Lewiler 3 - Мукаддес Китап

3‑нҗи бап Саламатлык гурбанлыгы

¹ Берйән садакаңыз саламатлык гурбанлыгы болуп, сиз улы мал өлдүрмекчи болсаңыз, онуң өкүз я сыгырдыгының пархы ёк, ол шикессиз мал болмалыдыр.

² Малың эеси гурбанлык малының келлесине элини гоюп, Реббе йүз тутулян чадырың агзында онуң дамагыны чалсын. Харуның огуллары – руханылар гурбанлыгың ганыны гурбанлык сыпасының чар тарапына серпсинлер.

^3-4 Сиз саламатлык гурбанлыгындан бар ичяглары хем-де гарын ичегелериң дашындакы бар ягы, билдәки ики бөвреги дашының ягы билен, багрың йүзүндәки яг пердесини бөвреклер билен биле алып, олары Реббе от үсти билен берилйән гурбанлык пайы хөкмүнде хөдүр эдиң.

⁵ Онсоң Харуның огуллары булары гурбанлык сыпасының үстүнде янып дуран отдакы якма гурбанлыгы билен биле яксынлар. Реббе от үсти билен берилйән бу гурбанлыгың ысы Оңа якымлыдыр.

⁶ Эгер саламатлык гурбанлыгы хөкмүнде Реббе довар сүриңизден гурбанлык хөдүр этмекчи болсаңыз, онда ол гочмы, гоюнмы, текеми, гечими – пархы ёк, ол шикессиз довар болмалыдыр.

⁷ Эгер сиз гоюн гурбанлык бермекчи болсаңыз, онда оны Реббиң хузурына гетирмелисиңиз.

⁸ Малың эеси гурбанлык җанлысының келлесине элини гоюп, онуң дамагыны Реббе йүз тутулян чадырың өңүнде чалсын. Харуның огуллары онуң ганыны гурбанлык сыпасының чар тарапына серпсинлер.

^9-10 Малың эеси саламатлык гурбанлыгы үчин хөдүр эдилен җанлының әхли ягларыны: гойнуң түрресиниң дүйбүнден кесилип алнан гуйрук ягыныңдыр ичягларының барыны ве гарын ичегелериң дашындакы ягларың барыны, билдәки ики бөвреги дашының ягы билен, багрың йүзүндәки яг пердесини бөвреклер билен биле алып, олары Реббе от үсти билен берилйән гурбанлык пайы хөкмүнде хөдүр этсин.

¹¹ Онсоң руханы булары алып, Реббе от үсти билен берилйән иймит садакасы хөкмүнде гурбанлык сыпасында яксын.

¹² Эгер гечи гурбанлык бермекчи болсаңыз, сиз оны Реббиң хузурына гетирмелисиңиз.

¹³ Малың эеси онуң келлесине элини гоюп, Реббе йүз тутулян чадырың өңүнде онуң дамагыны чалсын. Харуның огуллары гурбанлык җанлысының ганыны гурбанлык сыпасының чар тарапына серпсинлер.

^14-15 Малың эеси гурбанлык җанлысының бар ичягларыны хем-де гарын ичегелериниң дашындакы әхли ягыны, билдәки ики бөвреги дашының ягы билен ве багрың йүзүндәки яг пердесини бөвреклер билен биле алып, олары Реббе от үсти билен берилйән гурбанлык пайы хөкмүнде хөдүр этсин.

¹⁶ Онсоң руханы булары алып, Реббе от үсти билен берилйән иймит садакасы хөкмүнде гурбанлык сыпасында яксын. Онуң ысы Реббе якымлыдыр. Гурбанлыгың әхли ягы Реббе хөдүр эдилсин.

¹⁷ Сиз ниреде яшасаңыз-да, этиң ягыны ве ганыны иймәң. Бу сизиң бүтин несиллериңиз үчин эбедилик дүзгүн болсун“».