Mark 11 - Мукаддес Китап

11‑нҗи бап Иса Иерусалиме улы дабара билен гирйәр

¹ Иса билен шәгиртлери Иерусалиме голайлап, Зейтун дагының этегиндәки Бейтфаҗ ве Бейтания геленлеринде, Иса ики шәгирдини ёллап, олара:

² «Өңүңиздәки оба барың. Оба гирен ериңизде даңылгы дуран тайхар тапарсыңыз, онуң үстүне шу вагта ченли хич ким мүнен дәлдир. Оны чөзүң-де, бәри алып гелиң.

³ Эгер бири сизден: „Нәме үчин оны чөзйәрсиңиз?“ дийип сораса, оңа: „Бу тайхар Реббе герек, оны басым ызына иберер“ дийип айдың» дийди.

⁴ Шәгиртлер гитдилер ве көчеде бир гапының агзында даңылгы дуран тайхары тапып, оны чөздүлер.

⁵ Ол ерде дуран бирнәче киши олара: «Нәме үчин тайхары чөзйәрсиңиз?» дийип сорадылар.

⁶ Олар-да Исаның айданыны айтдылар. Онсоң яңкы адамлар олары гойбердилер.

⁷ Тайхары Исаның янына гетирип, донларыны онуң үстүне атдылар, Иса-да тайхара мүнди.

⁸ Көп адамлар донларыны, кәбирлери-де агачлардан шаха кесип, ёла дүшедилер.

⁹ Өңден барянлар ве ыздан гелйәнлер: «Худая өвгүлер болсун! Реббиң адындан Гелйәне алкыш болсун!

¹⁰ Атамыз Давудың голайлан патышалыгы гутлы болсун, гөклерде алкыш!» дийип гыгырышярдылар.

¹¹ Иса Иерусалиме барып, ыбадатхана гирди. Даш-төверегиндәки әхли затлары гөзден гечирди. Соңра гүн гиҗигип баряндыгы үчин, он ики шәгирди билен билеликде Бейтания гитди.

Инҗир агаҗына гаргыш

¹² Эртеси гүн Бейтаниядан чыканларында, Иса аҗыкды.

¹³ Узагракда гүр япраклы бир инҗир агаҗына гөзи дүшенде, ондан инҗир тапмазмыкам дийип, агаҗа тарап йөреди. Онуң янына геленде, ондан япракдан башга хич зат тапмады, себәби инҗир мөвсүми дәлди.

¹⁴ Иса агаҗа: «Гой, мундан бейләк сенден хич ким миве иймесин!» дийди. Шәгиртлери хем муны эшитдилер.

Иса сатыҗылары ыбадатханадан ковяр

¹⁵ Соңра олар Иерусалиме гелдилер. Иса ыбадатхананың ховлусына гирип, ол ердәки сатыҗылары, алыҗылары ковмага башлады. Пул чалышянларың текҗелерини, кепдери сатянларың отургычларыны дүңдерди.

¹⁶ Хич киме ыбадатхананың ховлусындан гош гатнатмага ругсат этмеди.

¹⁷ Иса олара өвретмек билен: «„Мениң өйүм әхли миллетлер үчин ыбадат өйи дийлип атландырылар“ дийип язылгы дәлми нәме? Эмма сиз муны гаракчыларың сүренине өврүпсиңиз» дийди.

¹⁸ Муны эшиден ёлбашчы руханылар билен Төврат мугаллымлары Исаны өлдүрмегиң күйүне дүшдүлер. Олар Исадан горкярдылар, себәби тутуш халк Исаның таглыматына хайран галярды.

¹⁹ Агшам дүшенде, Иса билен шәгиртлери шәхерден чыкып гитдилер.

Инҗир агаҗындан алынмалы сапак

²⁰ Ир сәхер билен гечип баряркалар, олар шол инҗир агаҗының көки билен гурандыгыны гөрдүлер.

²¹ Петрус болуп гечен ваканы ятлап: «Мугаллым, серет! Сениң гарган инҗир агаҗың гурапдыр» дийди.

²² Иса олара шейле җогап берди: «Худая иман эдиң.

²³ Сизе догрусыны айдярын, ким йүрегинде шүбхә ёл бермән, диййәниниң болҗакдыгына иман эдип, шу дага: „Гөтерил-де, деңзе зыңыл“ дийсе-де, онуң диени болар.

²⁴ Шонуң үчин сизе диййәрин: дога-дилег эдип, Худайдан соран хер бир задыңызы эййәм аландыгыңыза ынаның, ол сизе берлер.

²⁵ Худая дога окамага дуран махалыңыз биринден өйке-кинәңиз бар болса, оны багышлаң, шонда гөкдәки Атаңыз хем сизиң языкларыңызы багышлар».

Исаның эрк-ыгтыяры барада совал

²⁷ Олар ене Иерусалиме гелдилер. Иса ыбадатхананың ховлусында гезмеләп йөркә, ёлбашчы руханылар, Төврат мугаллымлары ве яшулулар Онуң янына гелип:

²⁸ «Сен бу затлары хайсы ыгтыяр билен эдйәрсиң? Бу ишлери этмәге Саңа ким ыгтыяр берди?» дийип сорадылар.

²⁹ Иса-да олара: «Мен хем сизе бир совал берҗек. Маңа җогап берсеңиз, сизе бу затлары хайсы ыгтыяр билен эдйәними айдайын.

³⁰ Ханы, Маңа айдың, Яхя чүмдүриш ыгтыярыны ниреден алды? Гөкденми я-да ынсандан?» дийди.

³¹ Олар муны өзара маслахатлашмага башладылар: «Эгер Гөкден дийсек, Ол бизе: „Онда нәме үчин оңа ынанмадыңыз?“ диер.

³² Эмма ынсандан дийсек…» Олар халкдан горкярдылар, чүнки хеммелер Яхяны хакыкы пыгамбер сайярды.

³³ Ахыры олар Иса: «Биз билемзок» дийип җогап бердилер. Иса-да олара: «Менем сизе бу затлары хайсы ыгтыяр билен эдйәними айтҗак дәл» дийди.