Lewiler 9 - Мукаддес Китап

9-нҗы бап Харун гурбанлык берйәр

¹ Секизленҗи гүн Муса Харуны, онуң огулларыны ве Ысрайыл яшулуларыны чагырды.

² Ол Харуна шейле дийди: «Өзүңе гүнә гурбанлыгы үчин бир шикессиз гөләни, якма гурбанлыгы үчин хем бир шикессиз гочы алып, олары Реббе хөдүр эт.

^3-4 Ысрайыл халкына-да айт, гой, олар хем гүнә гурбанлыгы үчин бир эркеҗи, якма гурбанлыгы үчин хем шикессиз биряшар гөләни ве гузыны Реббиң хузурында гурбанлык эдип берерлери ялы, саламатлык гурбанлыгы үчин бир өкүзчәни, бир гочы ве зейтун ягына гарылан галла садакасыны гетирсинлер, чүнки бу гүн Реб сизе гөрнер».

⁵ Олар Мусаның буйран затларыны Реббе йүз тутулян чадырың өңүне гетирдилер ве бүтин халк голая гелип, Реббиң хузурында дурды.

⁶ Муса олара: «Реббиң шөхратының сизе гөрнери ялы, Реббиң сизе берен табшырыгы шудур» дийди.

⁷ Онсоң Муса Харуна шейле дийди: «Гурбанлык сыпасына голай бар-да, өз гүнә гурбанлыгыңы ве якма гурбанлыгыңы бер, өзүңи ве халкыңы гүнәлеринден сапла. Реббиң буйрушы ялы, халкы берен гурбанлыгы билен гүнәлеринден сапла».

⁸ Харун гурбанлык сыпасының янына барып, өзи үчин берилйән гүнә гурбанлыгының гөлесиниң дамагыны чалды.

⁹ Харуның огуллары гурбанлыгың ганыны рухана гетирип бердилер. Харун бармагыны гана батырып, гурбанлык сыпасының шахларына чалды ве галан ганы болса гурбанлык сыпасының дүйбүне дөкди.

¹⁰ Эмма Харун гүнә гурбанлыгы үчин берлен малың ягыны, ики бөвреги дашының ягы билен ве багрың йүзүндәки яг пердесини гурбанлык сыпасында якып, Реббиң Муса табшырышы ялы этди.

¹¹ Малың галаныны ол дери билен биле дүшелгәниң дашында якды.

¹² Соңра ол якма гурбанлык малының дамагыны чалды. Харуның огуллары гурбанлыгың ганыны онуң янына гетирдилер, Харун ганы гурбанлык сыпасының чар тарапына серпди.

¹³ Харуның огуллары якма гурбанлык малыны бөлеклере бөлүп, оны келлеси билен биле Харуна гетирип бердилер. Харун олары тутушлыгына гурбанлык сыпасында якды.

¹⁴ Харун гарын-ичегелери ве аяклары ювуп, олары якма гурбанлыгы билен билеликде гурбанлык сыпасында якды.

¹⁵ Соңра Харун халкың гурбанлыгыны хөдүрледи. Ол халкың гүнәлери үчин гурбан эдилҗек эркеҗи гетирип, онуң дамагыны чалды-да, өңки гурбанлык ялы, муны хем гүнә гурбанлыгы хөкмүнде хөдүрледи.

¹⁶ Харун якма гурбанлыгыны-да хөдүрләп, оны дүзгүн боюнча хөдүр этди.

¹⁷ Онсоң ол галла садакасыны хөдүрләп, ондан гошавуҗыны долдурып алды-да, оны гурбанлык сыпасында якды. Бу галла садакасы эртирлерине берилйән якма гурбанлыкларындан дашарыды.

¹⁸ Харун халк үчин саламатлык гурбанлыгы хөкмүнде берилйән өкүзиң ве гочуң дамагыны чалды. Харуның огуллары ганы онуң янына гетирдилер. Харун ганы гурбанлык сыпасының чар тарапына серпди.

¹⁹ Шейле хем, Харуның огуллары өкүзиң ве гочуң ягларыны: гуйрук ягларыны, гарын-ичегелериң дашындакы яглары, ики бөвреги дашының ягы билен, багрың йүзүндәки яг пердесини Харуна гетирип бердилер.

²⁰ Харун бу яглары дөшлериң үстүнде гоюп, олары гурбанлык сыпаның үстүнде якды.

²¹ Соңра Мусаның табшырышы ялы эдип, Харун дөшлери ве саг буды Реббе гөтерме садакасы хөкмүнде ёкары галдырды.

²² Харун гүнә гурбанлыгыны, якма гурбанлыгыны, саламатлык гурбанлыгыны беренден соң, эллерини халка тарап узадып, олара ак пата берди ве ашак дүшди.

²³ Муса билен Харун Реббе йүз тутулян чадыра гирдилер, соңра дашары чыкып, халка ак пата бердилер. Шол вагт Реббиң шөхраты бүтин халка гөрүнди.

²⁴ Реббиң хузурындан от гелди, от гурбанлык сыпасының үстүндәки гүнә гурбанлыгыны ве ягы якып, олары күле өвүрди. Бу ахвалаты гөрен бүтин халк гыгырышып йүзин йыкылды.