Luka 20 - Мукаддес Китап

20‑нҗи бап Исаның эрк-ыгтыяры барада совал

¹ Бир гүн Иса ыбадатхананың ховлусында халка өвредип, Хош Хабары вагыз эдйәркә, ёлбашчы руханылар, Төврат мугаллымлары ве яшулулар Онуң янына гелдилер.

² Олар Иса: «Ханы, бизе айт, Сен бу затлары хайсы ыгтыяр билен эдйәрсиң? Бу ыгтыяры Саңа ким берди?» дийдилер.

³ Иса хем: «Мен хем сизе бир совал берҗек. Маңа айдың,

⁴ Яхя чүмдүриш ыгтыярыны ниреден алды? Гөкденми я-да ынсандан?» дийип сорады.

⁵ Олар муны өзара маслахатлашмага башладылар: «Эгер Гөкден дийсек, Ол бизе: „Онда нәме үчин оңа ынанмадыңыз?“ диер.

⁶ Эгер-де ынсандан дийсек, әхли халк бизи дашлар, себәби халк Яхяның пыгамбердигине ынаняр».

⁷ Ахыры олар: «Биз ниредендигини билемзок» дийип җогап бердилер.

⁸ Иса-да олара: «Менем сизе бу затлары хайсы ыгтыяр билен эдйәними айтҗак дәл» дийди.

Үзүмчилик ве кәрендечилер тымсалы

⁹ Соңра Иса халка шу тымсалы гүррүң бермәге башлады: «Бир адам үзүм багларыны отурдып, оны багбанлара кәрендесине берйәр-де, өзи узак вагтлык башга юрда гидйәр.

¹⁰ Хасыл мөвсүми геленде, үзүмиң мивесинден алып гелмек үчин, ол хызматкәрлериниң бирини кәрендечилериң янына иберйәр. Эмма кәрендечилер оны енҗип, бош ковуп гойберйәрлер.

¹¹ Ол башга бир хызматкәрини иберйәр, кәрендечилер оны-да енҗип, масгара эдип, бош ковуп гойберйәрлер.

¹² Ол үчүнҗи хызматкәрини-де иберйәр. Олар оны хем яралап, ковуп гойберйәрлер.

¹³ Онсоң үзүмчилигиң эеси: „Мен нәме этмели? Гел, өз сөвер оглумы иберейин, белки, оны сыларлар“ өйдйәр.

¹⁴ Кәрендечилер болса оны гөренлеринден, өзара маслахатлашып: „Мирасдар шудур! Гелиң, шуны өлдүрелиң, мирас бизе галар“ дийишйәрлер.

¹⁵ Шейлеликде, оны үзүмчиликден чыкарып өлдүрйәрлер. Инди үзүмчилигиң эеси булара нәме эдер?

¹⁶ Ол гелип, бу кәрендечилери өлдүрер, үзүмчилиги болса башгалара берер». Халк муны эшидип: «Даш эдеверсин!» дийди.

¹⁷ Иса олара бакып: «Онда „Уссаларың рет эден дашы, бинаның бурч дашы болды“ диен язгының манысы нәме?

¹⁸ Ким бу дашың үстүне йыкылса, бөлек-бөлек болар. Эгер ол бириниң үстүне гачса, оны мынҗырадар» дийди.

¹⁹ Төврат мугаллымлары билен ёлбашчы руханылар Оны шол вагтың өзүнде тутмагың ёлуны агтардылар, себәби Онуң бу тымсалы өзлерине какдырып айданыны аңдылар. Эмма олар халкдан горкярдылар.

Императорыңкы – императора

²⁰ Исаны гөз астына алып, Оны аңтамак үчин, бирнәче догручылсумагы Онуң ызына салдылар. Олар Исаны гепде тутуп, Оны хәкимиң хөкүмине ве ыгтыярына табшырмак максатлары барды.

²¹ Шейлеликде, олар Оңа: «Мугаллым! Биз Сениң догры зады өвредйәндигиңи, адамларың дереҗесине бакман, Худайың ёлуны хакыкат билен өвредйәндигиңи билйәрис.

²² Ханы айт, бизиң императора салгыт төлемегимиз догрумы я-да догры дәл?» дийип сорадылар.

²³ Иса оларың хилесине дүшүнип:

²⁴ «Маңа салгыт пулуны гөркезиң. Бу теңңедәки шекил билен язгы кимиңки?» дийди. Олар: «Императорыңкы» дийип җогап бердилер.

²⁵ Ол: «Онда императорыңкыны – императора, Худайыңкыны Худая бериң» дийди.

²⁶ Олар халкың янында Оны сөзүнде тутуп билмән, берен җогабына хайран галып, сеслерини чыкармадылар.

Дирелиш барада совал

²⁷ Өлүмден соң дирелишиң ёкдугыны айдян саддукейлериң кәбири Исаның янына гелип, Оңа шейле сораг берди:

²⁸ «Мугаллым! Муса бизе бир адамың доганы перзентсиз өлүп, ызында аялы галса, доганы онуң аялыны алып, өлен доганының неслини довам этдирмелидир дийип языпдыр.

²⁹ Еди доган барды. Биринҗиси бир аял алып, перзент гөрмән дүнйәден өтди.

³⁰ Икинҗиси билен

³¹ үчүнҗиси хем шол аялы алды. Шейдип, едиси хем шол аяла өйленип, ызларында перзент галдырман өлдүлер.

³² Ахырсоңы аял хем өлди.

³³ Инди дирелиш гүни бу аял оларың хайсысының аялы болар? Оларың едиси хем оңа өйленипди ахырын».

³⁴ Иса олара шейле җогап берди: «Бу дөврүң адамлары өйленйәндир, дурмуша чыкяндыр.

³⁵ Эмма гелҗек дөвре ве өлүмден дирелише етмәге мынасып гөрленлер не өйленер, не-де дурмуша чыкар.

³⁶ Асла өлмезлер, себәби олар перишделер ялыдыр. Олар дирелишиң перзентлеридиклери үчин Худайың перзентлеридир.

³⁷ Муса-да өлүлериң дирелйәндигини тассыклап, янян чалы барадакы бөлүмде Ребби „Ыбрайымың, Ысхагың ве Якубың Худайы“ дийип атландыряр.

³⁸ Ол өлүлериң дәл-де, дирилериң Худайыдыр, себәби Онуң үчин хеммелер диридир».

³⁹ Төврат мугаллымларың кәбири: «Мугаллым, говы айтдың!» дийди.

⁴⁰ Оңа мундан артык сораг бермәге хич ким милт этмеди.

Месих Кимиң Оглы?

⁴¹ Онсоң Иса олара: «Нәме үчин Месихе Давудың оглы диййәрлер?

⁴² Ине, Давудың өзи Зебур китабында шейле диййәр: „Худай Реббиме шейле сөзледи:

⁴³ Душманларыңы аяк астына салянчам, Мениң сагымда отур“.

⁴⁴ Эгер Давут Месихе Реб диййән болса, Ол нәхили Давудың оглы боляр?» дийди.

⁴⁵ Бүтин халк Оңа гулак асып отырка, Иса шәгиртлерине:

⁴⁶ «Төврат мугаллымларындан әгә болуң! Олар узын дон гейип гезмеги, базарларда өзлерине салам берилмегини, синагогаларда баш күрсүлери, мейлислерде төри халаяндырлар.

⁴⁷ Олар дул аялларың өйлерини талап, гөз үчин узын-узын догалар окан боляндырлар. Шейле адамлар иң агыр җеза сезевар боларлар» дийди.