Mark 12 - Мукаддес Китап

12‑нҗи бап Үзүмчилик ве кәрендечилер тымсалы

¹ Соңра Иса олара тымсаллар билен гүррүң бермәге башлады: «Бир адам үзүм багларыны отурдып, дашына хаят айлаяр. Шерап ясамак үчин, үзүми сыкмага бир чукур газяр ве бир саны гөзегчилик диңини гуряр. Онсоң үзүмчилигини багбанлара кәрендесине берйәр-де, өзи узак ёла гидйәр.

² Хасыл мөвсүми геленде, ол бир хызматкәрини үзүмиң мивесинден алып гел дийип, кәрендечилериң янына иберйәр.

³ Эмма олар оны тутуп енҗйәрлер ве бош ковуп гойберйәрлер.

⁴ Үзүмчилигиң эеси ене башга бир хызматкәрини иберйәр. Олар онуң келлесини ярып, оны масгара эдип иберйәрлер.

⁵ Онсоң ене бир хызматкәрини иберйәр, олар муны өлдүрйәрлер. Ол шейдип, энчеме хызматкәрини иберйәр. Буларың-да кәбирини енҗип, кәбирини өлдүрйәрлер.

⁶ Үзүмчилигиң эесиниң ол ере ибермәге ене бир адамы галяр, ол-да өзүниң еке-тәк сөвер оглуды. Оглумы сыларлар өйдүп, ол иң соңунда кәрендечилериң янына өз оглуны иберйәр.

⁷ Эмма кәрендечилер бири-бирлерине: „Мирасдар шудур! Гелиң, шуны өлдүрелиң, мирас бизе галар“ дийишйәрлер.

⁸ Оны тутуп өлдүрйәрлер-де, үзүмчиликден дашары ташлаярлар.

⁹ Инди үзүмчилигиң эеси нәме эдер? Ол гелип, бу кәрендечилери өлдүрер-де, үзүмчилиги башгалара берер.

¹⁰ Сиз Мукаддес Язгыдакы: „Уссаларың рет эден дашы, бинаның бурч дашы болды.

¹¹ Муны Реб этди, бу назарымызда тәсин сайылды“ диен сөзлери окамадыңызмы нәме?»

¹² Бу тымсалы өзлерине какдырып айданыны аңан яхудыларың баштутанлары Исаны тутҗак болдулар. Йөне халкдан горкуп, Оны галдырып, өз ёлларына гитдилер.

Императорыңкы – императора

¹³ Исаны гепде тутҗак болуп, фарисейлериң ве Хиродың тарапдарларының бирнәчесини Онуң янына ибердилер.

¹⁴ Олар гелип, Ондан: «Мугаллым! Биз Сениң догручылдыгыңы, хич киме тарапгөйлик этмейәндигиңи билйәрис, себәби Сен адамларың дереҗесине бакман, Худайың ёлуны хакыкат билен өвредйәрсиң. Ханы айт, императора салгыт төлемек догрумы я-да догры дәл? Төләлими я-да төлемәли?» дийип сорадылар.

¹⁵ Иса оларың икийүзлүдигини билип: «Мени нәме үчин сынаярсыңыз? Маңа күмүш теңңәни бериң, гөрейин» дийди.

¹⁶ Олар бир теңңе гетирдилер. Иса олардан: «Бу теңңедәки шекил билен язгы кимиңки?» дийип сорады. Олар: «Императорыңкы» дийип җогап бердилер.

¹⁷ Иса олара: «Императорыңкыны – императора, Худайыңкыны Худая бериң» дийди. Олар Оңа хайран галдылар.

Дирелиш барада совал

¹⁸ Өлүмден соң дирелишиң ёкдугыны айдян саддукейлер Исаның янына гелип, Оңа шейле сораг бердилер:

¹⁹ «Мугаллым! Муса бизе бир адамың доганы перзентсиз өлүп, ызында аялы галса, доганы онуң аялыны алып, өлен доганының неслини довам этдирмелидир дийип языпдыр.

²⁰ Еди доган барды. Биринҗиси бир аяла өйленди, йөне ызында несил галдырман өлди.

²¹ Икинҗиси хем шол аяла өйленди, ол хем ызында несил галдырман өлди. Оларың үчүнҗиси хем шейле болды.

²² Едиси-де несил галдырмады. Олардан соң аял хем өлди.

²³ Инди дирелиш гүни бу аял оларың хайсысының аялы болар? Оларың едиси хем оңа өйленипди ахырын».

²⁴ Иса олара шейле җогап берди: «Сиз не Мукаддес Язгылары, не-де Худайың гудратыны билйәрсиңиз. Ялңышыңызың себәби хем шунда дәлми?

²⁵ Ынсанлар өлүмден диреленде не өйленерлер, не-де дурмуша чыкарлар, олар гөклердәки перишделер ялы боларлар.

²⁶ Өлүлериң дирелиши бабатда болса, Мусаның китабындакы янып дуран чалы хакында окамадыңызмы? Худай Муса: „Мен Ыбрайымың, Ысхагың ве Якубың Худайыдырын“ дийди.

²⁷ Ол өлүлериң дәл-де, дирилериң Худайыдыр; сиз гаты ялңышярсыңыз».

Иң ваҗып табшырык

²⁸ Голая гелип, оларың чекишмелерини эшиден Төврат мугаллымлардан бири Исаның олара җайдар җогап беренини гөрүп, Ондан: «Хайсы табшырык иң ваҗып табшырык?» дийип сорады.

²⁹ Иса: «Иң ваҗып табшырык шудур: эй, ысрайыл халкы, гулак гой. Худайымыз Реб еке-тәк Ребдир.

³⁰ Худайыңыз Ребби тутуш йүрегиңиз, әхли дүшүнҗәңиз хем гүйҗүңиз билен җан-тенден сөйүң.

³¹ Икинҗиси-де шудур: якыныңы өзүңи сөйшүң ялы сөй! Булардан улы табшырык болмаз» дийип җогап берди.

³² Ол адам Оңа: «Сениңки догры, эй, Мугаллым! Сен хакыкаты сөзледиң. Худай еке-тәкдир, Ондан башгасы ёкдур.

³³ Оны тутуш йүрегиң хем акылың билен ве әхли гүйҗүң билен сөймеклик, якыныңы өзүңи сөйшүң ялы сөймеклик якма гурбанлыкларың, бейлеки гурбанлыкларың хеммесинден хас мөхүмдир» дийди.

³⁴ Иса онуң пайхаслы җогап беренини гөрүп: «Сен Худайың Шалыгындан узакда дәлсиң» дийди. Шондан соң Оңа мундан артык сораг бермәге хич ким милт этмеди.

Месих кимиң Оглы?

³⁵ Иса ыбадатханада халка өвредип отырка, олара шейле дийди: «Төврат мугаллымлары Месихе нәдип Давудың оглы диййәрлер?

³⁶ Давудың өзи Мукаддес Рухдан ылхам алып, шейле дийипдир: „Худай Реббиме шейле сөзледи: ‘Душманларыңы аяк астына салянчам, Мениң сагымда отур’“.

³⁷ Давудың өзи Месихе Реб диййән болса, Ол нәхили Давудың оглы боляр?» Улы мәхелле Оны хезил эдип диңлейәрди.

Иса икийүзли Төврат мугаллымлары язгаряр

³⁸ Иса халка шейле өвүт берди: «Төврат мугаллымлардан әгә болуң! Олар узын дон гейип гезмеги, базарларда өзлерине салам берилмегини,

³⁹ синагогаларда баш күрсүлери, мейлислерде төри халаяндырлар.

⁴⁰ Олар дул аялларың өйлерини талап, гөз үчин узын-узын догалар окан боляндырлар. Шейле адамлар иң агыр җеза сезевар боларлар».

Дул аялың садакасы

⁴¹ Иса садака гутусының гаршысында отурып, оңа пул атян халкы сынлаярды. Энчеме бай адамлар гута көп пул атдылар.

⁴² Бир гарып дул аял гелип, гута ики шай атды.

⁴³ Иса шәгиртлерини янына чагырып, олара: «Сизе догрусыны айдярын, бу гарып дул аял гута хеммелерден кән пул атды.

⁴⁴ Бейлекилер өзлеринден артаныны атдылар, йөне бу хатын гарыплыгына гарамаздан, элиндәки әхли чөрек пулуны атды» дийди.