Mark 13 - Мукаддес Китап

13‑нҗи бап Ынсан Оглуның гелйәниниң аламатлары

¹ Иса ыбадатхананың ховлусындан чыканда, шәгиртлериниң бири Оңа: «Мугаллым! Серет, не аҗап дашлар, не аҗап биналар!» дийди.

² Иса оңа: «Бу бейик биналары гөрйәңми? Бу ерде даш үстүнде даш галмаз, хеммеси вейран болар» дийди.

³ Соңра Иса ыбадатхананың гаршысындакы Зейтун дагында отырка, Петрус, Якуп, Ёханна ве Андрыс дагы екеликде Ондан:

⁴ «Бизе айтсана, бу затлар хачан болар? Бу затларың амала ашяндыгыны гөркезйән нәхили аламат болар?» дийип сорадылар.

⁵ Онсоң Иса олара шейле дүшүндирмәге башлады: «Әгә болуң, хич ким сизи алдаймасын!

⁶ Көплер Мениң адым билен гелип: „Мен – Шолдурын“ дийип, энчеме адамлары алдарлар.

⁷ Сиз уруш турандыгы ве уруш барадакы мыш-мышлары эшидениңизде горкмаң. Булар болмалыдыр, йөне энтек соңы дәлдир.

⁸ Чүнки миллет миллете, патышалык патышалыга гаршы чыкар. Айры-айры ерлерде ер титремелер, ачлыклар йүзе чыкар. Булар бургуларың башлангыҗыдыр.

⁹ Эмма сиз өзүңизден хабардар болуң! Адамлар сизи ерли казыете табшырарлар, синагогаларда енҗерлер. Мен себәпли сиз хөкүмдарларың, патышаларың өңүнде дурарсыңыз ве олара шаятлык эдерсиңиз.

¹⁰ Хош Хабар илки билен әхли миллетлере вагыз эдилмелидир.

¹¹ Сизи туссаг эдип, казыете табшыранларында, нәме дийҗегиңизи өңүнден гайгы этмәң, шол пурсатда сизе нәме берилсе, шоны гепләң. Чүнки геплейән сиз дәл-де, Мукаддес Рухдур.

¹² Доган доганыны, ата чагасыны өлүме табшырар. Чагалар хем эне-аталарына гаршы чыкып, олары өлдүрдерлер.

¹³ Мен себәпли хеммелер сизи йигренер, эмма соңуна ченли чыдан халас болар.

¹⁴ Вейранчылык гетирйән йигренҗи задың дурмалы дәл ерде дураныны гөрениңизде, гой, Яхудыядакылар даглара гачсын. Хава, Даныел пыгамбериң айданларына догры дүшүнсин.

¹⁵ Үчекдәки адам бир зат алмак үчин ашак дүшүп, өе гирмесин.

¹⁶ Экин мейданындакылар донуны алмак үчин ызына гелмесин.

¹⁷ Ол гүнлерде гөврели аялларың ве чага эмдирйәнлериң дат гүнүне!

¹⁸ Сиз бу вака гышда болмасын дийип дилег эдиң.

¹⁹ Чүнки ол гүнлерде шейле бир элхенч мушакгатлар болар велин, Худайың ярадан дүнйәсиниң башындан тә шу вагта ченли мунуң ялы зат болан дәлдир, хич хачан болмазам.

²⁰ Реб ол гүнлери гысгалтмадык болса, онда хич ким халас болмазды. Эмма Реб Өз сайланларының хатырасына ол гүнлери гысгалтды.

²¹ Шонда кимдир бири сизе: „Ине, Месих бу ерде“ я-да „Анха, ол ерде“ дийсе, ынанмаң.

²² Чүнки галп месихлер ве галп пыгамберлер дөрәп, мүмкин болдугыча сайлананлары-да аздырҗак болуп, аламатлардыр мугҗызалар гөркезерлер.

²³ Әгә болуң! Мен хемме зады сизе өңүнден айтдым.

²⁴ Эмма шол гүнлерде мушакгатлыклардан соңра, Гүн гаралар, Ай нуруны сачмаз.

²⁵ Йылдызлар гөкден гачар, асман җисимлери лерзана гелер.

²⁶ Шонда Ынсан Оглуның бейик гудрата ве шөхрата бесленип, булутларда гелйәнини гөрерлер.

²⁷ Шонда Ол перишделери ёллап, Өз сайланларыны чар тарапдан, ериң уҗундан тә гөгүң уҗуна ченли йыгнар.

Инҗир агаҗындан алынмалы сапак

²⁸ Инҗир агаҗындан сапак алың: онуң шахалары юмшап, япрак чыкаран махалы томсуң голайландыгыны билйәрсиңиз.

²⁹ Шонуң ялы-да, бу затларың боляныны гөрениңизде, Ынсан Оглуның голай гелендигини, гапының агзындадыгыны билиң.

³⁰ Сизе догрусыны айдярын, бу затларың әхлиси болянча, бу несил дүнйәден өтмез.

³¹ Асман билен ер өтер, эмма Мениң сөзлерим асла өтмез.

Билинмейән гүн ве сагат

³² Эмма ол гүни хем сагады хич ким билйән дәлдир, не гөкдәки перишделер, не-де Огул билйәндир, диңе Ата билйәндир.

³³ Хүшгәр болуң, оя болуң! Сиз ол вагтың хачан гелҗекдигини билйән дәлсиңиз.

³⁴ Бу бир узак ёла чыкан адам ялыдыр. Ол өйүнден чыкып барярка, хызматкәрлерине ыгтыяр берер, хер хайсына бир иш табшырар. Гапыдакы гаравула болса оя болмагы буйрар.

³⁵ Шонуң үчин оя болуң, себәби сиз өй эесиниң агшаммы, яры гиҗеми, хораз гыгырандамы, гүн догандамы – хачан гелҗегини билмейәрсиңиз.

³⁶ Ол дуйдансыз гелип, укуда үстүңизи басаймасын.

³⁷ Сизе айдянларымы хеммелере-де айдярын: оя болуң!»