Mark 14 - Мукаддес Китап

14‑нҗи бап Исаны өлдүрмек барада дилдүвшүк

¹ Песах ве Петир байрамына ики гүн галыпды. Ёлбашчы руханылар, Төврат мугаллымлары Исаны хиле билен тутуп, өлдүрмегиң ёлуны агтарярдылар.

² Йөне велин бири-бирлерине: «Байрам гүнлеринде дәл, халк галмагал турзаймасын» дийишйәрдилер.

Бир аял Исаның башына яг гуйяр

³ Иса Бейтанияда дери кеселли Симуның өйүнде сачак башында отырка, бир аял агзы япык чүйшеде гымматбаха сап-арасса нард ягыны алып гелди. Аял чүйшәниң дыкысыны ачып, ягы Онуң башына гуйды.

⁴ Кәбирлери гахарланып, бири-бирлерине: «Нәме үчин бу яг исрип эдилди?

⁵ Муны бир йыллык иш хакына барабар пула сатып, гарыплара пайлап боларды ахыры» дийшип, аяла игендилер.

⁶ Эмма Иса олара: «Начары өз гүнүне гоюң! Нәме үчин оны ынҗадярсыңыз? Ол Мениң үчин аҗайып иш этди.

⁷ Гарыплар хемише сизиң яныңыздадыр, олара ислән махалыңыз ягшылык эдип билерсиңиз, эмма Мен хемише яныңызда болмарын.

⁸ Бу аял элинде барыны этди, ол бедениме атыр ыслы яг гуюп, Мени җайламага өңүнден тайярлады.

⁹ Сизе догрусыны айдярын, Хош Хабар дүнйәниң ниресинде вагыз эдилсе, бу аялың эдени-де шол ерде ятланар» дийди.

Юдасың хайынлыгы

¹⁰ Соңра Онкилерден Юдас Искариот диен бири Иса дөнүклик этмек үчин, ёлбашчы руханыларың янына гитди.

¹¹ Олар муны эшидип бегендилер, оңа пул бермәге сөз бердилер. Ол Исаны олара табшырмак үчин, аматлы пурсат пейләп гезди.

Иса шәгиртлери билен Песах байрамыны беллейәр

¹² Песах җанлысының союлян гүни, ягны Петир байрамының илкинҗи гүни шәгиртлери Исадан: «Сениң үчин Песах нахарыны ниреде тайярламагымызы ислейәрсиң?» дийип сорадылар.

¹³ Иса шәгиртлериниң икисини ёллап, олара: «Шәхере барың, күйзе билен сув алып барян бир адама саташарсыңыз, шонуң ызына дүшүп гидиң.

¹⁴ Ол нирә барып гирсе, шол өйүң эесине: „Мугаллым сенден шәгиртлерим билен Песах нахарыны иер ялы, Мениң мыхман отагым ниреде дийип сораяр“ дийиң.

¹⁵ Ол хем ёкаркы гатда дүшелги, тайяр гиң бир отагы гөркезер. Шол ерде тайярлык гөрүң» дийди.

¹⁶ Шәгиртлер ёла дүшүп, шәхере гитдилер ве әхли зады Исаның айдышы ялы тапып, Песах нахарыны тайярладылар.

¹⁷ Агшам Иса Онкилер билен биле гелди.

¹⁸ Сачак башында нахар ийип отыркалар, Ол: «Сизе догрусыны айдярын, сизден бири, Мениң билен нахар ийип отуран бириңиз Маңа хайынлык эдер» дийди.

¹⁹ Олар хем тукатланып, ызлы-ызына Ондан: «Мен бир дәлми?» дийип сорамага башладылар.

²⁰ Иса олара: «Ол Онкилерден бири, Мениң билен биле окара чөрек батырып отураның бири.

²¹ Хава, Ынсан Оглы Өзи хакда язылышы ялы җан берер, эмма Ынсан Оглуна хайынлык эдениң халына вай! Ол адам энеден догулмадык болса, онуң үчин хас оңат боларды» дийди.

²² Нахарланып отыркалар, Иса элине чөрек алып шүкүр этди ве оны дөвүп, шәгиртлерине берди-де: «Алың, бу Мениң беденимдир» дийди.

²³ Онсоң шераплы кәсәни алып, шүкүр эденинден соң, олара берди, хеммеси ондан ичди.

²⁴ Соңра Иса олара: «Бу Мениң көп адамлар үчин дөкүлйән әхт ганымдыр.

²⁵ Сизе догрусыны айдярын: Худайың Шалыгында тәзесини ичҗек гүнүме ченли шерабы гайтадан ичмерин» дийди.

²⁶ Олар Худая өвги сеналарыны айданларындан соң, Зейтун дагына чыкдылар.

Иса Петрусың инкәр этҗекдигини айдяр

²⁷ Иса шәгиртлерине: «Сизиң хеммәңиз Менден эл чекерсиңиз, себәби „Чопаны урарын, гоюнлар даргап гидер“ дийип язылгыдыр.

²⁸ Эмма Мен диреленимден соң, сизден өң Җелилә барарын» дийди.

²⁹ Петрус Оңа: «Хеммелер Сенден йүз өвүрсе-де, мен бейле этмерин» дийди.

³⁰ Иса оңа: «Саңа догрусыны айдярын: эдил шу гиҗе хораз ики гезек гыгырянча, сен Мени үч гезек инкәр эдерсиң» дийди.

³¹ Эмма Петрус җаныгып: «Мен Сениң билен өлмели болсам-да, Сени асла инкәр этмерин» дийди. Шәгиртлериң хеммеси-де шейле дийдилер.

Гетсемани багында

³² Олар Гетсемани диен бир ере гелдилер. Иса шәгиртлерине: «Мен Худая дилег эдип гелйәнчәм, сиз шу ерде отурың» дийди.

³³ Иса Петрусы, Якубы ве Ёханнаны янына алды. Иса аҗы хасрат чекип, гайгыланмага башлады.

³⁴ Олара: «Мениң җаным өлер ялы тукат. Сиз бу ерде галың ве оя болуң» дийди.

³⁵ Иса бираз өңе йөрәнден соң, ере йүзин дүшүп, шу айылганч пурсадың мүмкин болса, Өзүнден сова гечмегини дилег этди.

³⁶ Ол: «Абба, Атам, Сен хемме зады башарярсың. Бу хасрат кәсесини Менден сова гечир, йөне Мениң ислегим дәл, Сениң ислегиң амала ашсын» дийди.

³⁷ Иса гайдып геленде, шәгиртлери уклап ятан экенлер. Иса Петруса: «Уклап ятырсыңмы? Бир сагат-да оя болуп билмедиңми?

³⁸ Оя болуң, сынага дүшмез ялы дилег эдиң. Рух гайратлыдыр, йөне беден эҗиздир» дийди.

³⁹ Иса ене гидип, шол өңки сөзлери айдып дилег этди.

⁴⁰ Ызына гайдып геленде, шәгиртлери ене уклап ятан экенлер, себәби оларың гөзлери бүрлүп дурды. Олар Оңа нәме дийҗеклерини билмедилер.

⁴¹ Иса үчүнҗи гезек гелип, олара: «Сиз хенизем уклап ятырсыңызмы? Дынҗыңызы алярсыңызмы? Болды, пурсат гелди, Ынсан Оглы гүнәкәрлериң элине берилйәр.

⁴² Туруң, гиделиң. Анха, Маңа хайынлык эден голайлады» дийди.

Иса тутуляр

⁴³ Иса хениз гепләп дурка, Онкилериң бири болан Юдас пейда болды. Онуң янында ёлбашчы руханылар, Төврат мугаллымлары ве яшулулар тарапындан иберилен гылычлы, таяклы бир мәхелле барды.

⁴⁴ Иса хайынлык эден Юдас олар билен: «Мен кими өпсем, Иса Шолдур. Оны тутуң-да, гораг астында алып гидиң» дийип геплешипди.

⁴⁵ Ол геле-гелмәне Исаның янына барды-да: «Мугаллым!» дийип, Оны өпди.

⁴⁶ Онсоң адамлар Исаны тутуп, эле салдылар.

⁴⁷ Исаның янында дуранларың бири гылыҗыны сырып, баш руханының хызматкәрини уруп, онуң гулагыны кесди.

⁴⁸ Иса олара: «Нәме үчин бир гозгалаңчының гаршысына чыкан ялы, Мени тутмак үчин гылычлы хем таяклы гелипсиңиз?

⁴⁹ Хер гүн ыбадатханада араңызда болуп, адамлара өвредйәрдим, шонда Мени тутмандыңыз. Йөне, гой, Мукаддес Язгылар берҗай болсун» дийди.

⁵⁰ Шонда шәгиртлериң хеммеси Исаны ташлап гачып гитдилер.

^51-52 Ялаңач беденини япынҗа билен өртен бир яш йигит Исаның ызына дүшүп барярды. Эсгерлер оны хем тутдулар, эмма ол япынҗасыны ташлап, ялаңач халда олардан гачып гитди.

Иса меҗлисиң өңүнде

⁵³ Исаны баш руханының янына гетирдилер. Әхли ёлбашчы руханылар, яшулулар ве Төврат мугаллымлары ол ере йыгнаныпдылар.

⁵⁴ Петрус баш руханының ховлусына ченли гара гөрнүмден Исаның ызына дүшүп гитди. Ол хем сакчылар билен биле ховлуда ода чоюнып отырды.

⁵⁵ Ёлбашчы руханылар ве ёкары меҗлис Иса өлүм җезасыны бермек үчин, Оңа гаршы субутнама агтардылар, йөне тапып билмедилер.

⁵⁶ Көплер Оңа гаршы ялан шаятлык берселер-де, оларың шаятлыгы бир чыкмады.

⁵⁷ Онсоң кәбирлери туруп, Оңа гаршы ялан шаятлык берип:

⁵⁸ «Биз Онуң: „Мен ынсан эли билен салнан шу ыбадатхананы йыкып, үч гүнүң ичинде эл билен салынмадык башга бир ыбадатхана саларын“ диенини эшитдик» дийдилер.

⁵⁹ Барыбир, оларың шаятлыклары бир чыкмады.

⁶⁰ Соңра баш руханы меҗлисиң ортасында еринден туруп, Исадан: «Сенде хич хили җогап ёкмы? Бу адамларың Саңа гаршы берйән шаятлыгына нәме диерсиң?» дийип сорады.

⁶¹ Иса дымды, хич бир җогап бермеди. Баш руханы ене Ондан: «Шөхратлы Худайың Оглы – Месих Сенми?» дийип сорады.

⁶² Иса: «Мендирин! Сиз Ынсан Оглуның Гудратыгүйчлиниң сагында отураныны ве гөгүң булутларында гелйәнини гөрерсиңиз» дийди.

⁶³ Баш руханы шонда якасыны йыртып: «Бизе башга шаятлык нәмә герек?

⁶⁴ Онуң Худая дил етиренини өзүңиз эшитдиңиз ахырын. Нәме карара гелйәрсиңиз?» дийип сорады. Оларың бары Исаны өлүм җезасына лайык дийип хөкүм чыкардылар.

⁶⁵ Кәбирлери Онуң үстүне түйкүрип башладылар, гөзлерини даңып, Оны юмруклап: «Велилик эт!» дийишйәрдилер. Сакчылар-да Оны араларына алып урдулар.

Петрус Исаны инкәр эдйәр

⁶⁶ Петрус ховлының ашак тарапында дурка, баш руханының кенизлеринден бири гелди.

⁶⁷ Ол чоюнып отуран Петрусы гөренде, оңа чиңерилди-де: «Сен хем шол насыралы Иса билендиң» дийди.

⁶⁸ Эмма Петрус муны инкәр эдип: «Мен сениң нәме хакда геплейәниңи билемогам, дүшүнемогам» дийди-де, ховлының дашына чыкды. Шол вагт хем хораз гыгырды.

⁶⁹ Кениз Петрусы гөренде, янындакылара: «Бу адам шоларың бири» дийип, ене-де айтды.

⁷⁰ Эмма Петрус муны ене-де инкәр этди. Аз салымдан ол ерде дуранлар Петруса ене-де: «Хакыкатдан-да, сенем шоларың бири, себәби сен җелилели» дийдилер.

⁷¹ Эмма ол ант ичип: «Худай урсун! Сизиң айдян бу адамыңызы мен танамаярын» дийди.

⁷² Эдил шол вагт хораз икинҗи гезек гыгырды. Петрус Исаның өзүне: «Хораз ики гезек гыгырянча, сен Мени үч гезек инкәр эдерсиң» диен сөзлерини ятлап, мөңңүрип аглады.