Luka 2 - Мукаддес Китап

2‑нҗи бап Иса догуляр

¹ Шол гүнлерде Рим императоры Август тутуш империяда илат язувыны гечирмек барада перман чыкарды.

² Бу илкинҗи илат язувы болуп, ол Кириниусың Сирия хөкүмдарлык эден дөврүнде гечирилди.

³ Илат язувындан гечмек үчин, хер ким өз шәхерине гитди.

⁴ Шейлеликде, Юсуп хем Җелиледәки Насыра шәхеринден чыкып, Давудың Яхудыядакы Бейтуллахам шәхерине гитди, себәби ол Давудың уругындан болуп, онуң неслине дегишлиди.

⁵ Юсуп язылмак үчин ол ере гөврели адаглысы Меръеми хем алып гитди.

^6-7 Олар Бейтуллахамдакалар, Меръемиң айы-гүни долуп, новбахар оглуны догурды. Меръем Оны гундага долады-да, бир ахырда ятырды, себәби олар мыхманханадан ер тапмандылар.

Чопанлар ве перишделер

⁸ Шол гиҗе Бейтуллахамың голайында кәбир чопанлар сүрүлерини гораярдылар.

⁹ Бирденкә оларың өңүнде Реббиң бир перишдеси пейда болды ве Реббиң ялкымы даш-төвереги ягтылтды. Чопанлар гаты горкдулар.

¹⁰ Перишде олара: «Горкмаң! Мен сизе әхли халкы бегендирҗек шатлыклы Хош Хабары ыглан эдйәрин:

¹¹ Шу гүн Давудың шәхеринде сизиң үчин Халасгәр догулды. Ол Реббимиз Месихдир.

¹² Ине, бу сизе бир аламат болар: сиз гундага долангы, ахырда ятан бир Чаганы тапарсыңыз» дийди.

¹³ Бирденкә перишде билен бирликде гөгүң сан-саҗаксыз гошуны гөрүнди. Олар Худайы өвүп шөхратландырдылар:

¹⁴ «Гөклер гөгүнде Худая шөхрат болсун! Худайдан мерхемет тапан ердәки ынсанлара парахатлык болсун!» диййәрдилер.

¹⁵ Перишделер чопанларың янындан айрылып, гөге гөтериленлеринде, чопанлар бири-бирлерине: «Йөрүң, Бейтуллахама гиделиң. Реббиң бизе аян эден бу вакасыны гөрелиң» дийишдилер.

¹⁶ Шейлеликде, олар гыссанмач гидип, Меръеми, Юсубы ве ахырда ятан чаганы тапдылар.

¹⁷ Олар Исаны гөренлеринде, бу чага хакда эшиденлерини олара гүррүң бердилер.

¹⁸ Чопанларың гүррүңлерини эшиденлериң бары хайран галды.

¹⁹ Меръем болса бу затларың бары хакда чуңңур пикире батып, олары йүрегинде саклаярды.

²⁰ Чопанлар хемме гөрүп-эшиденлериниң өзлерине айдылышы ялы боландыгы үчин, Худайы шөхратландырдылар, өвгүлер айдып, ызларына доландылар.

Шимгон ве Ханна Иса хакда пыгамберлик эдйәрлер

²¹ Секизинҗи гүн чаганы сүннетлемели боланда, Онуң адына Иса дакдылар. Бу Онуң энесиниң гөвресинде галмаздан өң, перишдәниң Оңа берен адыды.

²² Мусаның кануны боюнча гечирилйән тәмизлениш дәп-дессурларың берҗай эдилмели дөври етип геленде, Юсуп билен Меръем Иерусалиме гитдилер. Олар Исаны Реббе багыш этмек үчин, Оны хем янларына алдылар.

²³ Канунда: «Илкинҗи доглан хер бир эркек гөбекли Реббе багыш эдилмели» дийип языландыр.

²⁴ Олар Канунда язылышы ялы, ики гумрыны я-да кепдерини хем гурбанлык хөкмүнде хөдүр этмелидилер.

²⁵ Шол вагт Иерусалимде Шимгон атлы бир догручыл ве таква адам яшаярды. Ол ысрайыл халкының азат эдилмегине гарашярды, Мукаддес Рух онуң үстүндеди.

²⁶ Оңа Реббиң Месихини гөрмезден өң өлмеҗекдиги Мукаддес Рух тарапындан аян болупды.

²⁷ Симун Мукаддес Рухуң угрукдырмагы билен ыбадатхананың ховлусына гелди. Исаның эне-атасы Төвратда язылан адаты берҗай этмек үчин, Чаганы ичери саланларында,

²⁸ Симун Оны гуҗагына алып, Худая алкыш окап, шейле дийди:

²⁹ «Я Реб, Өз берен сөзүңе гөрә, инди гулуң аркайын аманадыны табшырып билер.

^30-31 Ине, Сениң әхли халкларың өңүнде тайярлан Халасгәриңи гөзүм билен гөрдүм.

³² Кесеки миллетлере аянлык берҗек, халкың ысрайылы шөхратландырҗак нуры гөрдүм».

³³ Чага барада айдылян сөзлере онуң эне-атасы хайран галды.

³⁴ Шимгон олара ак пата берип, энеси Меръеме: «Бу чага Худай тарапындан берлен аламат болуп, ынсанлар оңа гаршы чыкарлар. Ол себәпли Ысрайылда көп адамлар хеләк болар, көп адамлар болса ялканар.

³⁵ Шонда энчеме йүреклериң сырлы пикирлери аян болар. Сениң калбыңа хем хасрат йити гылыч кимин санҗылар» дийди.

^36-37 Ол ерде сегсен дөрт йылдан бәри дул яшаян Ханна атлы гарры пыгамбер аял хем барды. Ол ашер тиресинден Пануелиң гызыды. Ол дурмуша чыкандан соңра әри билен еди йыл яшашып, дул галыпды. Бу аял хемише ыбадатхананың ховлусында болуп, агыз бекләп, дога окап, гиҗе-гүндиз Худая ыбадат эдйәрди.

³⁸ Ханна хем эдил шол пурсат гелип, Реббе өвги айдып, Иерусалимиң халас болмагына гарашянларың барына бу Чага хакда гүррүң берди.

³⁹ Юсуп билен Меръем Мусаның кануны боюнча әхли зады берҗай эденлеринден соңра, Җелилә, өзлериниң Насыра шәхерине доландылар.

⁴⁰ Чага улалып, гүйчде ве акылдарлыкда өсйәрди. Худайың мерхемети Онуң үстүндеди.

Иса дин мугаллымлары билен

⁴¹ Исаның эне-атасы хер йыл Песах байрамында Иерусалиме гидйәрдилер.

⁴² Иса он ики яшына етенде, олар байрамчылык адаты боюнча ене Иерусалиме гитдилер.

⁴³ Байрамчылык гутарандан соң, олар өйлерине доландылар. Етгинҗек Иса болса Иерусалимде галды, эмма Онуң эне-атасының мундан хабары ёкды.

⁴⁴ Олар Оны ёлагчыларың арасындадыр өйдүп, бир гүнлүк ёлы гечдилер. Онсоң Оны доган-гарындашларының, дост-ярларының арасындан гөзләп башладылар.

⁴⁵ Оны гөзләп тапмансоңлар, ызларына Иерусалиме доландылар.

⁴⁶ Үч гүнден соң, Оны ыбадатхананың ховлусындан тапдылар. Ол дин мугаллымларының арасында отурып, олары диңләп, сораглар берйәрди.

⁴⁷ Исаны диңлейәнлериң бары Онуң пайхасына, берйән җогапларына хайран галярдылар.

⁴⁸ Эне-атасы Оны гөренлеринде гең галдылар. Эҗеси Оңа: «Оглум! Нәме үчин бейтдиң? Какаң икимиз гаты гайгы эдип, Сени гөзледик» дийди.

⁴⁹ Иса олара: «Мени нәме үчин гөзледиңиз? Сиз Мениң Атамың өйүнде болмалыдыгымы билмейәрдиңизми?» дийди.

⁵⁰ Эмма олар Онуң нәме дийҗек боляндыгына дүшүнмедилер.

⁵¹ Онсоң Иса эне-атасы билен Насыра гайтды, оларың сөзүне гулак асды. Эмма Онуң эҗеси бу гүррүңлериң әхлисини йүрегинде саклаярды.

⁵² Иса акылдарлыкда, бойда өсүп, Худайың хем адамларың мәхрини газанярды.