Mark 15 - Мукаддес Китап

15‑нҗи бап Иса Пилатың өңүнде

¹ Ир сәхер билен ёлбашчы руханылар, яшулулар, Төврат мугаллымлары ве тутуш меҗлис маслахат гечирип, Исаны даңып, Пилата табшырдылар.

² Пилат Исадан: «Сен яхудыларың патышасымы?» дийип сорады. Иса: «Айдышың ялыдыр» дийип җогап берди.

³ Ёлбашчы руханылар Оны көп затларда айыпладылар.

⁴ Пилат ене-де Оңа: «Сен хич хили җогап берҗек дәлми? Гөр, нәче затларда Сени айыплаярлар!» дийди.

⁵ Эмма Иса башга хич хили җогап бермеди. Пилат гең галды.

Иса өлүме хөкүм эдилйәр

⁶ Пилат хер Песах байрамында халкың хайышы боюнча бир туссагы бошадярды.

⁷ Питнеде адам өлдүрен гозгалаңчылар билен биле туссаг эдилен Бараббас атлы бири барды.

⁸ Халк Пилатың янына гелип, хемишекиси ялы, өзлери үчин бир туссагы бошатмагыны сорамага башлады.

⁹ Онсоң Пилат олара җогап берип: «Сизиң үчин яхудыларың патышасыны бошатмагымы ислейәрсиңизми?» дийип сорады.

¹⁰ Ол ёлбашчы руханыларың Исаны гөрипликден табшырандыкларыны билйәрди.

¹¹ Эмма ёлбашчы руханылар Исаның дерегине Бараббасы бошатмагыны талап эдиң дийип, халкы күшгүрдилер.

¹² Пилат ене олардан: «Онда мен сизиң яхудыларың патышасы диййән адамыңызы нәме эдейин?» дийип сорады.

¹³ Олар болса: «Оны хача чүйле!» дийип гыгырышдылар.

¹⁴ Пилат олардан: «Нәме үчин? Ол нәме яманлык этди?» дийип сорады. Эмма олар: «Оны хача чүйле!» дийип, хас бетер гыгырышдылар.

¹⁵ Шонда Пилат халкы канагатландырмак карарына гелип, Бараббасы бошатды. Исаны болса гамчыладып, хача чүйлемек үчин, эсгерлериң элине берди.

Эсгерлер Исаны масгаралаярлар

¹⁶ Эсгерлер Исаны хөкүмет сарайына элтип, тутуш гошун топарларыны Онуң дашына үйшүрдилер.

¹⁷ Онуң эгнине гырмызы дон, башына тикенден өрүлен тәч гейдирдилер.

¹⁸ «Яшасын яхудыларың патышасы!» дийип, Оны гызгын гаршылан болдулар.

¹⁹ Башына таяк билен урдулар, үстүне түйкүрдилер, өңүнде дыза чөкүп, Оңа сежде эден болдулар.

²⁰ Оны масгараланларындан соң, гырмызы доны эгнинден чыкардылар-да, Өз эгин-эшигини гейдирип, хача чүйлемәге әкитдилер.

Иса хача чүйленйәр

²¹ Шол вагт киринейли Симун атлы бир адам экин мейданындан гелйәрди. Ол Исгендер билен Руфусың какасыды. Эсгерлер оны тутуп, Исаның хачыны гөтермәге меҗбур этдилер.

²² Олар Исаны Голгота (бу «Келлечанак депеси» диймеги аңладяр) диен ере элтдилер.

²³ Онсоң олар Исаның агырыларыны кемелтмек үчин, Оңа мүр гарылан шерап хөдүрледилер, эмма Ол ичмеди.

²⁴ Соңра Оны хача чүйледилер. Киме нәме дүшеркә дийип биҗе атышып, Онуң эгин-эшигини өзара пайлашдылар.

²⁵ Оны хача чүйләнлеринде, ир сагат докузды.

²⁶ Депесиндәки этмиш язгысында болса: «ЯХУДЫЛАРЫҢ ПАТЫШАСЫ» дийип язылгыды.

²⁷ Иса билен биле ики гаракчыны хем хача чүйледилер. Оларың бири Исаның саг тарапында, бейлекиси чеп тарапындады.

²⁹ Гечип барянлар башларыны яйкап, Исаны яңсылаярдылар. Олар: «Пәхей-де велин, Сен ыбадатхананы йыкып, үч гүнде салҗакдың-а.

³⁰ Инди хачдан ашак дүш-де, Өзүңи халас эт!» диййәрдилер.

³¹ Ёлбашчы руханылар билен Төврат мугаллымлары-да Исаны хут шунуң ялы масгаралап, бири-бирлерине: «Өзгелери халас этди, эмма Өзүни халас эдип биленок.

³² Ысрайылың Патышасы Месих, гой, хәзириң өзүнде хачдан ашак дүшсүн, биз хем муны гөрүп иман эдели» диййәрдилер. Иса билен хача чүйлененлер-де Оңа сөгйәрдилер.

Исаның өлүми

³³ Гүнортан он икиден өйлән сагат үче ченли тутуш юрды гараңкылык гаплап алды.

³⁴ Өйлән сагат үчде Иса гаты сес билен гыгырып: «Элохи, Элохи! Лема сабактани?», ягны: «Худайым, Худайым! Нәме үчин Мени терк этдиң?» дийди.

³⁵ Ол ерде дуранларың кәбирлери муны эшиденлеринде: «Середиң, Ол Ылясы чагыряр» дийдилер.

³⁶ Бир адам ылгап барып, бир эсгини сиркә батырды. Оны бир таягың уҗуна дакып, Иса ичирҗек болуп узатды-да: «Ханы, гөрелиң! Ыляс гелип, Оны ашак дүшүрермикә?» дийди.

³⁷ Эмма Иса гаты гыгырып җан берди.

³⁸ Шол вагт ыбадатхананың тутусы ёкардан ашаклыгына йыртылып, икә бөлүнди.

³⁹ Исаның гаршысында дуран йүзбашы Онуң шейле җан беренини гөренде: «Бу адам, хакыкатдан хем Худайың Оглы экен» дийди.

⁴⁰ Ол ерде узакдан середишип дуран аяллар хем барды. Магдалалы Меръем, Ёсе билен кичи Якубың эҗеси Меръем ве Саломе дагы хем оларың арасындады.

⁴¹ Булар Иса Җелиледекә ызына дүшүп, Оңа хызмат эдипдилер. Ол ерде Иса билен Иерусалиме гелен башга-да көп аяллар барды.

Иса җайланяр

⁴² Ол гүн Тайярлык гүнүди, ягны Сабадың өң янындакы гүнди. Агшам

⁴³ меҗлисиң сыланян агзасы, Худайың Шалыгына умыт билен гарашян ариматиялы Юсуп гелди. Ол йүрегине даш баглап, Пилатың янына барды ве ондан Исаның җеседини диледи.

⁴⁴ Пилат Исаның эййәм өлендигине гең галды, йүзбашыны чагырып: «Өленине көп вагт болдумы?» дийип сорады.

⁴⁵ Муны йүзбашыдан аныкландан соң, җеседи Юсуба берди.

⁴⁶ Юсуп хем кепенлик мата сатын алды, җеседи ашак дүшүрип, кепене долады-да, гаяда оюлан бир мазарда җайлады. Соңра ол мазарың агзына бир даш тогалап гетирип гойды.

⁴⁷ Магдалалы Меръем билен Ёсәниң эҗеси Меръем Исаның ниреде җайланандыгыны гөрдүлер.