Luka 15 - Мукаддес Китап

15‑нҗи бап Йитен гоюн тымсалы

¹ Әхли салгытчылар билен гүнәкәрлер Исаның айдян затларыны диңлемек үчин, Онуң дашына үйшйәрдилер.

² Фарисейлер билен Төврат мугаллымлары болса: «Бу адам гүнәкәрлери кабул эдйәр, олар билен нахар иййәр» дийип хүңүрдешйәрдилер.

³ Онсоң Иса олара шу тымсалы айтды:

⁴ «Сизден бириниң йүз гойны бар диели. Ол буларың бирини йитирйәр. Шонда ол тогсан докузсыны дүзде гоюп, тә йитен гойнуны тапянча, оны гөзлемәге гитмезми?

⁵ Тапанда болса, оны бегенч билен эгнине алып гайдар.

⁶ Өйүне гелип, достларыны, гоңшуларыны чагырып: „Мениң билен биле шатланың, йитен гойнумы тапдым!“ диер.

⁷ Сизе шуны айдярын: шунуң ялы тоба эден еке гүнәли үчин гөкде болҗак шатлык тоба мәтәч дәл тогсан докуз догры адам үчин болҗак шатлыкдан хас улы болар».

Йитен пул тымсалы

⁸ «Айдалы, бир аялың он саны күмүш теңңеси бар экен. Ол буларың бирини йитирйәр. Шонда ол чыраны якып, өйи сүпүрип, оны тапянча, үнс берип гөзлемезми?

⁹ Тапанда болса өз җораларыны, гоңшуларыны чагырып: „Мениң билен биле шатланың, йитен теңңәми тапдым“ диер.

¹⁰ Мен сизе шуны айдярын: тоба эден екеҗе гүнәли үчин, Худайың перишделериниң арасында эдил шунуң ялы улы шатлык болар».

Йитен огул тымсалы

¹¹ Иса сөзүни довам этди: «Бир адамың ики оглы бар экен.

¹² Кичи оглы какасына: „Кака, мал-мүлкден мениң пайыма дүшенини бер“ диййәр. Какасы хем байлыгыны огулларының арасында бөлүп берйәр.

¹³ Бирнәче гүнден соң кичи оглы бар-ёгуны топлап, бир узак юрда гидйәр. Ол ерде шады-хоррамлыкда яшап, мал-мүлкүни еле совуряр.

¹⁴ Бар задыны совандан соң, яңкы юрда гаты ачлык дүшүп, ол хорлук чекмәге башлаяр.

¹⁵ Шейлеликде, ол гидип, шол юрдуң бир яшайҗысына гүнлүкчи дуряр. Ол хем оны өз өрүлерине доңуз бакмага иберйәр.

¹⁶ Огланың доңузларың иййән көсүклери билен гарныны дойрасы гелйәрди, эмма оңа хич ким хич зат бермейәрди.

¹⁷ Ол ахырсоңы акылына айланып, өзүне шейле диййәр: „Какамың энчеме гүнлүкчилери бар, оларың хеммесиниң хем дойянча иймәге чөреклери бар. Мен болса бу ерде ачлыкдан өлҗек болуп йөрүн!

¹⁸ Говусы, какамың янына барып, оңа: ‘Кака, мен Гөкдәкә-де, саңа-да гаршы гүнә этдим.

¹⁹ Мен инди сениң оглуң дийилмәге-де мынасып дәл. Мени өз гүнлүкчилериңден бири ялы кабул эт диейин’“.

²⁰ Йигит какасының янына уграяр. Оглы энтек узакдака, какасы оны гөрйәр. Оңа йүреги аваяр, ылгап барып оглуның бойнундан гуҗаклап, оны огшаяр.

²¹ Оглы оңа: „Кака, мен Гөкдәкә-де, саңа-да гаршы гүнә этдим. Мен инди сениң оглуң дийилмәге-де мынасып дәл“ диййәр.

²² Эмма какасы хызматкәрлерине буйрук берип: „Дессине иң сайлама доны гетириң-де, оңа гейдириң. Эллерине йүзүк дакың, аякларына көвүш гейдириң.

²³ Бага бакылан гөләни гетирип, дамагыны чалың, ийип шатланалың!

²⁴ Себәби бу оглум өлүди, инди дирелди; ол йитипди, инди тапылды“ диййәр. Шейдип, олар той этмәге башлаярлар.

²⁵ Шол вагт онуң улы оглы экин мейданында экен. Ол өе голайланда, айдым-саз билен оюн-гүлки сеслерини эшидйәр.

²⁶ Ол хызматкәрлериң бирини янына чагырып, мунуң себәбини сораяр.

²⁷ Ол хем оңа: „Иниң гайдып гелди. Какаң онуң саг-аман ызына доланып гелени үчин, бага бакылан гөләниң дамагыны чалды“ диййәр.

²⁸ Улы оглы гахарланып, ичери гирмек ислемейәр. Шонда какасы дашары чыкып, оңа ялбаряр.

²⁹ Эмма ол какасына шейле җогап берйәр: „Гөрйәңми, мен нәче йылдыр, сениң үчин гул ялы ишледим, хич хачан сениң буйрукларыңа ёк диймедим. Муңа гарамаздан, өз достларым билен шүвелең эдер ялы, сен маңа хич хачан бир чебиш-де бермедиң.

³⁰ Эмма әхли байлыгыңы лолы хелейлере совран бу оглуң геленде, сен онуң үчин бага бакылан гөләниң дамагыны чалдың“.

³¹ Какасы оңа: „Оглум, сен хемише мениң янымда ахыры, мениң бар задым сениңкидир.

³² Бу гүн болса той эдип, шатланмак герек, себәби сениң иниң өлүди, инди дирелди; ол йитипди, инди тапылды“ дийип җогап берйәр».