Luka 24 - Мукаддес Китап

24‑нҗи бап Иса дирелйәр

¹ Хепдәниң биринҗи гүни ир сәхер билен аяллар тайярлан якымлы ыслы түтетгилерини алып, мазара бардылар.

² Олар мазарың агзындакы дашың бир чете тогаланандыгыны гөрдүлер.

³ Мазарың ичине гиренлеринде болса, Реб Исаның җеседини тапмадылар.

⁴ Муңа хайран болуп дуркалар, гаршыларында ловурдаян лыбасда ики саны адам бирденкә пейда болды.

⁵ Аяллар горкуп, башларыны ере эгдилер. Яңкы адамлар олара: «Сиз нәме үчин дирини өлүлериң арасындан гөзлейәрсиңиз?

⁶ Ол бу ерде ёк, Ол дирелди! Ол хениз сизиң билен билекә Җелиледе өзүңизе айдан затларыны ядыңыза салың.

⁷ Ол: „Ынсан Оглы гүнәли адамларың элине табшырылмалы, хача чүйленмели ве үчүленҗи гүн дирелмелидир“ дийипди» дийдилер.

⁸ Онсоң Исаның бу сөзлери оларың ядына дүшди.

⁹ Аяллар мазардан доланып гелип, буларың барыны Онбирлере ве бейлекилериң хеммесине хабар бердилер.

¹⁰ Ресуллара бу хабары етиренлер магдалалы Меръем, Ёванна, Якубың эҗеси Меръем ве оларың янындакы бейлеки аялларды.

¹¹ Эмма бу сөзлер ресуллара бош гөрүнди, олар аяллара ынанмадылар.

¹² Петрус болса еринден туруп, мазара тарап эңди. Ол эглип, кепениң бош ятаныны гөрди. Ол болан вака гең галып, ызына доланды.

Иса Эммауса барянлара гөрүнйәр

¹³ Шол гүн шәгиртлерден икиси Эммаус диен оба барярды. Бу оба Иерусалимден он чакрым узаклыкда ерлешйәрди.

¹⁴ Олар болуп гечен бу вакалар хакда өзара гүрлешйәрдилер.

¹⁵ Шейлеликде, геплешип, пикир алшып баряркалар, Исаның Өзи голая гелип, олар билен биле йөрәберди.

¹⁶ Йөне Оны танамаз ялы, оларың гөзлери багланыпды.

¹⁷ Иса олардан: «Ёл болсун! Нәме хакда гүррүң эдип баряңыз?» дийип сорады. Олар гайгылы ягдайда аяк чекдилер.

¹⁸ Оларың Клеёп атлысы: «Иерусалимде болубам, шу гүнлер ол ерде болан вакалардан бихабар гелмишек диңе Сенмикәң?» дийип сорады.

¹⁹ Иса олардан: «Хайсы вакалар?» дийип сорады. Олар шейле җогап бердилер: «Насыралы Иса хакдакы вакалар. Ол Худайың ве әхли халкың назарында сөзде хем ишде гүйчли пыгамберди.

²⁰ Ёлбашчы руханылар билен баштутанларымыз Оны өлүм җезасына хөкүм этдирип, хача чүйлемек үчин хәкимиң элине табшырдылар.

²¹ Биз болса Ысрайылы халас этҗек Шолдур дийип умыт эдипдик. Онсоңам бу затларың боланына үч гүн болды.

²² Үстесине, аялларымызың кәбирем бизи хайрана гойды. Олар шу гүн ир билен мазара барып,

²³ Онуң җеседини тапмандырлар. Олар бизиң янымыза гелип, өзлерине перишделериң гөрнендигини айтдылар. Перишделер Оңа дири диййәрмишлер.

²⁴ Онсоң бизиңкилериң кәбири мазара барып, ягдайың эдил аялларың айдышы ялыдыгыны гөрүпдирлер, эмма Исаны гөрмәндирлер».

²⁵ Иса олара: «Вах, сиз акмаклар! Пыгамберлериң айданларына гич ынанянлар!

²⁶ Месих бу гөргүлери гөрүп, Өз шөхратына гирмели дәлмиди?» дийди.

²⁷ Онсоң Ол Муса билен әхли пыгамберлерден башлап, хемме Мукаддес Язгыларда Өзи хакда айдыланлары олара дүшүндирди.

²⁸ Олар барян обаларына голайланларында, Иса узаграк гидерли гөрүнди.

²⁹ Эмма олар Оны саклап: «Бизиң янымызда галай, басым агшам дүшер, гүн яшып баряр» дийдилер. Шейлеликде, Иса оларың янында галды.

³⁰ Иса олар билен сачак башында отырка, чөрек алып, шүкүр этди-де, бөлүп олара берди.

³¹ Шонда оларың гөзлери ачылып, Исаны танадылар, эмма Иса оларың гөзлеринден гайып болды.

³² Олар бири-бирлерине: «Ёлда бизиң билен геплешип гелйәркә, бизе Мукаддес Язгылары дүшүндирйәркә, ичимизде йүрегимиз янмаярмыды дийсене?» дийишдилер.

³³ Олар туруп, шол пурсадың өзүнде Иерусалиме доландылар. Ол ерде Онбирлери ве оларың янында биле үйшүп отуранлары тапдылар.

³⁴ Булар: «Догрудан-да, Реб Иса дирелипдир ве Симуна гөрнүпдир!» дийдилер.

³⁵ Онсоң ол икиси ёлда болан вакалары, Иса чөреги бөленде, Оны танандыкларыны гүррүң бердилер.

Иса шәгиртлере гөрүнйәр

³⁶ Олар хениз бу барада гүррүң берип дуркалар, Исаның Өзи оларың арасында дуруп: «Сизе салам болсун!» дийди.

³⁷ Олар рух гөрйәндирис өйдүп, тисгинип горка дүшдүлер.

³⁸ Иса олара: «Нәме үчин довла дүшйәрсиңиз? Нәме себәпден гөвнүңизе бейле пикирлер гелйәр?

³⁹ Мениң эллериме, аякларыма середиң. Бу Мениң Өзүм! Маңа эллериңизи дегрип гөрүң. Рухуң эт билен сүңки болмаз, эмма гөршүңиз ялы, Мениңки бар» дийди.

⁴⁰ Муны айдып, эллерини, аякларыны олара гөркезди.

⁴¹ Олар шатлыкдан яңа хенизем ынанып билмән, хайран галып дуркалар, Иса олара: «Бу ерде иймәге бир задыңыз бармы?» дийип сорады.

⁴² Оңа биширилен балыгың бир бөлегини бердилер.

⁴³ Иса алып, оларың гөзлериниң алнында оны ийди.

⁴⁴ Иса олара: «Мен хениз яныңыздакам сизе айдан сөзлерим шулардыр: Мен хакда Төвратда, пыгамберлериң язгыларында, Зебурда языланларың әхлиси берҗай болмалыдыр» дийди.

⁴⁵ Онсоң Мукаддес Язгылара дүшүнмеклери үчин, оларың аңларыны ачды.

⁴⁶ Иса олара: «Месих гөрги гөрер ве үчүленҗи гүн өлүмден дирелер дийип языландыр.

⁴⁷ Шейле хем тоба эдип, гүнәлериниң багышланмагы барадакы Хош Хабары Иерусалимден башлап, әхли миллетлере Онуң адындан вагыз эдилмелидир.

⁴⁸ Сиз бу затлара шаят боларсыңыз.

⁴⁹ Мен хем Атамың вада эден Мукаддес Рухуны сизе ёлларын. Эмма сиз гөкден инҗек гудрат билен долдурылянчаңыз, Иерусалимде галың» дийди.

Иса гөге гөтерилйәр

⁵⁰ Иса олары шәхериң дашына чыкарып, Бейтания гетирди. Онсоң эллерини галдырып, олара пата берди.

⁵¹ Пата берип дурка, олардан айрылып, гөге гөтерилди.

⁵² Олар хем Оңа сежде эдип, улы шатлык билен Иерусалиме доландылар.

⁵³ Олар хемише ыбадатханада болуп, Худая алкыш окаярдылар.