Mark 3 - Мукаддес Китап

3‑нҗи бап Иса Сабат гүни шыпа берйәр

¹ Башга бир гүн Иса ене синагога гитди. Ол ерде эли шел ачан бир адам барды.

² Кәбир адамлар Исаны айыплаҗак болуп, Сабат гүни бу адама шыпа берермикә дийип, Оны аңтаярдылар.

³ Иса эли шел ачан адама: «Ериңден тур-да, орта чык!» дийди.

⁴ Онсоң олардан: «Канун боюнча Сабат гүни ягшылык этмек догрумы я-да яманлык? Бириниң җаныны халас этмек догрумы я-да өлдүрмек?» дийип сорады. Олардан сес чыкмады.

⁵ Иса төверегиндәкилере гахар билен бакып, оларың доңйүрекдигине гынанды. Яңкы адама: «Элиңи узат!» дийди. Ол хем элини узатды велин, эли долы сагалды.

⁶ Фарисейлер дашары чыкып, Исаны нәдип ёк этмелидиги барада Хиродың тарапдарлары билен маслахат гечирдилер.

Улы мәхелле Исаның ызына дүшйәр

⁷ Иса шәгиртлери билен көлүң якасына гитди. Җелиледен бир улы мәхелле хем Онуң ызына дүшүп гитди.

⁸ Онуң битирен ишлерини эшидип, Яхудыядан, Иерусалимден, Идумеядан, Иордан дерясының аңырсындан, Сур ве Сидон төвереклеринден улы мәхелле янына гелди.

⁹ Иса мәхелләниң ичинде гысылмазлык үчин, Өз шәгиртлерине бир гайыгы тайярлап гоймагы буюрды.

¹⁰ Иса энчеме адама шыпа берди, шонуң үчин хемме хассалар Оңа эллерини дегирҗек болуп, янына итеклешип гелйәрдилер.

¹¹ Арвах-җын эеләнлер Исаны гөренлеринде, Онуң аягына йыкылып: «Сен Худайың Оглусың!» дийип гыгырярдылар.

¹² Эмма Ол Өзүниң кимдигини хич киме айтмазлыгы берк табшырды.

Иса он ики шәгирдини сайлаяр

¹³ Онсоң Иса дага чыкып, Өз сайлан адамларыны янына чагырды, олар Онуң янына бардылар.

^14-16 Иса он ики адамы сайлап алып, олара ресуллар дийип ат берди. Онуң вагыз этмәге иберен, хассалары сагалдып, арвах-җынлары ковмага ыгтыяр берен бу он ики ресулы шулардыр: Симун – Иса оңа Петрус дийип ат берди,

¹⁷ Зебедейиң огуллары Якуп билен Ёханна – Иса олара Бованергес диен лакамы берди, (бу «Гөк гүррүлдисиниң огуллары» диймеги аңладяр),

¹⁸ онсоң Андрыс, Филип, Бартоломей, Матта, Томас, Алфейиң оглы Якуп, Таддей, ватанчы Симун

¹⁹ ве Иса хайынлык эден Юдас Искариот.

Иса ве Беелзебул

²⁰ Соңра Иса бир өе барды. Ол ерде хем хемишекилер ялы, ене-де улы мәхелле йыгнанансоң, Исаның шәгиртлери билен нахар иймәге-де вагтлары болмады.

²¹ Исаның хоссарлары бу барада эшиденде: «Иса акылындан азашыпдыр» дийип, Оны әкитмәге гелдилер.

²² Иерусалимден гелен Төврат мугаллымлары болса: «Оны җынларың хөкүмдары Беелзебул эеләпдир! Ол арвах-җынлары Беелзебул аркалы ковуп чыкаряр» дийишйәрдилер.

²³ Шонуң үчин Иса халкы янына чагырып, тымсаллар аркалы сөзе башлады: «Шейтан өз-өзүни нәдип ковуп чыкарсын?

²⁴ Бир патышалыгың ичинде бөлүнишик болса, ол патышалык берк дуруп билмез.

²⁵ Бир хоҗалыгың ичинде бөлүнишик болса, ол машгала берк дуруп билмез.

²⁶ Шейтан өз-өзүне гаршы чыкып бөлүнсе, берк дуруп билмез, онуң соңуның гелдигидир.

²⁷ Хич ким бир гүйчли адамың өйүне гирип, малыны талап билмез; өңүрти оны тутуп даңмалы болар, онсоң өйүни талар.

²⁸ Сизе догрусыны айдярын: ынсанларың хемме гүнәлери, хер бир зада дил етирмелери багышланар.

²⁹ Эмма Мукаддес Руха дил етирене асла багышланма ёкдур. Бу эбедилик гүнә болуп, онуң бойнундан асылар».

³⁰ Иса муны: «Ол – арвах-җынлы» диенлери үчин айтды.

Исаның эҗеси ве инилери

³¹ Онсоң Онуң эҗеси билен инилери гелди. Олар дашарда дуруп, Исаны чагырмак үчин, Онуң янына адам ибердилер.

³² Мәхелле Исаның дашыны алып отырды. Оңа: «Эҗең, инилериң ве уяларың дашарда Сени сораярлар» дийдилер.

³³ Иса олара җогап берип: «Мениң эҗем, доганларым ким?» дийди.

³⁴ Онсоң дашыны алып отуранлара середип: «Ине, Мениң эҗем, доганларым шулардыр!

³⁵ Худайың ислегини ким берҗай этсе, шол Мениң доганым, уям хем эҗемдир» дийди.