Luka 10 - Мукаддес Китап

10-нҗы бап Иса етмиш ики шәгирди иберйәр

¹ Шундан соң Реб Иса башга етмиш ики адамы белләп, олары Өзүниң гитмекчи болян әхли шәхерлерине, ерлерине ики-икиден өңүнден ёллады.

² Олара шейле дийди: «Хасыл бол, йөне ишгәр аз. Шонуң үчин хем хасылыны йыгмага ишгәр иберер ялы, хасыл эеси Реббе ялбарың.

³ Гидиң! Ине, Мен сизи мөҗеклериң арасына гузулар кимин ёллаярын.

⁴ Яныңыза гапҗык-да, торба-да, чарык-да алмаң. Ёлда хич ким билен саламлашмаң.

⁵ Хайсы өе барсаңыз, өңүрти: „Өйүңиз абадан болсун!“ дийиң.

⁶ Ол өйде парахатлыгы сөййән адам бар болса, сизиң дилән парахатлыгыңыз онуң үстүне инер, ёк болса-да, ене өзүңизе доланар.

⁷ Ол өйде галып, оларың беренлерини ийип-ичиң, себәби ишчи өз хакына мынасыпдыр. Өйден-өе гөчүп йөрмәң.

⁸ Бир шәхере бараныңызда, кабул эдилсеңиз, өңүңизде нәме гоюлса, шоны ийиң.

⁹ Ол ердәки хассалара шыпа бериң ве олара: „Худайың Шалыгы сизе голайлады!“ дийиң.

¹⁰ Эмма башга бир шәхере бараныңызда, кабул эдилмесеңиз, онуң көчелерине чыкың-да, олара:

¹¹ „Шәхериңизде аягымыза япышан тозаны-да сизе гаршы какярыс. Эмма шуны билиң: Худайың Шалыгы голайландыр!“ дийиң.

¹² Сизе айдярын: кыямат гүни ол шәхериң ягдайы Содом шәхериниң ягдайындан хас бетер болар.

¹³ Дат гүнүңе, эй, Хоразин! Дат гүнүңе, эй, Бетсайда! Сизде гөркезилен гудратлар Сур билен Сидонда гөркезилен болсады, онда олар биреййәм җул гейнип, күл үстүнде отурып тоба эдердилер.

¹⁴ Эмма кыямат гүни сизиң ягдайыңыз Сур билен Сидоның ягдайындан хас бетер болар!

¹⁵ Эй, Капернаум! Сен арша гөтерилерин өйдйәрсиңми? Ёк, сен довзаха ташланарсың.

¹⁶ Сизи диңлән Мени диңләр, сизи рет эден Мени рет эдер. Мени рет эден болса Мени Иберени рет эдер».

¹⁷ Онсоң шол етмиш ики шәгирт улы шатлык билен доланып гелип: «Эй, Агам! Сениң адыңы агзанымызда, арвах-җынлар хем бизе боюн болярлар» дийдилер.

¹⁸ Иса олара: «Мен шейтаның гөкден йылдырым ялы болуп ашак иненини гөрдүм.

¹⁹ Мен сизе йыланлары, ичянлары ве душманың әхли гүйҗүни депелемәге ыгтыяр бердим, хич зат сизе зепер етирмез.

²⁰ Шейле хем сиз эрбет рухларың өзүңизе боюн болмагына дәл-де, атларыңызың гөкде язылмагына бегениң» дийди.

²¹ Шол вагт Иса Мукаддес Рух аркалы шатланып: «Эй, Атам, ериң ве гөгүң Хөкүмдары! Сениң бу затлары акылдарлардан, дүшүнҗелилерден яшырып, чагалара аян эдениң үчин Саңа шүкүр эдйәрин! Хава, Атам, бу Сениң ислегиңди.

²² Атам әхли зады Маңа табшырды. Оглы Атадан башга хич ким танаян дәлдир. Атаны-да Огулдан ве Оглуң Оны аян этмек ислейән адамларындан башга хич ким танаян дәлдир» дийди.

²³ Соңра Иса шәгиртлерине йүзленип, олара айратын ныгтап: «Сизиң гөрйән затларыңызы гөрйән гөзлер нәхили багтлы!

²⁴ Сизе шуны айдярын: көп пыгамберлер ве патышалар сизиң гөрйәнлериңизи гөрмек иследилер, эмма гөрмедилер, сизиң эшидйәнлериңизи эшитмек иследилер, эмма эшитмедилер» дийди.

Оңат самариялы

²⁵ Бир диндар Исаны сынамак үчин, еринден туруп: «Мугаллым! Бакы яшайшы мирас алмак үчин мен нәме этмели?» дийип сорады.

²⁶ Иса онуң өзүне сораг билен йүзленип: «Төвратда нәме язылгы? Сен муңа нәхили дүшүнйәрсиң?» дийди.

²⁷ Ол адам: «Худайыңыз Ребби тутуш йүрегиңиз, әхли гүйҗүңиз ве дүшүнҗәңиз билен җан-тенден сөйүң». Шейле хем: «Якыныңы өзүңи сөйшүң ялы сөй» дийди.

²⁸ Иса оңа: «Догры җогап бердиң, сен хем шейле эт, шонда яшарсың» дийди.

²⁹ Эмма ол өзүни аклаҗак болуп, Исадан: «Мениң якыным ким боляр?» дийип сорады.

³⁰ Иса оңа шейле җогап берди: «Бир адам Иерусалимден Ерихо барярка, гаракчыларың элине дүшйәр. Олар онуң эшиклерини сыпырып алярлар-да, өзүнем енҗип, чалаҗан халда ташлап гидйәрлер.

³¹ Төтәнликде бир руханы шол ёлдан барярка, ол адамы гөрүп, ёлуң ол тарапы билен гечип гидйәр.

³² Онсоң бир леви-де шол ере етен вагты оны гөрүп, ёлуң бейлеки тарапы билен гечип гидйәр.

³³ Шол ёлдан гечип барян бир самариялы болса, бу адамы гөрүп, оңа йүреги аваяр.

³⁴ Онуң янына барып, зейтун ягы билен шерап гуюп, яраларыны сараяр. Онсоң ол адамы өз эшегине мүндүрип, бир мыхманхана гетирип, оңа гарашык эдйәр.

³⁵ Шол гүнүң эртеси мыхманхананың эесине ики күмүш теңңе чыкарып берип: „Муңа говуҗа серет, артыкмач чыкдаҗы этсең, ызыма гелйәркәм берерин“ диййәр.

³⁶ Сениң пикириңче, бу үч адамың хайсысы гаракчыларың элине дүшен адамың якыны боляр?»

³⁷ Диндар: «Оңа рехим эден адам» дийип җогап берди. Иса хем оңа: «Бар, сен-де шонуң ялы эт» дийди.

Иса Марта билен Меръемиң өйүнде

³⁸ Иса билен шәгиртлери ёлларыны довам эдип, бир оба етдилер. Иса оба гиренде, Марта атлы бир аял Оны мыхман алды.

³⁹ Бу аялың Меръем атлы бир гыз доганы барды. Ол Реб Исаның алкымына барып отурып, Онуң сөзлерини диңлейәрди.

⁴⁰ Марта болса ишлериниң көпдүгинден яңа башагайды. Ол Исаның янына гелип: «Агам! Уямың мениң еке өзүме хызмат этдирип отурмагы Сениң первайыңа-да дәлми? Оңа айт, маңа көмеклешсин» дийди.

⁴¹ Реб Иса оңа: «Вах, Марта, Марта! Сен көп затлар барада аладаланып башагай болярсың.

⁴² Диңе бир зат гереклидир. Меръем иң оңадыны сайлады ве бу онуң элинден хич алынмаз» дийип җогап берди.