Mark 16 - Мукаддес Китап

16-нҗы бап Иса дирелйәр

¹ Сабат гүни тамамланансоң, гич өйлән магдалалы Меръем, Якубың эҗеси Меръем ве Саломе дагы гидип, Исаның җеседине чалмак үчин якымлы ыслы затлар сатын алдылар.

² Хепдәниң биринҗи гүни олар гүн доганда, мазарың башына гелдилер.

³ Олар бири-бирлерине: «Мазарың агзындан дашы бизе ким айрып береркә?» дийишйәрдилер.

⁴ Башларыны галдырып середенлеринде, дашың бир чете тогаланандыгыны гөрдүлер. Даш гаты улуды.

⁵ Мазара гиренлеринде болса, саг тарапда ак лыбас гейнен бир яш йигидиң отурандыгыны гөрүп геңиргенишдилер.

⁶ Ол булара: «Геңиргенмәң! Сиз хача чүйленен насыралы Исаны гөзлейәрсиңиз. Иса дирелди! Ол бу ерде ёк. Ине, Онуң җесединиң гойлан ери.

⁷ Инди болса барың-да, Онуң шәгиртлерине ве Петруса: „Иса сизден өң Җелилә баряр, Өзүниң сизе айдышы ялы, Оны шол ерде гөрерсиңиз“ дийиң» дийди.

⁸ Аяллар мазардан чыкып гачдылар. Олары сандырама хем алҗыраңңылык гаплап алыпды. Олар горкуларындан яңа хич киме хич зат айтмадылар.

Иса шәгиртлерине гөрүнйәр

⁹ Иса хепдәниң биринҗи гүни ир билен дирелди. Ол илки билен магдалалы Меръеме гөрүнди. Иса онуң ичинден еди арвах-җыны ковуп чыкарыпды.

¹⁰ Меръем гидип, муны Иса билен болан, инди болса Оңа яс тутуп, аглашып отуран шәгиртлерине хабар берди.

¹¹ Эмма олар Исаның диридигини ве Меръеме гөрнендигини эшиденлеринде, муңа ынанмадылар.

¹² Шондан соң Иса оба тарап барян ики шәгирдине башга кешпде гөрүнди.

¹³ Ол икиси хем ызларына өврүлип, муны бейлекилере хабар бердилер, эмма олар булара-да ынанмадылар.

¹⁴ Соңра Иса сачак башында отуран Онбирлериң өзлерине гөрнүп, имансыздыклары, йүреклериниң текепбирдиги үчин олара кәеди. Себәби олар Онуң дирелендигини гөрен адамлара ынанмандылар.

Иса шәгиртлерини бүтин дүнйә ёллаяр

¹⁵ Иса шәгиртлерине шейле дийди: «Бүтин дүнйә айланың-да, Хош Хабары хемме адамлара вагыз эдиң.

¹⁶ Иман эдип чүмдүрилен халас болар, йөне иман этмедиге хөкүм эдилер.

¹⁷ Иман эдйәнлер шу аламатлары гөркезерлер: Мениң адым билен арвах-җынлары ковуп чыкарарлар, тәзе диллерде гепләрлер.

¹⁸ Эллери билен йылан тутсалар-да, зәхер ичселер-де, олара зепер етмез. Эллерини хассаларың башына гоярлар, олар хем сагалар».

¹⁹ Реб Иса олара булары гүррүң беренинден соң, гөге алынды ве Худайың сагында отурды.

²⁰ Онсоң шәгиртлер гидип, Хош Хабары хемме ерде вагыз этдилер. Реб олар билен ишләп, амала ашян гудратлы аламатлар аркалы Өз сөзүни тассыклаярды.