Luka 22 - Мукаддес Китап

22‑нҗи бап Юдасың хайынлыгы

¹ Ине, Песах дийлип атландырылян Петир байрамы якынлашды.

² Ёлбашчы руханылар билен Төврат мугаллымлары Исаны өлдүрмегиң ёлуны агтарярдылар, эмма халкдан горкярдылар.

³ Шейтан Онкилериң бири болан Юдас Искариодың калбына гирди.

⁴ Юдас ёлбашчы руханылар билен серкерделериң янына барып, Исаны нәдип оларың элине салып берҗекдиги барада маслахатлашды.

⁵ Олар хем бегенишип, оңа пул бермәге разы болдулар.

⁶ Юдас олар билен ылалашды ве халк ёк вагты Исаны олара табшырмак үчин, аматлы пурсат пейләп гезди.

Песах нахары

⁷ Песах җанлысының союлян гүни, ягны Петир байрамы етип гелди.

⁸ Иса: «Гидиң-де, бизиң үчин Песах нахарыны тайярлаң» дийип, Петрус билен Ёханнаны иберди.

⁹ Олар: «Оны ниреде тайярламагымызы ислейәрсиң?» дийип сорадылар.

¹⁰ Иса олара: «Шәхере гирениңизде, күйзеде сув алып барян бир адама саташарсыңыз. Ызына дүшүп гидиң-де, онуң гирен өйүне гириң.

¹¹ Онсоң өй эесине: „Мугаллым сенден шәгиртлерим билен Песах нахарыны иер ялы, мыхман отагы ниреде дийип сораяр“ дийиң.

¹² Ол хем сизе ёкаркы гатда әхли зат тайярланып гойлан гиң бир отагы гөркезер. Шол ерде тайярлык гөрүң» дийди.

¹³ Олар гитдилер ве әхли зады Исаның айдышы ялы тапып, Песах нахарыны тайярладылар.

¹⁴ Нахар вагты боланда, Иса ресуллары билен сачак башына гечди.

¹⁵ Иса олара: «Мен бу Песах нахарыны эҗир чекмезимден өң, сизиң билен биле иймеги гаты арзув эдипдим.

¹⁶ Чүнки Худайың Шалыгында Песах нахарыны иймек үчин хеммәмиз йыгнанянчак, Мен ондан гайдып иймерин» дийди.

¹⁷ Иса элине бир кәсе алып шүкүр этди-де: «Муны алың-да, ичиң.

¹⁸ Сизе шуны айдярын: Худайың Шалыгы гелйәнчә, шерабы гайтадан ичмерин» дийди.

¹⁹ Онсоң чөреги алды-да, шүкүр этди, оны дөвүп, шәгиртлере берип: «Бу Мениң сизиң үчин гурбан эдилйән беденимдир, муны Мени яда салмак үчин берҗай эдиң» дийди.

²⁰ Шейле хем нахардан соң шераплы кәсәни алып: «Бу кәсе Мениң сизиң үчин дөкүлйән ганым аркалы багланышылян тәзе әхтдир.

²¹ Ине, Маңа хайынлык этҗек адам Мениң билен бир сачагың башында отыр.

²² Хава, Ынсан Оглы өңүнден беллениши ялы җан берер, эмма Оңа хайынлык эдениң халына вай!» дийди.

²³ Олар муны кимиң этҗекдигини бири-бирлеринден сорап башладылар.

²⁴ Олар өз арасында хайсы бирисиниң иң бейикдиги хакда җеделлешдилер.

²⁵ Иса олара шейле дийди: «Кесеки миллетлериң патышалары халклара өз хөкүмини йөредйәрлер, ыгтыярлы адамлары-да өзлерини хемаяткәр дийип атландырярлар.

²⁶ Эмма сиз бейле болмаң. Араңызда иң улы иң кичи ялы болсун, баштутан, гой, хызматкәр кимин болсун.

²⁷ Хайсысы хас улы: сачак башында отуранмы я-да хызмат эдйән? Сачак башында отуран дәлми? Эмма Мен сизиң араңызда бир хызмат эдйән киминдирин.

²⁸ Башымдан гечирен сынагларымда Мениң янымда болан сизсиңиз.

²⁹ Атамың Мени Патыша беллейши ялы, Мен-де сизи патыша эдип беллейәрин.

³⁰ Сиз Мениң Шалыгымда ийип-ичерсиңиз ве тагтларда отурып, Ысрайылың он ики тиресиниң үстүнден казылык эдерсиңиз».

Иса Петрусың инкәр этҗекдигини айдяр

³¹ Онсоң Иса сөзүни довам эдип: «Эй, Симун, Симун! Шейтан сизи бугдай ялы совурмак үчин диледи.

³² Эмма Мен иманың кемелмесин дийип, сениң үчин дилег этдим. Сен хем бир вагт өврүлип гелениңде, доганларыңы кувватландыр» дийди.

³³ Петрус: «Агам! Мен Сениң билен зындана-да, хатда өлүме-де гитмәге тайяр» дийди.

³⁴ Иса: «Петрус, саңа диййәрин, сен бу гүн хораз гыгырмаздан өң, Мени танамаяндыгыңы үч гезек айдарсың» дийди.

³⁵ Онсоң Иса олардан: «Мен сизи гапҗыксыз, торбасыз ве чарыксыз ёллан чагым кем задыңыз бармыды?» дийип сорады. Олар: «Ёкды» дийип җогап бердилер.

³⁶ Иса олара: «Инди гапҗыгыңыз бар болса, яныңыза алың, бир торба хем алың. Гылыҗыңыз ёк болса, донуңызы сатың-да, бир гылыч эдиниң.

³⁷ „Ол языклылар билен бир сайылды“ дийип язылгыдыр. Мен сизе диййәрин: бу Мен барада берҗай болмалыдыр. Догрудан-да, Мен хакда языланлар берҗай болуп баряр» дийди.

³⁸ Шәгиртлер: «Эй, Агам! Ине, бу ерде ики гылыч бар» дийдилер. Иса хем олара: «Шол етерлик» дийди.

Иса Зейтун дагында Худая дилег эдйәр

³⁹ Иса дашары чыкып, хемишекиси ялы Зейтун дагына гитди. Шәгиртлери хем Онуң ызына дүшдүлер.

⁴⁰ Ол ере баранларында, Иса олара: «Сынага дүшмез ялы дилег эдиң!» дийди.

⁴¹ Өзи болса олардан бир даш атым чете чекилди-де, дыза чөкүп:

⁴² «Эй, Атам! Эгер ислесең, бу хасрат кәсесини Менден сова гечир! Йөне Мениң ислегим дәл, Сениң ислегиң амала ашсын!» дийип, дилег этмәге дурды.

⁴³ Гөкден бир перишде гөрнүп, Оны гүйчлендирди.

⁴⁴ Ол агыр гама батып, ыхлас билен Худая дилег этди. Исадан акян дер ере дамян ган дамҗалары ялыды.

⁴⁵ Дилег эдип боландан соң туруп, Иса шәгиртлериң янына гелди. Оларың уклап ятандыкларыны гөрди, олар гайгы-хасратдан яңа тапдан дүшүпдилер.

⁴⁶ Иса олара: «Нәме үчин уклап ятырсыңыз? Сынага дүшмез ялы, туруң-да, Худая дилег эдиң!» дийди.

Иса тутуляр

⁴⁷ Ол энтек гепләп дурка, бир мәхелле пейда болды. Онкилериң бири Юдас мәхелләниң өңүне дүшүп гелйәрди. Юдас Исаны огшаҗак болуп, Онуң голайына гелди.

⁴⁸ Иса оңа: «Эй, Юдас! Сен бир огшук билен Ынсан Оглуна хайынлык эдйәрсиңми?» дийип сорады.

⁴⁹ Исаның янындакылар нәме болҗагыны гөрүп: «Эй, Агам! Гылыч билен уралымы?» дийдилер.

⁵⁰ Оларың бири баш руханының хызматкәрини уруп, онуң саг гулагыны кесди.

⁵¹ Эмма Иса: «Ханы, бес эдиң!» дийди. Онсоң хызматкәриң гулагына элини дегрип, оны сагалтды.

⁵² Онсоң Иса Өзүни эле салмага гелен ёлбашчы руханылара, ыбадатхананың горагчыларына, яшулулара йүзленип: «Нәме үчин бир гозгалаңчының гаршысына чыкан ялы, Мени тутмак үчин гылычлы хем таяклы гелипсиңиз?

⁵³ Мен хер гүн сизиң билен бирликде ыбадатханадакам, Мени тутмандыңыз. Эмма инди бу пурсат сизиңкидир, түмлүгиң хөкүм сүрйән сагадыдыр» дийди.

⁵⁴ Исаны тутуп, баш руханының өйүне алып гитдилер. Петрус хем гара гөрнүмден оларың ызына дүшүп гитди.

Петрус Исаны инкәр эдйәр

⁵⁵ Ховлының ортасында от якып отыркалар, Петрус-да оларың арасында отырды.

⁵⁶ Петрусы одуң ягтысына гөрен бир кениз оңа ичгин серетди-де: «Бу адам хем Онуң билен биледи» дийди.

⁵⁷ Эмма Петрус: «Эй, зенан, мен Оны танамаярын» дийип инкәр этди.

⁵⁸ Аз салымдан соң башга бири оны гөрүп: «Сен хем шолардан» дийди. Эмма Петрус: «Гардаш, мен олардан дәл» дийди.

⁵⁹ Арадан бир сагада голай вагт геченсоң, башга бир адам: «Догрудан-да, бу адам Онуң билен биледи, себәби бу җелилели» дийди.

⁶⁰ Эмма Петрус: «Эй, гардаш, мен сениң нәме айдяныңы билемок» дийди. Эдил шол вагт, Петрус гепләп дурка, хораз гыгырды.

⁶¹ Реб Иса гаңрылып, Петруса серетди. Петрус Реббиң: «Хораз гыгырмаздан өң, сен Мени үч гезек инкәр эдерсиң» диен сөзүни ятлады.

⁶² Петрус дашары чыкып, мөңңүрип аглады.

⁶³ Исаны саклаян адамлар Оны масгаралап, урмага башладылар.

⁶⁴ Гөзүни даңып: «Ханы, велилик эт! Сени уран ким?» дийип сорадылар.

⁶⁵ Ене-де Оңа энчеме хапа сөзлер айтдылар.

Иса меҗлисиң өңүнде

⁶⁶ Даң атанда, ёлбашчы руханылар ве Төврат мугаллымлары халкың бейлеки яшулулары билен йыгнанышып, Оны өзлериниң меҗлисине гетирдилер.

⁶⁷ Олар Исадан: «Бизе айт, Сен Месихми?» дийип сорадылар. Иса олара: «Айтсам, ынанмарсыңыз;

⁶⁸ сорасам, җогап бермерсиңиз.

⁶⁹ Эмма мундан бейләк Ынсан Оглы гудратлы Худайың сагында отурар» дийди.

⁷⁰ Оларың хеммеси: «Онда Сен Худайың Оглы-да?» дийип сорады. Иса олара: «Мениң Кимдигими өзүңиз айдып дурсуңыз» дийип җогап берди.

⁷¹ Олар: «Бизе мундан башга шаятлык нәмә герек? Биз муны Онуң Өз дилинден эшитдик ахыры» дийишдилер.