Luka 23 - Мукаддес Китап

23‑нҗи бап Иса Пилатың ве Хиродың өңүнде

¹ Онсоң меҗлисиң әхли агзалары ерлеринден туруп, Исаны Пилатың янына гетирдилер.

² Олар Исаны язгармага башладылар: «Биз бу адамың миллетимизи аздыряндыгыны гөрдүк. Ол императора салгыт төлемәге гаршы чыкяр ве Өзүни Месих хем Патыша дийип атландыряр».

³ Пилат Ондан: «Сен яхудыларың патышасымы?» дийип сорады. Иса оңа: «Айдышың ялыдыр» дийип җогап берди.

⁴ Онсоң Пилат ёлбашчы руханылар билен халка: «Мен бу адамда хич хили этмиш гөрмедим» дийди.

⁵ Эмма олар хөтҗетлик эдип: «Бу адам Өз таглыматы билен тутуш Яхудыяның илатыны өҗүкдирйәр. Ол Җелиледен башлап, шу ере ченли гелди» дийдилер.

⁶ Муны эшидип, Пилат: «Бу адам җелилелими?» дийип сорады.

⁷ Исаның Хиродың велаятындандыгыны биленсоң, Пилат Оны Хиродың янына иберди, себәби шол вагт Хиродың өзи хем Иерусалимдеди.

⁸ Хирод Исаны гөрүп гаты бегенди, себәби көп вагтдан бәри Оны гөрмек ислейәрди. Ол барадакы эшиден энчеме затларына гөрә, Ондан бир гудратлы аламат гөрерин диен умыды барды.

⁹ Хирод Ондан көп сораглар сорады, эмма Иса оңа хич бир җогап бермеди.

¹⁰ Ёлбашчы руханылар билен Төврат мугаллымлары болса ол ерде дуруп, Оны бирагыздан айыплаярдылар.

¹¹ Соңра Хирод билен онуң эсгерлери Исаны кемсидип масгараладылар. Эгнине бир непис дон гейдирип, Пилатың янына ызына ибердилер.

¹² Шол гүн Пилат билен Хирод дост болды; мундан өң оларың арасында душманчылык барды.

¹³ Пилат ёлбашчы руханылары, баштутанлары ве халкы үйшүрип,

¹⁴ олара: «Сиз бу адамы мениң яныма халкы аздыряр дийип гетирдиңиз. Мен Оны гөзүңизиң алнында сорага чекдим, эмма Ол барадакы айыпламаларыңыз догры чыкмады.

¹⁵ Оны Хиродың янына ибердим, ол хем хич гүнә тапман, Оны ызына иберди. Сизиң гөршүңиз ялы, Ол өлүме лайык хич зат этмәндир.

¹⁶ Шонуң үчин хем, мен Онуң теммисини берип, бошатҗак» дийди.

¹⁸ Эмма әхли халк бирагыздан: «Бу адамы ёк эт! Бизе Бараббасы бошат!» дийип гыгырышды.

¹⁹ Бараббас шәхерде йүзе чыкан бир гозгалаңа гатнашандыгы ве ганхордугы үчин зындана салныпды.

²⁰ Пилат Исаны бошатмак ниети билен ене-де халка йүзленди.

²¹ Эмма олар: «Оны хача чүйле! Хача чүйле!» дийип гыгырышдылар.

²² Пилат үчүнҗи гезек олара: «Нәме үчин? Бу адам нәме яманлык этди? Мен Ондан өлүм җезасына лайык хич зат тапмадым. Шонуң үчин хем Оны җезаландырып бошатҗак» дийди.

²³ Эмма олар сеслерини хас гаталдып, хөтҗетлик билен Онуң хача чүйленмегини талап этдилер ве оларың сеси үстүн чыкды.

²⁴ Шейлелик билен, Пилат оларың талабыны берҗай этмек карарына гелди.

²⁵ Оларың соран адамыны, гозгалаң турзуп, адам өлдүрени үчин зындана салнан адамы бошатды, Исаны болса оларың ыгтыярына берди.

Иса хача чүйленйәр

²⁶ Эсгерлер Исаны алып баряркалар, экин мейданындан гелйән киринейли Симуны тутуп, аркасына хачы йүкледилер ве Исаның ызындан йөремәге меҗбур этдилер.

²⁷ Улы бир мәхелле Исаның ызына дүшүп гитди, оларың арасында Онуң үчин зарын-зарын аглаян аяллар хем барды.

²⁸ Иса ол аяллара тарап өврүлип, шейле дийди: «Эй, Иерусалим гызлары! Мениң үчин агламаң. Өзүңиз ве чагаларыңыз үчин аглаң.

²⁹ Чүнки шейле бир гүнлер гелер, адамлар: „Өнелгесиз аяллар, догурмадык ятгылар, чага эмдирмедик гөвүслер ненеңси багтлы!“ диерлер.

³⁰ Шонда даглара: „Бизиң депәмизе иниң!“, депелере: „Бизи өртүң!“ диерлер.

³¹ Эгер адамлар гөк дарагта шейле затлар эдйән болсалар, онда гуры дарагта нәме болар?»

³² Иса билен башга ики җенаятчыны хем җезаландырмак үчин алып барярдылар.

³³ Олар Келлечанак дийилйән ере геленлеринден соң, Исаны яңкы җенаятчылар билен бирликде хача чүйледилер. Җенаятчыларың бири Онуң саг тарапында, бейлекиси чеп тарапындады.

³⁴ Иса: «Атам! Олары багышла, себәби олар нәме эдйәнлерини биленоклар» дийди. Эсгерлер биҗе атышып, Онуң эшиклерини пайлашярдылар.

³⁵ Халк Оңа середип дурды. Ёлбашчылар хем Онуң үстүнден гүлүп: «Ол өзгелери халас этди. Эгер Ол Худайың сайлап-сечен Месихи болса, гой, инди Өзүни хем халас этсин-дә!» дийишйәрдилер.

³⁶ Эсгерлер хем янына гелип, Оны масгаралаярдылар. Оңа сирке хөдүр эдип:

³⁷ «Яхудыларың патышасы болсаң, Өзүңи халас эт-дә!» диййәрдилер.

³⁸ Онуң депесинде болса: «БУ ЯХУДЫЛАРЫҢ ПАТЫШАСЫДЫР» диен язгы барды.

³⁹ Чүйленен җенаятчыларың бири Оңа яңсылап: «Сен Месих дәлми нәме? Онда Өзүңи-де, бизи-де халас эт-дә!» дийди.

⁴⁰ Икинҗи җенаятчы болса муны айдана кәйәп: «Сен Худайдан горкаңокмы? Сен хем Онуң билен бир җезаны чекйәрсиң!

⁴¹ Биз өз этмишимизе лайык адалатлы җеза алдык. Эмма бу адам хич хили эрбетлик этмеди ахыры» дийди.

⁴² Онсоң ол: «Иса, Шалыгыңа баран чагың мени ятлагын!» дийди.

⁴³ Иса хем оңа: «Саңа догрусыны айдярын, сен шу гүн Мениң билен биле җеннетде боларсың» дийди.

Исаның өлүми

^44-45 Вагт гүнортана голайланда, Гүнүң йүзи тутулды, өйлән сагат үче ченли тутуш юрды гараңкылык гаплап алды. Ыбадатхананың пердеси ортарасындан йыртылып, икә бөлүнди.

⁴⁶ Иса гаты сес билен гыгырып: «Атам! Рухумы Сениң элиңе табшырярын» дийди-де, җан берди.

⁴⁷ Йүзбашы болан ваканы гөрүп, Худайы шөхратландырды. Ол: «Бу, хакыкатдан-да, догры адам экен!» дийди.

⁴⁸ Бу затлара томаша этмек үчин үйшен әхли халк болан вакалары гөрүп, дөшлерини юмруклай-юмруклай ызларына гайтды.

⁴⁹ Исаны танаян адамларың бары, шейле-де Җелиледен Онуң ызына дүшүп гайдан аяллар узагракда дуруп, бу вакалара сын эдйәрдилер.

Иса җайланяр

⁵⁰ Меҗлис агзаларындан Юсуп атлы бир адам барды. Ол оңат хем догручыл адамды.

⁵¹ Өзи-де меҗлисиң карарына ве ишине разылык бермәнди. Юсуп Яхудыяның Ариматия шәхеринден болуп, Худайың Шалыгына гарашярды.

⁵² Ол Пилатың янына барып, Исаның җеседини диледи.

⁵³ Онсоң Оны ашак дүшүрип, кепене долап, гаяда оюлан ве хенизе ченли хич кимиң җайланмадык мазарында җайлады.

⁵⁴ Бу иш Тайярлык гүнүниң ахырында болуп, Сабат гүнүниң башланмагына голайды.

⁵⁵ Иса билен Җелиледен гелен аяллар хем Юсубың ызына дүшүп гитдилер-де, мазары ве Онуң җесединиң нәхили җайлананыны гөрдүлер.

⁵⁶ Онсоң олар өйлерине гайдып, якымлы ыслы түтетгилер ве атырлар тайярладылар. Эмма Худайың буйругы боюнча Сабат гүни олар дынч алдылар.