Lewiler 7 - Мукаддес Китап

7‑нҗи бап Язык гурбанлыгы барадакы дүзгүнлер

¹ Язык гурбанлыгы өрән мукаддес гурбанлыкдыр. Онуң берлиш кадасы шейледир:

² язык гурбанлык малының дамагы якма гурбанлык малының өлдүрилйән еринде чалнып, онуң ганы гурбанлык сыпасының чар тарапына серпилсин.

^3-4 Онуң әхли ягы: гуйрук ягы, гарын ичегелериниң дашындакы ягы, билдәки ики бөвреги дашының ягы билен ве багрың йүзүндәки яг пердеси бөвреклер билен биле алнып, Реббе хөдүр эдилсин.

⁵ Руханы олары Реббе от үсти билен берилйән гурбанлык хөкмүнде гурбанлык сыпасында яксын. Бу язык гурбанлыгыдыр.

⁶ Руханы машгаласындан болан хер бир эркек гөбекли ол мал этинден ийсин. Ол мукаддес ерде ийилсин, чүнки бу гурбанлык өрән мукаддес гурбанлыкдыр.

⁷ Язык гурбанлыгының берлиш кадасы-да эдил гүнә гурбанлыгының берлиш кадасы ялыдыр. Язык гурбанлыгының эти языклыны гүнәсинден саплаян руханыныңкы болсун.

⁸ Ислендик кишиниң якма гурбанлыгыны хөдүрлейән руханы гурбанлыга берлен малың дерисини өзүне алсын.

⁹ Тамдырда, питиде я-да сачда тайярланан ислендик галла садакасы оны Худая хөдүрлейән руханыныңкы болсун.

¹⁰ Эмма зейтун ягына гарылан я-да гуры, биширилмедик галла садакасы Харун несиллериниң арасында дең пайлашылсын.

Саламатлык гурбанлыгы барадакы дүзгүнлер

¹¹ Реббе хөдүр эдилйән саламатлык гурбанлыгының берлиш кадасы шейледир:

^12-13 эгер кимдир бири саламатлык гурбанлыгыны Худая шүкүр хөкмүнде хөдүрлейән болса, онда ол гурбанлык берилҗек мал билен бирликде зейтун ягына югрулан күлчелер, йүзүне зейтун ягы чалнан челпеклер ве зейтун ягына югрулып, сайлама бугдай унундан биширилен петир ве чөрек хөдүр этсин.

¹⁴ Буларың херсинден бир чөреги Реббе үвреме садакасы хөкмүнде берсин. Олар саламатлык гурбанлыгының ганыны гурбанлык сыпасының чар тарапына серпйән руханыныңкы болсун.

¹⁵ Реббе алкыш хөкмүнде берлен саламатлык гурбанлыгының эти болса хөдүр эдилен гүни ийилсин. Гурбанлык этиниң екеҗе бөлеги-де эртире галдырылмасын.

¹⁶ Эгер хөдүр эдйән садакаңыз айдылан я-да мейлетин садака болса, онда ол хөдүр эдилен гүни ийилсин. Ондан артып галаны эртеси гүн ийилсин.

¹⁷ Ондан артып галаны болса, үчүленҗи гүн ода якылсын.

¹⁸ Эгер саламатлык гурбанлыгының этинден үчүленҗи гүн ийилсе, онда ол кабул болмаз ве оны хөдүр эден үчин хасаба алынмаз. Ол неҗисдир, ондан иен җезаны чекмели.

¹⁹ Эгер гурбанлык малының эти ислендик харам зада галташса, ол ийилмесин, ода якылсын, халал эти харам сайылмадык киши ийип билер.

²⁰ Эгер кимде-ким харам болубам, Реббе хөдүр эдилен саламатлык гурбанлыгының этинден ийсе, ол өз халкының арасындан ковлуп чыкарылсын.

²¹ Эгер кимде-ким ислендик харам зада: ынсан харамлыкларына, харам мала я-да ислендик харам җандара галташыбам, Реббе хөдүр эдилен саламатлык гурбанлыгының этинден ийсе, ол өз халкының арасындан ковлуп чыкарылсын“».

²² Реб Муса шейле дийди:

²³ «Ысрайыл халкына айт: „Өкүзиң, гойнуң я-да гечиниң хич бир ягыны иймесинлер.

²⁴ Өлен малың я-да йыртыҗыларың парчалан малының ягы хер хили максатлар үчин уланылып билнер, эмма ол хич хачан ийилмели дәлдир.

²⁵ Кимде-ким Реббе от үсти билен берилйән гурбанлык малының ягындан ийсе, ол ысрайыл халкының арасындан ковлуп чыкарылсын.

²⁶ Ниреде яшаяндыкларына гарамаздан, гушуңкымы я-да хайваныңкымы – пархы ёк, олар хич хили ган иймесинлер.

²⁷ Эгер кимде-ким ган ийсе, нәмәниң ганыдыгының пархы ёк, ол өз халкының арасындан ковлуп чыкарылсын“».

²⁸ Реб Муса шейле дийди:

²⁹ «Ысрайыл халкына айт: „Ким Реббе саламатлык гурбанлыгыны хөдүр этмекчи болса, ол Реббе айратын садаканы өз саламатлык гурбанлыгының малындан берсин.

³⁰ Садака берйән адамың өзи гурбанлык берлен малың ягыны онуң дөши билен бирликде гетирип, олары Реббе от үсти билен берилйән гөтерме садакасы хөкмүнде ёкары галдырсын.

³¹ Руханы ягы гурбанлык сыпасында яксын, эмма гурбанлык малының дөши Харуның огулларыныңкы болмалыдыр.

³² Шейле хем саламатлык гурбанлыгыңызың саг будуны-да садака хөкмүнде рухана бериң.

³³ Гурбанлык малының пай хөкмүнде берилйән бу саг будуны, саламатлык гурбанлыгының ганыны ве ягыны хөдүрлән руханы алсын.

³⁴ Чүнки Мен ысрайыл халкындан оларың саламатлык гурбанлыкларындан Реббе гөтерме садакасы хөкмүнде хөдүрленен дөши ве саг буды алдым. Олары Мен ысрайыл халкындан руханы Харуна ве онуң огулларына эбедилик пай хөкмүнде бердим.

³⁵ Харуның ве онуң огулларының Реббе руханы хөкмүнде гуллук этмәге башлан гүнлеринден бәри Реббе от үсти билен берилйән садакалардан олара дегишли пай шудур“».

³⁶ Мунуң ысрайыл халкындан эбедилик парз хөкмүнде руханылара берилмелидигини, Харуны ве онуң огулларыны везипә беллән гүни Реб маңа буюрды.

³⁷ Якма гурбанлыгының, галла садакасының, гүнә гурбанлыгының, язык гурбанлыгының, беллеме садакасының ве саламатлык гурбанлыгының берлиш кадасы шулардан ыбаратдыр.

³⁸ Синай чөлүнде Реб Өзүне гурбанлыкдыр садакалар бермеклиги ысрайыл халкына буйран гүни Ол Муса бу табшырыгы берди.