли эден ишлери, халка өвреден затлары барада Оңа хабар бердилер.

³¹ Иса олара: «Гелиң, еке өзүмиз бир чола ере гидип, бираз дем-дынч алалың» дийди. Гелип-гидйәнлериң көплүгинден яңа, оларың нахар эдинмәге-де эллери дегмейәрди.

³² Онсоң олар гайыга мүнүп, еке өзлери бир чола ере гитдилер.

³³ Гидип баряркалар, халайык олары гөрүп танады. Шонда әхли шәхерлерден адамлар пыяда ёла дүшдүлер ве хайдашып, ол ере олардан өң бардылар.

³⁴ Иса гайыкдан дүшенде, улы мәхелләни гөрүп, олара хайпы гелди, себәби олар чопансыз гоюнлар ялыды. Шонуң үчин олара көп затлары өвретмәге башлады.

³⁵ Вагт гиҗигенден соң, шәгиртлер Исаның янына гелип: «Бу бир чола ер, вагт хем гиҗикди.

³⁶ Халкы гойбер, төверекдәки обалара гидип, өзлерине иймәге зат сатын алсынлар» дийдилер.

³⁷ Эмма Иса: «Олара иймәге зады сиз бериң» дийди. Олар: «Эйсем биз ики йүз күмүш теңңәни чөреге сарп эдип, олара ийдирелими?» дийдилер.

³⁸ Иса олардан: «Барың, гөрүң, нәче чөрегиңиз бар?» дийип сорады. Гөренлеринден соң олар: «Бәш чөрек билен ики балыгымыз бар» дийдилер.

³⁹ Шонда олара хемме адамлары топар-топар эдип, отуң үстүнде отуртмагы буюрды.

⁴⁰ Шейлеликде, олар йүз-йүзден, элли-эллиден топар-топар болуп отурдылар.

⁴¹ Иса бәш чөрек билен ики балыгы алып, гөзлерини гөге дикип шүкүр этди ве чөреклери бөлүшдирип, халка пайлар ялы, шәгиртлерине берди. Ики балыгы-да оларың хеммесине пайлады.

⁴² Хеммелер ийип дойдулар.

⁴³ Шәгиртлер артан чөрек бөлеклерини, балыкларың овнукларыны йыгнап, он ики себеди долдурдылар.

⁴⁴ Чөреклери иен эркеклериң саны бәш мүң адамды.

Иса сувуң йүзүнден йөрейәр

⁴⁵ Иса халкы өйлерине уградып дурка, шәгиртлерине гайыга мүнүп, Өзүнден өң бейлеки кенардакы Бетсайда гечмеклерини буюрды.

⁴⁶ Иса олар билен хошлашандан соң, Худая дога этмек үчин дага чыкды.

⁴⁷ Агшам дүшенде, гайык көлүң ортасындады, Исаның болса еке Өзи кенардады.

⁴⁸ Иса оларың гайыгы кынлык билен күрекләп баряндыкларыны гөрди, себәби ел оларың гаршысындан өвүсйәрди. Даңдана голай Иса көлде сувуң йүзүнден йөрәп, олара тарап гелди ве янларындан гечип гитҗек болды.

⁴⁹ Эмма олар Онуң сувуң йүзүнден йөрәп гелйәнини гөренлеринде, гөзлерине арвах гөрүнйәндир өйдүп гыгырышдылар.

⁵⁰ Хеммелер Оны гөрүп горкдулар. Эмма Иса дессине олара сөз гатып: «Бу – Мен, горкмаң! Догумлы болуң!» дийди.

⁵¹ Онсоң оларың янына гайыга мүнди, ел хем ятды. Олар хас бетер геңиргенишип хайран галдылар.

⁵² Олар хенизем чөрекли мугҗыза дүшүнмәндилер, бу оларың аңына барып етенокды.

Иса Гиннесаретде хассалара шыпа берйәр

⁵³ Олар көлүң бейлеки тарапына гечип, Гиннесарете гелип етдилер ве ол ерде гайыгы багладылар.

⁵⁴ Гайыкдан дүшен батларына халк Исаны танады.

⁵⁵ Адамлар ылгашып, шол төверекдәки ерлере бойдан-баша айландылар ве хассаларыны дүшеклери билен Исаның янына гетирдилер. Олар хер сапар Исаның ниредедигини эшитселер, хассаларыны шол ере гетирип башладылар.

⁵⁶ Иса нирә барса, оба болсун, шәхер болсун я-да шәхерче, адамлар хассалары мейданларда ятырып, диңе донуның сыйына эллерини дегирмәге ругсат этсин дийип, Оңа ялбарярдылар. Оңа эл дегренлериң хеммеси-де шыпа тапярды.