Luka 3 - Мукаддес Китап

3‑нҗи бап Яхя чүмдүриҗиниң вагзы

¹ Рим императоры Тиберейиң хөкүмдарлыгының он бәшинҗи йылында, Понтий Пилат Яхудыяның хәкими дөврүнде Хирод – Җелиләни, онуң доганы Филип – Итурея билен Трахонитис велаятыны, Лисанияс-да Абилини доландырярды.

² Ханан билен Каяфа хем баш руханыды. Шонда Зекаряның оглы Яхя Худайың сөзи аян болды. Ол чөлде яшаярды.

³ Яхя Иордан дерясының төверегиндәки әхли ерлере айланып, адамлара гүнәлериниң багышланмагы үчин тоба эдип, сува чүмдүрилмеклерини вагыз эдйәрди.

⁴ Ишая пыгамбер бу барада өз китабында шейле языпды: «Чөлде бир сес гыгыряр: „Реббе ёл тайынлаң! Онуң ёдаларыны дүзләң!

⁵ Әхли дерелер долдурылар, әхли даг-депелер песелдилер, эгрем-буграм ёллар догруланар, бүдүр-сүдүр ёдалар текизленер.

⁶ Шонда әхли ынсанлар Худайың халас эдишини гөрерлер“».

⁷ Бир улы мәхелле сува чүмдүрилмек үчин, Яхяның янына гелди. Яхя олара шейле йүзленди: «Эй, алахөвренлер несли! Гелҗек газапдан гачып гутулып билерис өйдйәңизми?

⁸ Мундан бейләк эден тобаңыза мынасып миве бериң. Өз-өзүңизе: „Бизиң атамыз Ыбрайымдыр“ дийип айтмагы хыялыңыза хем гетирмәң. Мен сизе шуны айдайын: Худай Ыбрайым үчин шу дашлардан хем перзент ярадып билйәндир.

⁹ Ине, палта эййәм агачларың дүйбүнде ятыр: оңат миве бермейән хер бир агач чапылып, ода ташланар».

¹⁰ Халк ондан: «Эйсем, биз нәме этмели?» дийип сорады.

¹¹ Ол: «Ики көйнекли бирини көйнексизе берсин. Иймити болан хем шонуң ялы этсин» дийип җогап берди.

¹² Салгытчылар-да чүмдүрилмек үчин онуң янына гелип: «Мугаллым, биз нәме этмели?» дийип сорадылар.

¹³ Яхя олара: «Өзүңизе буйруландан артык алмаң» дийди.

¹⁴ Онсоң эсгерлер-де: «Биз нәме этмели?» дийип сорадылар. Олара: «Хич кимден зорлук билен пул алмаң, нәхак ере төхмет атмаң, өз хакыңыза кайыл болуң» дийди.

¹⁵ Халк Месихе умыт билен гарашярды ве хеммелер Яхя хакда йүреклеринде: «Яхя шол Месих болаймасын?» дийип ойланярды.

¹⁶ Яхя олара: «Мен сизи сува чүмдүрйәрин, эмма менден хас гүйчли Бири гелер, мен хатда Онуң чарыгының багыны чөзмәге-де мынасып дәлдирин. Ол сизи Мукаддес Руха хем-де ода чүмдүрер.

¹⁷ Онуң харман совурян чаршагы элиндедир. Ол харман ерини сүпүрип, бугдайы аммарына үйшүрер, саманы болса сөнмез отда якар» дийди.

¹⁸ Ол башга-да көп өвүт-үндев эдип, халка Хош Хабары вагыз эдйәрди.

¹⁹ Эмма баш хәким Хирод өз доганының аялы Хиродия өйленени үчин ве башга-да көп эрбет ишлери эдени үчин, Яхяның кәйинҗине сезевар болды.

²⁰ Ол Яхяны зындана салмак билен өңки эден әхли писликлериниң үстүне ене бир пислик гошды.

Иса сува чүмдүрилйәр

²¹ Әхли халк сува чүмдүрилип чыкарыландан соң, Иса-да чүмдүрилип чыкарылды. Ол Худая дога эдйәркә, гөклер ачылып,

²² Мукаддес Рух кепдери гөрнүшде Онуң үстүне инди. Гөкден: «Сен Мениң сөвер Оглумсың. Мен Сенден көп разыдырын» диен оваз гелди.

Исаның несил дарагты

²³ Иса Өз хызматына башлан вагты отуз яшларындады. Ол Юсубың оглы хасапланярды. Юсуп Элийиң оглы,

²⁴ Элий Маттадың, Маттат Левиниң, Леви Мелкиниң, Мелки Яннайың, Яннай Юсубың,

²⁵ Юсуп Маттатяның, Маттатя Амосың, Амос Нахумың, Нахум Эслиниң, Эсли Нагайың,

²⁶ Нагай Махадың, Махат Маттатяның, Маттатя Шимийиң, Шимий Ёсехиң, Ёсех Ёданың,

²⁷ Ёда Ёхананың, Ёханан Ресаның, Реса Зерубабылың, Зерубабыл Шеялтыелиң, Шеялтыел Нериниң,

²⁸ Нери Мелкиниң, Мелки Аддының, Адды Косамың, Косам Элмадамың, Элмадам Эриң,

²⁹ Эр Ешуваның, Ешува Элигезериң, Элигезер Ёрымың, Ёрым Маттатың, Маттат Левиниң,

³⁰ Леви Шимгоның, Шимгон Яхуданың, Яхуда Юсубың, Юсуп Ёнамың, Ёнам Элякымың,

³¹ Элякым Мелеяның, Мелея Меннаның, Менна Маттатаның, Маттата Натаның, Натан Давудың,

³² Давут Йышайың, Йышай Обедиң, Обет Бовазың, Боваз Саланың, Сала Нахшоның,

³³ Нахшон Эминадабың, Эминадап Адмының, Адмын Арнының, Арны Хесроның, Хесрон Пересиң, Перес Яхуданың,

³⁴ Яхудыя Якубың, Якуп Ысхагың, Ысхак Ыбрайымың, Ыбрайым Тераның, Тера Нахорың,

³⁵ Нахор Серугың, Серук Регувың, Регув Пелегиң, Пелек Эбериң, Эбер Шеланың,

³⁶ Шела Кейнаның, Кейнан Арпакшадың, Арпакшат Самың, Сам Нухуң, Нух Лемегиң,

³⁷ Лемек Метушеланың, Метушела Ханогың, Ханок Ередиң, Ерет Махалалелиң, Махалалел Кейнаның,

³⁸ Кейнан Эношың, Энош Шисиң, Шис Адамың оглуды, Адам болса Худайың оглуды.